Quintrick husi Jardiel Piedade Lori F.C Porto Taibessi Hakat ba Meia-Finál Taça da Liga

Jorgadór sira F.C Porto Taibessi halakon nia adversáriu Fitun Estudante Lorosa'e F.C ho skor 5-1 iha jogu Taça da Liga 2025. Imajen/Rafa.tl

DILI, RAFA.tl – Jogadór F.C Porto Taibessi, Jarde Piedade halo istória ba Futeból Timor-Leste iha Taça da Liga époka ne’e, hafoin susesu halo Quintrick iha jogu kontra adversáriu Fitun Estudante Lorosa’e F.C no lori nia ekipa hakat ba meia-finál.

Notísia Relevante: Taça da Liga, F.C Porto Taibessi iha Preparasaun Másimu Hakarak Hakat Ba Meia-Finál

Iha jogu ne’ebé halo iha Estádiu Munisipál Díli, Sesta (06/02/2026), F.C Porto Taibessi ne’ebé iha ambisaun hakarak manán jogu ne’e, halo kedas presaun ba adversáriu iha minutu dahuluk jogu hahú.

F.C Porto Taibessi hahú domina kedas bola iha liña klaran hodi halo estratejia oinsá fó bola ba avansadu sira hodi hatama golu, nune’e bele asegura pozisaun iha tabela klasifikasaun grupu C no hakat ba meia-finál ho susesu hanesan vensedór grupu.

F.C Porto Taibessi susesu marka golu iha minutu ualu (8) liu husi jogadór Jardiel Piadade no liu de’it minutu haat no tama ba minutu 12, Jarde Piedade kontinua aumenta tan golu ba nia ekipa.

F.C Porto Taibessi kontinua domina bola iha liña klaran no halo atake barak liután ba ekipa Fitun Estudante Lorosa’e F.C no tama ba minutu tempu extra primeira parte atu remata, F.C Porto Taibessi hetan prezente penalidade ida hafoin jogadór adversáriu hamonu avansadu F.C Porto Taibessi iha grande área laran, no Jardiel Piadade ne’ebé sai hanesan ezekutór susesu marka golu hodi muda skor ba 3-0 no to’o primeira parte termina, ekipa F.C Porto Taibessi lidera jogu ne’e.

Tama ba segunda parte, F.C Porto Taibessi kontinua hatudu nia superioridade hodi domina jogu iha kada liña, no avansadu sira ativu liu tan halo atake ba adversáriu hodi buka atu aumenta golu.

Tama ba minutu 58, jogadór F.C Porto Taibessi, Jardiel Piadade habót liután skor hodi marka tan golu ida no muda skor ba 4-0.  Maske nune’e, Fitun Estudante Lorosa’e F.C susesu hadi’a jogu no marka golu ida liu husi jogadór Natalizio Sang.

Tama ba minutu 84 jogador F.C Porto Taibessi Jardiel Piadade marka tan golu ida hodi kompleta nia Quintrick no halo skor ikus sai ba 5-1 no lori vitória ba ekipa F.C Porto Taibessi.

Treinadór F.C Porto Taibessi, Luís Simões hatete, maske sira manán maibé kontinua hadi’a fallansu ne’ebé iha, atu nune’e, bele prepara ba jogu iha meia-finál hasoru Emmanuel F.C.

“Esperansa tuir mai, ami sei treinu hodi hadi’a buat balu ne’ebé mak hanesan jogadór ohin balu kartaun mean, depois limitadu jogadór, ha’u hanoin ida-ne’e mós difikulta ami treinadór, no ba oin ami sei hadi’a hodi di’ak liután. Ami iha liga hasoru ona sira Emmanuel F.C, ami iha ami nia rapor oituan hodi bele kompete ho sira,” Luís Simões hateten.

Treinadór Fitun Estudante Lorosa’e F.C, Hermelo José Pereira, simu derota ne’e no kontinua hadi’a fallansu ne’ebé iha, atu nune’e, prepara jogadór sira ba jogu époka tuir mai.

“Husi inísiu kedas ha’u dehan, Portu Taibessi klubu ne’ebé zigante  iha primeira divizaun, maibé nu’udar ekipa ida ne’ebé mak kompete hela iha Copa FFTL, nu’udar klubu, ami prontu hodi hasoru, maibé ohin ita hotu haré, mai ha’u kona-bá fallansu ne’ebé ha’u iha, ha’u nia ekipa hetan aleza uluk bainhira mosu asidente oituan iha grande área,  depois ha’u nia ekipa segundu la mai, ne’ebé ha’u sente ha’u nia fallansu, maibé ha’u sente ida-ne’e la’os ikus, sei hadi’a fali, ita sei hasoru malu fali iha époka tinan oin,” Hermelo José Pereira hateten.

Ho vitória ne’ebé F.C Porto Taibessi rekolla ne’e, halo ekipa estimadu komunidade Taibessi ne’e rekolla pontus hitu husi jogu tolu, iha ne’ebé manán rua no impata ida.

Tuir oráriu, ekipa F.C Porto Taibessi sei hasoru ekipa Emmanuel F.C iha jogu meia-finál ne’ebé sei hala’o iha loron 21 fulan-Fevereiru 2026, iha Estádiu Munisipál Díli.

Reportajen ekipa Rafa.tl