Xanana Fó Períodu Provatóriu Fulan-tolu Bá Atóni-Oan sira Lidera RAEOA ho ZEEDOA

Primeiru-Ministru, Kay Rala Xanana Gusmão. Imajen/Rafa.tl

DILI, RAFA.tl—Primeiru-Ministru  Kay Rala Xanana Gusmão,  fó oportunidade períodu provatóriu fulan-tolu bá atóni-oan sira lidera no jere  rasik  Rejiaun Administrativa Espesiál  Oé-Cusse Ambeno (RAEOA) ho Zona Ekonómia Espesiál Dezenvolvimentu Oé-Cusse Ambeno (ZEEDOA).

Notísia Relevante: Rogério Lobato Husik Hela Oé-Cusse, “Ami Sei Prepara Relatóriu Tranzisaun Ida Pasífiku no Tuir Lei”

Reuniaun Konsellu Ministru sira-nian iha Palásiu Governu iha loron 27 fulan-Agostu 2025, Primeru-Ministru Xanana Gusmão rasik aprezenta projetu Rezolusaun Governu nian tolu kona-bá Rejiaun Administrativa Espesiál Oé-Cusse Ambeno (RAEOA) mak hanesan;

1. Disolve Komisaun Ezekutiva ho hanoin atu estabelese Zona Ekonómika Espesiál Dezenvolvimentu Oé-Cusse Ambeno (ZEEDOA) ho efeitu iha loron 31 fulan-Agostu 2025;
2. Ezonera Prezidente no membru Autoridade RAEOA nian, ho efeitu hahú iha loron 31 fulan-Agostu  2025;
3. Nomeia estrutura provizória foun ida hodi garante kontinuidade administrasaun nian hahú iha loron 01 fulan-Setembru 2025.

Iha loron tuir mai, IX Governu Konstitusionál  liuhosi rezolusaun Governu nian númeru 37/2025, loron 28 fulan-Agostu, nomeia Régio da Cruz  Salu nu’udár atóni oan bá Prezidente Autoridade Rejiaun Administrativa Espesiál Oé-Cusse Ambeno (RAEOA) ho mandatu fulan-tolu, ne’ebé sei servisu hamutuk ho Estrutura sira kargu diretór no xefe Rejiaun sira ne’ebé Governu estabelese.

Nomeasaun Régio da Cruz Salu ne’e bazeia bá Artigu 17, 17-A, no 19 husi Lei Númeru 3/2014 loron 18 fulan-Juñu, ne’ebé kria Rejiaun Administrativa Espesiál Oé-Cusse Ambeno no estabelese Zona Ekonomia Sosiál Espesiál Merkadu nian ne’ebé altera husi Lei sira Númeru 3/2019, 2020/2020 loron 10 fulan-Fevereiru, no númeru 18/2023 loron 30 fulan-Novembru.

Governu da-IX ne’ebé lidera husi Primeiru-Ministru  Xanana Gusmão nomeia mós Herculano Sousa, atóni-oan ida mós bá kargu Koordenadór bá implementasaun Zona Dezenvolvimentu Ekonómiku Espesiál Oé-Cusse Ambeno (ZEEDOA).

Governu nomeia mós indivíduu sira (mesak atóni-oan de’it) bá kargu diretór no xefe Rejiaun Administrativa Espesiál Oe-Cusse Ambeno nian hanesan;

• Domingos Punef, diretór-Jerál Rejionál
• José Tanessib Anuno, diretór Rejionál ba Administrasaun
• Augusto de Fátima Efi, diretór Rejionál bá Planeamentu no Kompras
• Amâncio Aguido Punef, diretór Rejionál Finansas nian
• Merita Marques Caunan Lafo, diretora Rejionál Saúde
• Vicêncio Cono, diretór Rejionál Edukasaun no Solidariedade Sosiál
• José Oki, diretór Rejionál bá Agrikultura
• Orlando Quelo, diretór Rejionál Komérsiu no Indústria
• Remígio Nuno Sila, diretór Rejionál Infraestrutura
• Domingos de Almeida, diretór Rejionál Transporte no Komunikasaun
• Carlos de Fátima de Almeida, diretór Rejionál baáJuventude no Desportu
• Anastasia Eni, diretora Rejionál bá Turizmu, Arte, no Kultura
• José Ase Teno, diretór Rejionál Terras no Bens Imóveis.

Nomeasaun sira ne’e, hahú sira-nia knaar tuir kargu ne’ebé dezigna ona, hahú iha loron 01 fulan-Setembru tinan 2025 to’o loron 30 fulan-Novembru tinan 2025 ho posibilidade atu halo renovasaun.

Bá jornalista sira iha Palásiu Prezidensiál, Sesta (29/08/2025), Primeiru-Ministru Xanana Gusmão, afirma Governu nomeia Régio da Cruz Salu  bá nu’udar PA-RAEOA ho Herculado da Sousa nu’udár koordenadór  bá implmentasaun ZEEDOA  hanesan periódu ida atu  hatudu sira nia kbiit duni  bele povu atoni Oé-Cusse tomak  fiar bá sira nia oan sira halo servisu di’ak.

“Ne’e mak ha’u sei bá-mai, sira mós sei bá-mai hodi haree se tau ama ne’e iha fatin ida mak nia servisu di’ak, sim señór bá nafatin, se tau apa ne’e mak bá nune’e hela de’it deskulpa, ne’ebé to’o fulan-Dezembru hasai,” Xanana afirma.

Lori Governu da-IX nia naran, Primeiru-Ministru  Xanana Gusmão agradese tebe-tebes bá  PA-RAEOA sesante Rogério Tiago de Fátima Lobato nia  kontribuisaun ne’ebé  halo esforsu boot no husik hela eransa   di’ak bá Oé-Cusse.

“Komu atóni-oan sira dala-ruma ko’alia ho ha’u dehan, iha fatin hotu-hotu iha rai boot ne’ebá munisípiu nia oan mak tau iha ne’ebá, ami ne’e, ami la vale kedas ona ka tanba  atan-oan ha’u, sé iha fatin hotu-hotu, fó bá munisípiu nia oan mak kaer, tanbásá atóni-oan  labele, ita la bele fiar halo atóni, ne’ebé Prezidente Repúblika mós dehan sim, di’ak, kontínua nafatin bá. Kontínua haree sira, dudu sira atu hatudu sira-nia kbiit hodi lori Oé-Cusse bá oin,” Xanana haktuir.

Iha enkontru semanál ho Prezidente Repúblika iha Palásiu Prezidensiál, Xanana mós  informa bá Xefe Estadu kona-bá nia planu no nia hanoin atu iha tinan  2026 nia  la’o haleu Timor hodi  haree kona-bá  desentralizasaun governu lokál.

Reportajen Ekipa Rafa.tl