Tribunál Aplika Prizaun Preventiva Bá Arguido sira Jogu Online

PCIC ho MP aprezenta arguido sira bá jogu online no online scamming ba partisipa primeiru interrogatóriu iha TJPIO. Imajen/Rafa.tl

OÉ-CUSSE, RAFA.tl-Tribunal Judisiáriu Primeiru Instánsia Oé-Cusse (TJPIO), Sesta (29/08/2025), hatún despaxu hodi aplika medida koasaun prizaun preventiva bá arguido na’in-lima no arguida ida bá kazu jogu online iha Otél Oe-Upu, Rejiaun Administrativu Epesiál Oé-Cusse Ambeno (RAEOA).

Notísia Relevante: Advogadu Empreza Seagoull Resort Deklara Atividade Jogu Online iha Otél Oe-Upu Legál

Arguido sira-ne’e nu’udár sidadaun estranjeiru, kompostu husi na’in-tolu ho nasionalidade Xina, na’in-ida feto ho nasionalidade Nepal no na’in-ida seluk ho nasionalidade Indonézia.

Ekipa konjunta husi Polísia Siéntifika Investigasaun Kriminál (PCIC) ho Serbisu Nasionál Intelejénsia (SNI), Segunda  kalan (25/08/2025),  tuku 21:00 Otl,  halo buska no apreensaun bá fatin sira ne’ebé deskonfia hala’o atividade jogu online ho online scamming iha Otél Oe-Upu, RAEOA.

Iha buska no aprrensaun ne’e PCIC  ho SNI prende ekipamentu lubuk ida, inklui  desktop hamutuk 86, laptop 13, Telemovel 194, asesu oioin Wifi ida (1),  Starlink rutel rua (2) no kartaun sim telefonéka  husi operador balun ne’ebé eziste  iha Timor hamutuk 135.

Halo mós apreensaun bá iha  evidénsia sira balun tan ne’ebé deskonfia utiliza bá halo atividade online scamming maka hanesan desktop 54, Laptop haat, headphone  54, asesu poin, telemovel 44,  mákina sura osan ida  no mós impresór ida.

“Prosesu primeiru  interogátoriu ne’e kuaze loron rua; Kinta-Sesta (28-29/08/2025), ohin, Tribunal Judisiáriu Primeiru Instánsia RAEOA hatún despaxu hodi aplika prizaun preventiva bá arguido na’in-lima  ho arguida ida,” defensór públiku, Estaquio Guterres, informa bá jornalista sira iha Oé-Cusse, Sesta (29/08/2025).

Tuir nia, Tribunál  hatun despaxu medida koasaun prizaun preventiva ne’e ho nia fundamentu haree bá kazu ida-ne’e iha indísiu forte katak arguido sira (feto ida no mane na’in-lima) komete krime ne’ebé  konsidera jogu ilegál no mós burla informátika.

Ministériu Públiku hato’o rasik bá Tribunál katak deskonfia forte arguido sira komete krime  jogu ilegál no mós burla informátika, ho nune’e,  Tribunál hatún despaxu hodi aplika prizaun preventiva.

Estaquio Guterres konsidera despaxu Tribunál nian ne’e normál iha ne’ebé de’it, tanba  ne’e la’ós desizaun definitive. Nune’e, Defeza sira ne’ebé fasilita asisténsia legal bá arguido sira bele rekore bá Tribunál Rekursu kontra despaxu Primeira Instánsia  nian (TJPIO-red)   iha prazu  loron 30 nia laran.

“Jogu Online ne’e iha lisensa legal husi  Servisu Rezistu no Verifikasaun Emprezariál (SERVE), tanba ne’e ami Defeza sira solisita bá Tribunál atu aplika medida koasaun Termu Identidade Rezidésia (TIR), maibé Tribunál nia haree no sira-nia hanoin diferensa ho ami nia pedidu, ne’e normál iha ne’ebé deit, katak  se juis balun dalaruma aseita defeza ho advogadu nia hanoin no bele mós aseita husi MP nia hanoin,” Estaquio Guterres hateten.

Defensor Publiku konsidera ida-ne’e la’ós problema boot tanba sira sei iha direitu loron 30 nia laran para atu rekore bá Tribunál Rekursu.

Kompañia Seagoull Resort ne’ebé agora problema hela ne’e hanesan empreza internasionál ho kualidade aas tanba investe millaun $9 bá iha Otél Oe-Upu liuhosi kontratu konsensaun ne’ebé asina direta husi Prezidente Autoridade RAEOA   Regério Tiago de Fátima Lobato.

Defensor Públika Estaquio Guterres konsidera medida koasaun ne’e  la iha problema boot no husik investigasaun lao, Polísia sira hala’o nia servisu, dever obrigatóriu investiga tanba ikus liu, buat hotu sei lori bá iha Tribunál mak sei ko’alia, mézmu Tribunál Judisiáriu Primeira Insatánsia RAEOA deside prizaun preventiva mak adekuada liu.

Husi sorin seluk, Prezidente Autoridade ein-Ejersísiu Rejiaun Administrativu Espesiál Oé-Cusse Ambeno (RAEOA), Rogério Tiago de Fátima Lobato ne’ebé jornalista sira konfirma iha Oé-Cusse, hateten husik PCIC ho autoridade Polisiál  halo sira-nia servisu tuir orden no lei  hodi hein desizaun husi Tribunál.

Rogério Tiago de Fátima Lobato  informa  kompañia estranjeiru Seagoull Resort  ne’ebé investe iha Otél Oe-Upu  kontribui arrendamentu  $4.000 kada fulan bá iha reseita la’ós impostu (não fiscais) bá Rejiaun Administrativu Espesiál Oé-Cusse Ambeno (RAEOA).

Reportajen Ekipa Rafa.tl