Krús Joven Internasionál Husik Ona Timor Hodi Bá Tailándia, Dom Virgílio Husu Sarani Sira Hahii no Fó Gloria Bá Maromak

Sarani Timoroan sira despede Krús Joven Internasionál ho Icona Maria Salus Populia Romani iha Igreja Katedrál Dili, Sábadu (30/08/2025). Imajen/Rafa.tl

 DILI, RAFA.tl– Sarani Kreda Timor nian, Sábadu (30/08/2025), halo despedida ho Krús Joven Internasionál  no Icona Maria Salus Populia Romani, liuhosi sakramentu misa ne’ebé hala’o iha Igreja Parória Katedrál Imaculada Conceição, Dili.

Notísia Relevante: Timoroan Kontínua Hetan Grasa ho Prezensa Krús Joven Internasionál

Krús Joven Internasionál no Icona Maria Salus Populia Romani vizita Kreda Timor durante loron-ualu, hahú hosi loron 23 to’o loron 30 fulan-Agostu 2025.

Krús Joven Internasionál ne’ebé inísia husi  Papa  João Paulo II nu’udár “sinál dame no esperansa nian”  hamutuk ho  sarani no joven katóliku Dioseze Dili nian durante loron rua (23-24/08/2025), no  iha loron 25 fulan-Agostu ne’e, vijita ona sarani sira  Dioseze Malina.

Iha loron 30 fulan-Agostu ne’e, hale’u tuku 06:00 dadeer, sarani sira despedida Krús Joven Internasionál bá fali vizita fali sarani no joven sira iha  Tailándia.

Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, iha nia omilia misa despedida Krús Joven Internasionál ne’e husu ba sarani Timoroan hotu atu kontínua hahii no fó gloria bá Maromak iha moris lor-loron, liuhosi servisu no atividade hotu ne’ebé halo.

Dom Virgílio Kardeál do Carmo da Silva hateten, Timor-Leste selebra eventu boot rua iha loron 30 fulan-Agostu 2025; bá dahuluk selebra tinan 26 loron Konsulta Popular, ne’ebé lori hotu-hotu hanoin hikas iha momentu loron 30 fulan-Agostu tinan 1999, iha ne’ebé Timoroan hotu bá vota hodi determina Timor-Leste nia Iidepedensia.

Loron ohin ne’e mós Timoroan hotu, sarani Katólika realiza serimonia despedida bá Krús Joven Internasionál no Icona Maria Salus Populia Romani,  ne’ebé hamutuk ho sarani hotu durante semana ida, no tenke ba fali vizita sarani sira iha fatin seluk.

Arsebispu hatutan, ho vizita Krús Joven Internasionál ne’e, hanorin Timoroan oinsá atu sai sarani ne’ebé maka diak no kontinua serbí  bá Maromak ho talentu sira ne’ebé Nia haraik ona mai Timoroan idaidak.

“Keta tauk atu hahii no fó gloria bá Maromak, konvite ida mai ita atu fó onra bá Maromak, uza talentu ne’ebé Na’i Maromak haraik mai ita idak-idak iha moris lor-loron, ita idak-idak buka nafatin atu siensia ida ne’ebé ita hetan, hatutan bá ema seluk hanesan Kristu Nia illas iha Maromak Nia  oin,” Arsebispu Arkidioseze Metropolitana Dili, Dom Virgílio Kardeál do Carmo da Silva, SDB hateten.

Líder Kreda Timor ne’e mós husu bá sarani sira kontínua sai sasin bá idak-idak nia fiar, hodi kontínua kumpre idak-idak nia dever no responsabilidade hodi garante bá nasaun ninia diak.

Krús Joven Internasionál no Icona Maria Salus Populia Romani nia prezensa,  Dom Virgílio afirma, tenke sai motivasaun ida, atu hotu-hotu badinas liután, servisu maka’ás, reza maka’ás, estuda maka’ás, halao knaar hotu ho responsabilidade,  hametin fiar, iha saúde, hodi dezenvolve nasaun ne’e di’ak liután bá oin.

Hanesan sarani Kristaun Katólika, hotu-hotu iha responsabilidade atu hatutan Papa Leão XIV nia mensajen ne’ebé dehan, “Kristianizmu la’ós devosaun pesoál, maibé inteiru bá moris, domin, iha responsabilidade no justisa ba iha bem komún”.

“Husi interseisaun Krús Joven Internasionál ho Icona Maria Salus Populia Romani, renova ita nia identidade moris nian, hanesan dehan nanis ona, Timor-Leste ne’e rai Santa Krús no rai Santa Maria,” Kardeál subliña.

Remata selebrasaun ne’e, representante delegadu Koreia-Súl, ne’ebé akompaña Krús Joven Internasionál, Pe. Pedro hato’o agradese bá Timoroan sira nia domin durante ne’e, halo sira sente duni Maromak Nia domin iha sira-nia prezensa.

“Timoroan fiar boot, Timoroan hadomi Maromak, agradese bá Sarani sira hotu, ami haksolok ho oportinidade bá tTmoroan sira, iha tinan 2027, iha jornada mundiál Juventude, ami bele fila fali mai, ami reza nafatin bá Maromak no mai agradese tebes bá Timor-Leste,” Pe. Pedro hateten.

Iha observasaun jornalista Rafa.tl iha Igreja Parókia Katedrál Imaculada da Conceição, Dili hare katak, molok Krús Joven Internasionál no Icona Maria Salus Populia Romani,  atu sai husi portaun Katedrál nian, sarani sira hakbesik aan bá hodi simu bensaun no balun lolo-liman no halo sinal Krús nu’udár sinál salvasaun no bensaun nian, atu simu grasa iha moris lor-loron nian.

Bainhira Krús Joven Internasionál hahú sai husi resintu Igreja Katedrál Dili, sarani barak hamonu matan-been, no balun taka-liman hodi foti-liman aas sinál despedida fó adeus nian.

Husi Igreja Parókia Katedrál Imaculada Conceição, Dili,  sarani sira hamutuk ho Arsebispu Arkidioseze Metropolitana Dili,  Dom Virgílio Kardeál do Carmo da Silva, SDB  hamutuk ho saserdote sira, relijiozu no relijioza sira, halao prosisaun ho Krús Joven Internasionál no Icona Maria Salus Populia Romani bá Aeroportu Internasional Prezidente Nicolau Lobato no hetan seguransa másimu husi Polísia Nasionál Timor-Leste (PN TL), liuhosi Unidade Tránzitu, Eskuteiru,  no autoridade sira sivíl no militar sira hodi halo despedida ikus bá Krús Joven Internasionál no Icona Maria Salus Populia Romani.

Reportajen Ekipa Rafa.tl