Jogu Online iha Indísiu Forte Bá Brankeamentu Kapitál

Deputadu David Dias Ximenes "Mandati" ho Deputada Maria Angelina Sarmento. Imajen/Repro

DILI, RAFA.tl – Bankada opozisaun sira iha Parlamentu Nasionál, kompostu husi Partidu Frente Revulusiónariu Timor-Leste Indepedente (FRETILIN) ho Partidu Libertasaun Popular (PLP) konsidera jogu online ne’ebé dadaun ne’e Governu lezitíma hodi halo atividade  iha rai-laran iha indísiu forte bá brankeamentu kapitál.

Notísia Relevante: Atensaun, Jogu Online Ne’ebé Governu Legaliza Bele Hamosu Krime Tráfiku Umanu

Brankeamentu kapitál maka krime ida ne’ebé konsiste iha subar orijen ilegál hosi patrimóniu no rendimentu, transforma sira bá rekursu sira ne’ebé parese legál. Prosesu ilísitu ida-ne’e jeralmente envolve faze tolu: tau osan iha sistema finanseiru, sirkula liuhosi tranzasaun oioin hodi difikulta ninia trazabilidade, no integra osan ne’e iha sirkuitu ekonómiku lejítimu.

Membru PN husi Bankada PLP, Maria Angelina Lopes  Sarmento, Kinta  (04/09/2025) iha PN hateten, Governu tenke iha kreatividade no hanoin ida atu husu investidór sira mai invste iha Timor iha área ne’ebé povu presiza, no Governu labele hanoin deit buat ne’ebé fasil atu hetan osan  hanesan jogu online sira ne’e, maibé iha impaktu boot bá nasaun iha futuru.

Nia afirma, iha jogu online nia fonte bele mai husi kapitál ne’ebé operadór sira iha no bele mós mai husi dalan ilegál sira, tanba ne’e, Governu presiza haree ho di’ak molok fó lisensa tanba ida-ne’e bele fó impaktu negativu bá Estadu.

“Hanesan jogu online sira ne’e bele-bele fontes osan ne’e mai husi buat ida ema bolu money loundry  ka brankeamentu kapitál ne’e, tanba sira nia osan barak demais ona, sira la hatene atu aloka bá iha ne’ebé, dalan fasil ne’e maka investe tiha bá jogu online sira ne’e. Ho meius sira ne’e mak esplorasaun hahú iha, tráfiku umanu buras no krime organizadu sira la’o iha fatin-fatin,” Deputada Maria Angelina Lopes Sarmento hateten.

Nia konsidera mós katak, jogu online ne’e hanesan siklu ida ne’ebé nakonu ho veneno, halo ema baruk no halo ema konsiente katak dalan ida ne’e maka di’ak, maibé realidade ida-ne’e iha impaktu boot ba família no nasaun.

Jogu online ne’e mós la iha benefisiu ba povu, no la kontribui bá kofre estadu, tanba kada tinan relatóriu ne’ebé apresenta husi ministériu sira la involve jogu online.

“Ha’u hanoin iha orsamentu jerál Estadu kada tinan, relatóriu ne’ebé maka Ministériu Turizmu no Ambiente apresenta la hatudu dados reseita domestikas sa’e signifikativamente, husi parte jogus online, laiha no la iha liu esperansa, reseita domestikas ne’ebé ita kada tinan seidauk konsege alkansa to’o millaun $250,” Deputada Maria Angelin Lopes Sarmento hateten.

Deputadu ne’e argumenta katak jogu online ne’e legal maka liuhosi dalan ne’ebé registu iha SERVE,I.P, registu iha instituisaun governu nian, maibé jogu sira ne’e mós la kontribui signifikativamente ba hasa’e reseita domestika no kria kampu traballu.

Iha fatin hanesan, membru PN husi  Bankada FRETELIN, David Dias Ximenes “Mandati” hateten, hanesan opozisaun bainhira sira aprezenta problema ida-ne’e, maibé Governu rasik la iha prioridade bá  kestaun ida-ne’e.

Nia subliña Parlamentu Nasionál sempre halo fiskalizasaun bá atividade komersiál sira ne’e no konsidera Timor-Leste iha hela risku no injustisa nia laran, tanba atividade jogu online ne’e bele hamosu mós esplorasaun, naok ka korrupsaun no mós krime sira seluk ne’ebé dalaruma ema la konsiente maibé ida ne’e akontese.

“Jogu online no la’ós online nian ne’ebé Governu legaliza ne’e kontribui ba reseita Estadu ka atu hanesan atividade lavargem dinheiro ka fase osan, no la iha vantajen bá estadu ka governu, no Timor-Leste iha hela faze injustisa nia laran, presiza haree id- ne’e, atu evita krime organizadu sira seluk mosu liu husi jogu sira-ne’e,” Deputadu  David “Mndati” hateten.

Bankada opozisaun  sira mós kontínua husu ba Governu atu halo kontrolu ida rigór no tetu hikas lisensa bá operasaun jogu online iha Timor-Leste, atu nune’e, asegura Timor-Leste livre husi tráfiku umanu, esplorasaun no krime sira seluk ne’ebé afeita ba sidadaun sira.

Iha sorin seluk  Rafa.tl mós tenta halo konfirmasaun ho deputadu husi Bankada Governu, husi Bankada  Partidu Kongresu Nasionál Rekonstrusaun  Timorense (CNRT) ho Partidu Demokrátiku (PD), maibé sira seidauk bele fo komentáriu ruma tanba seidauk iha koñesimentu natoon relasiona ho operasaun jogu online iha Timor-Leste.

Reportajen ekipa Rafa.tl