Horta-Xanana Husu Bá Joven Sira Estuda ho Seriedade

Prezidente Repúblika, José Ramos-Horta. Imajen/Rafa.tl

DILI, RAFA.tl –Preizdente Repúblika, José Ramos-Horta no Primeiru-Ministru Kay Rala Xanana Gusmão, husu ba joven Timoroan sira nu’udár jerasuan foun tenke haka’ás aan estuda tanba futuru Timor-Leste iha joven sira-nia liman.

Ramos-Horta ho Xanana Gusmão afirma iha sira-nia mensajen bainhira sai oradór xave iha semináriu nasionál ho tema: Papel Jerasaun Foun iha Kontestu Dezenvolvimentu Nasionál hodi Hatutan Obra Jerasaun Tuan, ne’ebé hala’o iha Palásiu Prezidensiál, Tersa (02/09/2025).

José Ramos Horta hateten, papél fundamentu juventude mak tenke  estuda  ho seriedade, hodi  hatutan obrá jersaun tuan sira-nian.  Tanba ne’e, Horta  tenik tan, estuda la’ós de’it atu hetan diploma formalidade, maibé atu hetan kualidade no koñesimentu kle’an.

Tuir Ramos-Horta nia afirmasaun katak inan-aman barak sakrifika osan no kosar  tau sira nia-oan iha eskola, tanba ne’e estudante tenke valoriza oportunidade edukasaun.

“Sé família simples iha aldeia, oan ida hetan lisensiatura, orgullu bá aldeia tomak. Ida ne’e tenke  hanoin didi’ak,” Ramos-Horta afirma.

Laureadu Nobel  ba Pás 1996 ne’e fundamenta katak hadau  diploma la de’it  sei útil  sé bainhira  laiha akompañamentu  ho koñesimentu katak sé hetan kargu  hanesan governu, deputadu, profesór ka setor privadu, maibé la hatene, entaun nasaun la hetan benefísiu.

Prezidente Repúblika  husu bá  juventude hodi prepara estafeta lideransa. Tanba problema la’ós figura ida Prezidente Repúblika ka Primeiru-Ministru de’it. Iha nivel ministeriál, diretór jerál no teknókrata sira mak lori estadu loron-loron.

Iha fatin hanesan oradór prinsipál bá semináriu nasionál ne’e,  Primeiru-Ministru Kay Rala Xanana Gusmão, subliña jerasaun foun tenke iha konsiénsia klaru kona-bá dezenvolvimentu nasionál, labele hanoin de’it bá oportunidade funsionáriu, maibé fó kontribuisaun boot bá rai ida-ne’e.

“Jerasaun foun tenke hatene katak demokrásia fó poder bá povu, labele buka de’it postu ka servisu, maibé kontribui bá dezenvolvimentu nasional. Se la iha vizaun futuru, entaun la bele halo buat ida,” Xanana afirma.

Xanana apela  mós bá universidade no sosiedade sivíl  provoka diskusaun atu fó esperiénsia, troka hanoin no estimula juventude hodi analizé saída maka rai ne’e presiza iha future tanba dezenvolvimentu sei  la la’o bainhira  mentalidade jerasaun foun seidauk muda.

Iha semináriu ne’e mós,  PM Xanana husu  bá Prezidente Autoridade Munisípal  sira tenke hadomi povu no tau-matan ba povu nia nesesidade, halo konsulta no prepara programa ne’ebé responde bá povu nian.

“Labele husik ema seluk iha kotuk, maibé servisu didi’ak hodi povu konfia,” Xanana hateten tan.

Reportajen Ekipa Rafa.tl