Esperança Timor Oan ho Embaixada Japaun Apoiu Sentru HALIKU Tau-Matan Bá Feto-Maluk Sira Ne’ebé Sofre Kankru

Diretór Ezekutivu Empreza ETO grupu, Nilton Telmo Gusmão dos Santos apoiu Sentru HALIKU nu'udár fatin ne’ebé fó esperansa bá ema vulneravél sira ne’ebè maka moras kankru. Imajen/Rafa/tl

DILI, RAFA.tl– Empreza nasionál Esperança Timor Oan (ETO) hamutuk ho Embaixada Japaun iha Timor-Leste no Fundasaun Alola, liuhosi sentru Ha’u Hili atu Kura (HALIKU)  iha kompromisu atu apóiu Timor oan sira ne’ebé sofre moras kankru.

Sentru HALIKU inísia husi Fundasaun Alola rasik no hetan doasaun husi  doador Embaixada Japaun  no  empreza grupu  Esperança Timor Oan (ETO) ho objetivu harii sentru ne’e atu halibur maluk sira no oferese apoiu no akomodasaun bá feto-maluk sira ne’ebé hala’o hela atendimentu no tratamentu bá moras kankru.  Sentru  HALIKU sei sai fatin ne’ebé  fó esperansa bá ema vulneravél sira ne’ebè maka moras kankru.

Iha serimónia inaugurasaun bá sentru HALIKU, Kuarta (04/09/2025), iha Mascarenhas, Dili, Prezidente Fundasaun Alola, Kirsty Sword Gusmão hateten, objetivu harii sentru HALIKU ne’e tanba bazeia bá esperiensia ne’ebé iha.

Kirsty Sword Gusmão haree katak feto barak maka iha Timor-Leste moras kankru, maibé la detekta no la hetan tratamentu no rezultadu ne’ebé sira iha hatudu katak feto barak mate iha sira-nia hela fatin, la iha asesu bá saúde no la iha asesu bá akonselamentu ne’ebé sira presiza.

“Ha’u deside atu transforma ha’u nia esperiensia ne’ebé negativu bá buat ida ne’ebé pozitivu, entaun ha’u harii grupu kiik-oan ida naran HALIKU no banhira ha’u fila mai Timor atu fó tulun  solidariedade bá malu no ha’u hamutuk ideia saida maka ami bele halo hodi tulun feto-maluk sira seluk,” Kirsty Sword Gusmão hateten.

Prezidente Fundasaun Alola  ne’e hatutan, ho ezistensia HALIKU ne’e oinsá atu eduka feto sira ne’ebé iha área rurál, karik durante tempu narok sofre moras ida-ne’e atu bele detekta no hetan diagnosis ho fasilidade saúde ne’ebé iha.

Iha fatin hanesan, na’in bá empreza grupu  Esperança Timor Oan (ETO), Nilton Telmo Gusmão dos Santos, iha nia diskursu hateten, projetu HALIKU la’ós deit programa ordináriu, projetu ida-ne’e iha valor extraordináriu tanba hatudu solidariedade no kompromisu boot atu tulun komunidade sira ne’ebé nesesita tulun.

Nilton Telmo Gusmão dos Santos, afirma iha Timor-Leste ne’ebé dezáfiu sei boot no vulnerabilidade barak, HALIKU mai hanesan resposta ne’ebé fó esperansa, fó dignidade no fó biban foun bá feton no inan maluk Timor oan.

Nia esklarese katak envolvimentu ETO iha projetu HALIKU ida-ne’e, konsidera nu’udár parte responsabilidade sosiál empreza nian, tanba ETO fiar katak, progresu ekonomiku la kompletu bainhira mak la akompaña mós ho kontribuisaun substantivu bá dezenvolvimentu sosiál.

Nilton afirma empreza Esperança Timor Oan, sei la kontribui deit ba konstrusaun maibé sei kontinua atu apoiu atvidade tomak ne’ebé maka HALIKU presiza, ETO sei apoiu totál.

“Ami orgullu tebes bele hola parte iha projetu Fundasaun Alola iha ezersísiu misaun nobre atu fó forsa, apoiu no dignidade ba inan feton no maluk feton sira iha Timor-Leste ne’ebe hasoru moras kankru. Hakarak mós afirma iha biban ida ne’e, empreza ETO sei la kontribui deit iha konstrusaun bá sentru ida-ne’e, maibé hanesan parte husi responsabilidade sosiál empreza nian, ami sei kontínua fó ami nia kontribuisaun atu mantein sentru Kankru Feto HALIKU iha nia atividades servisu praktiku, tanba servisu ida-ne’e sei simboliza esperansa bá ema hotu, liu-liu bá inan feton no maluk feton sira,” Nilton subliña.

Diretór Ezekutivu empreza ETO ne’e fó nia sinseru agradesimentu bá Fundasaun Alola tanba lideransa inspiradór no determinasaun forte atu halo diferensa real iha komunidade no lideransa ne’ebé la kole atu fó forsa bá feto Timor oan sira. Fó rekoñesimentu bá parseria sira hotu ne’ebé envolvidu, tanba hamutuk bele transforma vida ema sira ne’ebé hasoru difikuldade.

Tuir Nilton Telmo Gusmão dos Santos, projetu HALIKU hatudu katak, bainhira governu, organizasaun, setór privadu no komunidade hamutuk, bele kria mudansa ne’ebé boot liu husi tulun sira bele harede hetan esperansa foun iha sosiedade sira ne’ebé karensiadu ka ne’ebé presiza tulun.

Iha fatin hanesan representante Embaixadór Japaun, Yuki Sakai hateten, projetu ne’e hetan finanseiru husi governu no povu Japaun no implementa husi fundasaun Alola.

“Sentru ida-ne’e sei fornese konsulta no ambiente seguru bá pasienre kankru feto sira no sira nia família,” Yuki Sakai esplika.

Biban ne’e, Vise-Primeiru-Ministru no Ministru Koordenadór Asuntu Sosiál, no Ministru Dezenvolvimentu Rurál no Habitasaun Komunitária, Mariano Asanami Sabino hateten, hanesan entidade Governu apresia ho servisu Fundasaun Alola nian ne’ebé iha inisiativa  di’ak atu tulun feto Timor oan sira ho voluntariamente.

“Apresia tebes baáhotu-hotu ne’ebé maka kontribui para harii fatin ne’e, fatin ne’e importante tebes, naran HALIKU ne’e mós naran ho indetiku, tanba ne’e reprezenta maun-boot Primeiru-Ministru Xanana Gusmão, reprezenta governu, reprezenta ha’u nia aan, hakarak orgullu   ba Maun Nilton ho tiu Akam ne’ebé maka fó apoiu, liu-liu povu no Governu Japaun  ne’ebé fó apoiu sentru ida ne’e importante tebes bá ita,” Mariano Assanami Sabino hateten.

Segundu Vise-Primeiru-Ministru ne’e, deseza bá joven sira  atu hakruk no respeitu bá inan sira, tanba sira-nia esforsu atu salva oan ida nia vida iha situasaun difisil dalaruma sira tenke sofre moras oi-oin ho nu’une’e liuhosi  inan sira nia luta, sakrifísiu no sofrimentu oan sira tenke rekoñese no kontínua hatudu domin no umildade bá inan-feto sira.

Tuir relatóriu ne’ebé  aprezenta katak, sentru ida ne’e harii husi Fundasaun Alola ho total orsamentu US$124,680.00, ne’ebé mai husi fontes rua maka apoiu husi Governu Japaun nia liu husi projetu GGP ho montante orsammentu US$72,680.00, no kompleta husi apoiu orsamentu husi ETO ho montante US$52,000.00.

Prosesu konstrusaun edifisu HALIKU harii iha fulan-Outubru 2024 no remata iha fulan-Jullu 2025 husi  kompañia  kontraktor nasionál Rivio Construction.

Reportajen Ekipa Rafa.tl