Deskonfia Komete Krime Partisipasaun Ekonómia, CAC ho Polísia Halo Buska no Apreensaun Domisiliáriu Bá Emprezáriu Timoroan ida

CAC ho PNTL halo buska no apreensaun domisiliáriu ba emprezáriu Timoroan ida ho inisiál L, Tersa (26/08/2025). Imajen/Rafa.tl

 DILI, RAFA.tl- Komisaun Anti-Korrupsaun (CAC-sigla portugés) akompaña husi Polísia Nasionál Timor-Leste (PNTL), Diresaun Servisu Investigasaun Kriminál (DSIK) halo buska no apreensaun domisiliáriu ba emprezáriu Timoroan ida ho inisiál L tanba deskonfia komete krime fraude konstrusaun no partisipasaun ekonómia.

CAC ho  PNTL liuhusi DSIK, Tersa (26/08/2025), tuku 07.00 dadeer, Oras Timor-Leste, hala’o buska no apreensaun domisiliáriu ba emprezáriu Timoroan   ne’e hodi kumpre  mandadu  buska no apreesaun  husi Tribuál Judisiál Primeira Instánsia Dili (TJPID) nian ho Númeru Úniku Krimi (NUK) 0013/25.CACTL.

Advogadu privadu  Câncio Freitas ne’ebé fasilita asisténsia legal ba emprezáriu Timoroan ho insiál L ne’e , haktuir katak atuasaun CAC ho Polísia nian ne’e iha relasaun ho  krime ne’ebé parte sira importa nia kliente mak krime fraude konstrusaun no partisipasaun ekonomia.

“Ami seidauk hatene faktu ne’e oinsá no tanbasá mak buat sira ne’e akontese hodi halo CAC ho Polísia mai buska domisiliáriu tuir  mandadu Tribunál nian,” Advogadu Câncio Freitas hateten ba jornalista sira bainhira akompañia ekipa CAC ho Polísia halo atuasaun bá edifísiu emprezáriu Timoroan ne’e nian iha área balun iha Dili laran.

Nia hateten, investigasaun mak bele hatene loloos kazu saida mak nia kliente komete no bá prosesu ida-ne’e. Ho nune’e, Advodadu Timoroan ne’e husu atu akompañia nia prosesu atu bele iha klareza  bá nia kliente ne’e suspeitu ka arguido.

“Ita kumpre de’it mak buska domilisiáriu ne’ebé mak Tribunál notifika mai.  CAC ho Polísia sira mai halo nia servisu no arolla dokumentu sira iha relasaun ho mandadu Tribunál nian,”  Câncio Freitas hateten.

Remata tiha buska no apreensaun iha edífisiu empreza ne’e nian, ekipa CAC ho Polísia kontínua ho buska no aprrensaun bá emprezáriu L nia rezidénsia iha parte balu iha área Tibar nian.

“Hanesan sidadaun,  ita tenke  koopera no kontribui ba ita-nia dezenvolvimentu iha ita-nia rai laran,” Câncio Freitas  tenik.

Buska no apreesaun ne’e  ekipa  CAC  ho Polísia arolla dokumentu karreta ida husi emprezáriu ne’e nian, konta bankaria BNCTL kompañia nian, telemovel ho mós dokumentu balun.

Reportajen Ekipa Rafa.tl