Aitana F.C Kampiaun Segunda Divizaun, Hamutuk ho Santa Cruz F.C Promovidu Bá Primeira Divizaun

Klubu Aitana F.C kampiaun Segunda Divizaun, Liga Futeból Timor-Leste (LFTL) époka 2025. Foto/Rafa.tl

DILI, RAFA.tl—Klubu futeból Aitana F.C kampiaun Segunda Divizaun, Liga Futeból Timor-Leste (LFTL) époka 2025 hafoin iha jogu ikus empata ho nia adversáriu Santa Cruz F.C ho score 0-0.

Notísia Relevante: Karketu Dili FC Kampiaun Liga Timorense Époka 2025 iha Jornada da-Ualu

Ekipa Aitana F.C no Santa Cruz F.C termina jogu jornada ikus, Liga Futeból Timor-Leste segunda divizaun ho orgullu no ksolok, tanba ho rezultadu impata ne’ebé iha, halo klube rua ne’e promovidu no sei hola parte iha Primeira divizaun époka oin iha Liga Timorense.

Aitana F.C ne’ebé sai hanesan kampiaun ho pontus 13, husi jogu neen, antes ne’e joga ona iha Primeira Divizaun, maibé bá Santa Cruz F.C ida-ne’e hanesan orgullu tanba dezde 2016 Liga Futeból Timor-Leste sei iha Amadora, Santa Cruz F.C kompete ona, maibé sempre falla atu promovidu bá primeira divizaun, hafoin dekade ida, ikus mai Santa Cruz F.C promovidu ho orgullu tanba husi jogu sira Segunda Divizaun époka ne’e,  Santa Cruz F.C rekolla pontus 12 husi jogu neen, iha ne’ebé Santa Cruz F.C rekolla vitória tolu no empata tolu, ho rekor nunka derrota iha époka ida-ne’e.

Iha jogu ekipa rua ne’ebé hala’o iha estádiu Munisípal Dili,  ekipa Aitana F.C no Santa Cruz F.C hahú jogu ho intensidade aas, maibé nafatin halo kontrolu másimu hodi asegura pontu sira tanba ho ambisaun hakarak promovidu bá primeira divizaun.

Iha jogu sira minutu dahuluk primeira parte nian, ekipa Aitana F.C ne’ebé lidera tabela klasifikasaun halo jogu ida nakloke, hodi dada atensaun husi Santa Cruz F.C, nune’e bele iha oportunidade hodi halo golu, maibé Santa Cruz F.C kontínua halo jogu ho kuidadu, atu nune’e, bele asegura pontu no hetan vitória.

Ekipa rua kontinua ho kontra atake bá malu, to’o primeira parte returning ekipa rua mantein ho score 0-0.

Tama bá segunda parte, ekipa Aitana F.C no Santa Cruz F.C kontínua mantein halo jogu ida atrativu no lansa kontra atake ba malu. Ekipa rua, koko halo subtituisaun ba liña jogadór ne’ebé iha no muda mós tatika maibé la iha golu ruma ne’ebé akontese.

Santa Cruz F.C ne’ebé iha ambisaun hakarak kudeta Aitana F.C iha tabela klasifikasaun hodi hadau kampiaun hodi halo kontra atake bá adversáriu, maibé falla iha ezekusaun ikus nune’e labele atu prodús golu ruma hodi hetan vitória.

Ekipa rua nafatin halo jogu ida diak no atrativu, too jogu termina, ekipa rua mantein ho score 0-0, no ho rezultadu ne’ebé iha, halo ekipa rua hetan hotu oportunidade atu promovidu bá primeira divizaun Liga Timorense époka oin.

Hafoin jogu, Prezidente LFTL, Ipolito Soares ba jornalista sira iha estádiu munisípal Dili,  Domingu (31/08/2025) hato’o parabens bá ekipa rua ne’ebé hala’o jogu ikus bá segunda divizaun ho di’ak no susesu.

“Parabéns bá Aitana F.C ne’ebé kampiaun no bá Santa Cruz F.C ne’ebé foin bá dala-uluk promovidu bá primeira divizaun,” Ipolito Soares hateten.

Treinadór Santa Cruz F.C, Miguel dos Santos hateten, iha jogu ikus ne’e, Santa Cruz F.C nia alvu mak tenke rekolla vitória ka  empata tanba ida-ne’e atu asegura ekipa nia pozisaun iha tabela klasifikasaun no promovidu bá primeira divizaun.

“Ha’u sente kontente tebes tanba primeiravéa Santa Cruz ultrapasa bá primeira divizaun, ha’u fó parabéns bá ha’u nia jogadór sira, tanba ho sira-nia esforsu maka’ás, atinji ami -nia mehi sai bá oin,” Miguel dos Santos hateten.

Nia subliña bá epoka oin iha primeira divizaun, Santa Cruz F.C mós iha alvu rasik, la’ós bá primeira divizaun para halimar, maibé bá atu kompete no hatudu katak Santa Cruz F.C mós bele.

Nia argumenta mós katak, iha primeira divizaun époka oin, Santa Cruz F.C sei hadia di’ak liután nia ekipa, liu-liu iha jogadór nune’e bele  kontribui másimu bá klube no adeptu sira Santa Cruz F.C nian.

Reportajen ekipa Rafa.tl