Prokuradoria Jerál Repúblika Halo Destruisaun Ba Objetu Droga Kokaína Kilograma 2.094

Autoridade Timor-Leste halo destruisaun ba objetu droga iha HNGV, Dili, Segunda (17/11/2025). Imajen/Rafa.tl

DILI, RAFA.tl– Prokuradór Jerál Repúblika (PGR, sigla portugés), Nelson de Carvalho, akompaña husi Gabinete Kombate Korrupsaun ba Krime Organizadu hamutuk ho médiku sira, Polísia Nasionál Timor-Leste (PNTL), liu husi Diresaun Investigasaun Kriminál Nasionál (DIKN), Polísia Sientífika Investigasaun Kriminál (PCIC, siglá portugés),  Segunda (17/11/2025), halo destruisaun ba objetu droga kokaína kilograma 2.094 iha fatin lixu Médiku Ospitál Nasionál Guido Valdares (HNGV), Bidau-Dili.

Droga ho tipu kokaína importa husi sidadaun França ho naran Douwnlou Youn Han husi França mai Timor-Leste iha loron 24 Marsu 2025, no to’o iha Timor-Leste iha 28 Marsu 2025, liuhosi Ajénsia DHL no transporta husi Aviaun Citilink.

Hafoin sasán sira ne’e to’o Timor, iha loron  02 fulan-Abríl 2025, PNTL liu husi koperasaun Autoridade Alfándega halo pasa revista ba sasán sira ne’e no asegura kedas.

Prokuradór Jerál Repúblika, Nelson de Carvalho hateten, dadér ida ne’e atu halo destruisaun ba aprendidu objetu ne’ebé konsidera hanesan krime ne’ebé maka akontese iha 2025.

“Ha’u nia prezensa iha ne’e, hanesan parte ida ne’ebé husi Gabinete Kombate Korrupsaun ba Krime Organizadu nian, ne’ebé mak to’o ona iha faze ida ne’ebé ajuda no tulun husi ekipa sira ne’ebé dadaun iha ne’e, ohin loron, atu halo destruisaun ba objetu droga ne’ebé mak agora iha hela ita nia oin,” Prokuradór Jerál Repúblika, Nelson de Carvalho hateten iha fatin destruisaun lixu médikamentu iha HNGV.

Prokuradora ba Prosesu Kombate Korrupsaun ba Krime Organizadu, Lídia Soares aprofunda liután katak droga ne’e to’o mai ho tipu kokaína,  maibé depois tama laboratóriu iha konfirmasaun katak ninia kontamina tipu droga ne’ebé mak tama hela iha tabela lei droga nian númeru 2/2017, iha aneksu 2 alinea C, konsidera hanesan tipu droga.

“Destruisaun ne’e ho desizaun judisiál bazeia ba pedidu Ministériu Públiku nian, deklara a-favór ba Estadu, tanba sasán ne’e labele rai kleur, tenke halo destruisaun,” Prokuradora Lídia Soares esplika.

Nia subliña, droga tipu kokaína ne’e nia orijin ne’ebé seidauk mistura, kuandu aumenta tan folin sei karun liután. Uluk halo apreensaun kada kilograma  nia hetan osan US$100-liu.

Reportajen Ekipa Rafa.tl