Prezidente FIFA Gianni Infantino Sei Vizita Timor-Leste no Halo Lansamentu Ba Konstrusaun Estádiu Unidade Nasionál

Prezidente FIFA, Gianni Infantino ho Prezidente FFTL, Nilton Telmo dos Santos Gusmão. Imajen/Espesiál

DILI,RAFA.tl-Prezidente Federasaun Futeból Mundiál (FIFA, sigla inglés), Gianni Infantino sei vizita Timor-Leste iha fulan-Agustu, tinan ne’e, no halo lansamentu primeira pedra ba konstrusaun Estádiu Unidade Nasionál ne’ebé Federasaun Futeból Timor-Leste (FFTL) planeia atu konstrui iha tinan ne’e.

Notísia Relevante: Prezidente FFTL Promete Harii Kampu Futeból Dignu no Reabilita Estádiu Díli

Prezidente ezekutivu FFTL, Nilton Telmo Gusmão do Santos, ba jornalista sira iha City-8, Díli, Kinta (06/03/2026) informa, Governu ho FFTL sei esforsu hodi hetan rai, atu nune’e, iha fulan-Agustu, tinan ne’e, Prezidente FIFA Gianni Infantino, mak halo lansamentu primeira pedra ba konstrusaun referida.

Nia informa antes ne’e hamutuk ho Prezidente Repúblika José Ramos-Horta halo ona kontaktu  hodi konvida Prezidente FIFA atu vizita Timor-Leste iha Fulan-Agustu tinan ne’e.

“Ita sei iha komunikasaun nafatin atu bele hetan solusaun ruma ba rai, se la halo iha Tasi-Tolu tenke  halo iha fatin seluk karik. Governu mak tenke hatudu fatin ne’ebé atu ita  halo, maibé ami nia hakarak fulan-Agustu ne’e, ita tenke halo lansamentu primeira pedra ba estádiu foun, tanba Prezidente Repúblika mós fó ona konvite ba prezidente FIFA hamutuk ho ami, hakarak dehan prezidente FIFA  mai Timor, ami mós  komunika intensiva ho prezidente FIFA hakarak mai, depois kopa mundiál iha Amérika, Méxiko ho Kânada hotu,  nia laiha ajenda seluk ona no livre, nia sei mai ita-nia rai, mais nia mai hakarak halo lansamentu primeira pedra ba ita nia Estádiu foun,” Prezidente FFTL Nilton Telmo Gusmão dos Santos informa.

Prezidente Ezekutivu Federasaun ne’e argumenta, haré ba oin fulan-Agustu sei dook, fiar dehan sei halo, maibé husik ida-idak halo nia servisu, Ministériu Justisa (MJ), halo nia servisu, Ministériu Juventude, Desportu, Arte no Kultura (MJDAK), halo nia servisu, Ministériu Planeamentu Investimentu Estratéjiku (MPEI) halo nia servisu, FFTL mós halo nia servisu, mais fiar katak to’o iha nia loron sei lansa Estádiu ne’e.

Prezidente FFTL ne’e hatutan, Timor-Leste tenke iha Estádiu foun ida  ho kualidade, atu nune’e, bele fó espasu seguru ba sidadaun no adeptu futeból sira bainhira iha jogu nasionál no internasionál sira.

“Kona-bá estádiu tenke halo mais presiza rai, kona-bá rai Governu mak bele hatan ida ne’ebá, tanba rai responsabilidade Governu nian, maibé ami husu atu utiliza  rai hodi bele harí ka konstrui infraesturtura ida ne’ebé dignu liubá ita-nia sosiedade hadomi futeból sira atu bele asiste futeból,” Nia subliña.

Ba jornalista sira iha Parlamentu Nasionál, Kinta (05/06/2026), Ministru Joventude, Desportu, Arte  no Kultura (MJDAK), Nelio Isaac Sarmento, hateten  Governu sei buka rai livre seluk hodi kontinua halo konstrusaun Estádiu Futeból  Unidade Nasionál (indoor) ho padraun internasionál.

Kona-bá fasilidade desportu liuliu futeból nian, Ministru Nelio Isaac Sarmento hateten, parte Governu  la’o hela hodi identifika fatin balu, oinsá mak atu ajuda dezenvolve fasilidade sira ne’e.

Daudaun ne’e, Governu liu husi MJDAK entrega ona estádiu munisipál ba Federasaun  Futeból Timor-Leste (FFTL) tanba dehan katak FFTL iha orsamentu natón atu hadi’a.

Nia dehan kona-bá estádiu  foun iha Tasi-Tolu sei iha diferensa hanoin balu husi grupu sosidade sivíl no mós parte igreja nian, maibé Governu maibé nafatin buka meius husi rai balu ne’ebé sei livre nune’e bele kontinua konstrui halo kampu futeból  indoor tuir padraun internasionál

“Rai barak loos, ami identifika, maibé haree loos ida ne’ebé mak di’ak para labele inkomoda ema seluk,” Ministru MJDAK  Nelio Isaac Sarmento hateten.

Antese ne’e, Governu ho FFTL deside ona rai iha área Tasi-Tolu atu konstrui Estádiu Unidade Nasionál ho padraun internasionál, maibé iha negosiasaun ho Igreja, parte Igreja laiha desizaun, tanba konsidera fatin referida hanesan fatin relizioju no área protezida.

Reportajen ekipa Rafa.tl