Prezidente FFTL Promete Harii Kampu Futeból Dignu no Reabilita Estádiu Díli

Adeptu sira ho entusiazmu asiste jogu finál Taça da Liga FFTL, Sábadu (28/02/2026), iha Estádiu Munisipál Díli. Imajen/Rafa.tl

DILI, RAFA.tl- Prezidente Federasaun Futeból Timor-Leste (FFTL), Nilton Telmo Gusmão dos Santos, promete harii kampu futeból ne’ebé dignu, inklui reabilita Estádiu Munisipál Díli atu bele fó espasu seguru ba sidadaun no adeptu futeból sira bainhira iha jogu nasionál no internasionál sira.

Notísia Relevante: Emmanuel F.C Kampiaun Taça da Liga Hafoin Halakon Karketu Díli F.C ho Skor 1-0

Prezidente FFTL Nilton Telmo Gusmão dos Santos hato’o  nia kompromisu ne’e bainhira haré direita euforia no entusiazimu adeptu fútebol Timor-Leste asiste jogu finál Taça da Liga FFTL entre klube jigante Karketu Díli F.C hasoru Emmanuel F.C, Sábadu (28/02/2026).

“Ha’u iha komunikasaun ida di’ak tebes ho ita nia exelensia Ministru Desportu, Arte no Kultura, Nelio Isaac Sarmento, ita sei halo komunikasaun, atu nune’e, parte ne’ebé mak governu halo, governu halo, parte ne’ebé mak federasaun bele halo, federasaun mak halo, nune’e ita labele iha overlapping ba malu kona-bá infraesturtura. Ha’u fiar katak ho ambiente ida agora hanesan ita haré, ita bele haré atmosfera fibrante  ida hanesan ne’e, saida mak ita tenke halo, atu prepara kondisoens, ema hotu iha diretu atu mai asiste futeból ida tur iha fatin  ida, labele hamrik, labele tabele rede,” Nilton Telmo Gusmão dos Santos hateten

Hanesan prezidente FFTL, Nilton Telmo Gusmão dos Santos, ho haraik aan husu deskulpa ba adeptu sira hotu, maibé ida ne’e mak Timor nia realidade.

“Buat ne’ebé ita haré, ohin, motiva ha’u hanesan prezidente  FFTL no ha’u nia kolega sira  iha FFTL, ami sei halo posivel hotu atu komunika ho FIFA, AFC ho AFF, dehan katak ami presiza tulun, presiza apoiu, ami hakarak hadi’a estádiu ne’ebé apropriadu liu, atu ne’e, ema hotu bele asiste futeból,  no ha’u fiar futeból ida ohin ne’e sei hafasil liu para ita atu komunika ho sira,” Prezidente FFTL Nilton Telmo Gusmão dos Santos informa.

Prezidente ezekutivu FFTL ne’e hatutan,  fulan-Marsu no Abríl, tinan ne’e, sei halo reabilitasaun ba Estádiu Munisipál Díli, nunu’e atividade iha estádiu ne’e sei paradu no FFTL mós iha planu hakarak harii Estádiu ho kapasidade ne’ebé boot liu kompara ho estadiu munisipál Díli.

“Taça da Liga foin hotu, fulan ida no fulan rua ba oin ita sei organiza dokumentasaun para depois hahú halo konkursu no se mak manan bele hahú halo obra ona, que sertu  atividade atu halo iha kampu ida ne’e  ita sei para ona, nune’e bele hadi’a ita nia kampu Díli,” Nilton hateten.

Nilton klarifika sei iha empreza internasionál  ruma ne’ebé iha  interese tanba konkursu ne’e ba sira hotu, maibé FFTL nia preferensia no espera katak iha empreza nasionál ruma ho kondisaun bele manan obra ne’e hodi halo obra ne’e.

Iha fatin hanesan Ministru Joventude Desportu, Arte no Kultura, Nelio Isaac Sarmento, agradese ba Prezidente FFTL ne’ebé iha kompromisu hakarak hadia estádiu munisipál Díli no parte governu iha kompromisu atu  kontinua fasilita fatin ba atividade jogu sira tuir mai karik FFTL presiza.

“Ita boot sira haré daudaun antusiazmu populasaun iha ne’e, ita laiha espasu ne’ebé di’ak para ema mai asiste, ita  agradese  FFTL halo up-date ba estádiu ne’e, para ema bele tama , maibe ne’e mós seidauk to’o tanba presiza fatin ne’ebé diak atu akomoda adeptu sira asiste sira nia ekipa favoritu joga.

Iha tinan ne’e nia laran  FFTL mós prepara ona orsamentu balu atu harii kampu futeból iha Munisípiu Aileu no Liquiça,  no kria môs kampu futsal ba Munisípiu Lautem, Viqueque no Ainaro.

Reportajen Ekipa Rafa.tl