Polísia Sei Entrega Motórizada 72 Ba Patrimóniu Estadu Atu Halo Leilaun Ba Públiku

Motórizada hamutuk 72 asegura hela iha Komandu Polísia Munisípiu Dili tanba komete infrasaun no la iha dokumentu. Imajen/Rafa.tl

DILI, RAFA.tl– Polísia Nasionál Timor-Leste (PNTL) Munisípiu Dili halo ona identifikasaun ba motórizada hamutuk 72 ne’ebé komete infrasaun no dokumentu laiha, atu  oferese ba Patrimóniu Estadu hodi halo lelaun ba públiku.

Komandante PNTL Munisípiu Dili, Superintendente Xefe Polísia Orlando Gomes, ba jornalista sira iha Eskuadra Polísia Dom Aleixo, Dili, Tersa (02/12/2025), informa Polísia identifika ona motórizada hamutuk 72 ne’ebé mak halo infrasaun no dokumentus la iha ne’ebé  liu ona loron 90, maka  na’in la ba kompleta dokumentu  sei entrega  ba PatrimóniuEestadu atu halo prosesu lelaun.

“Komandu Polísia Munisípiu Dili liu husi Seksaun Tránzitu Rodoviáriu prende motórizada sira ne’ebé mak halo infrasaun no dokumentu la iha, kuaze  identifika ona motór sira ne’ebé mak  atu prosesa ba iha lelaun,” Superintendente Xefe Polísia Orlando Gomes hateten.

Komandante Polísia Munisípiu Dili ne’e afirma, motór 72 ne’e identifika ona katak sira balun komete infrasaun, la iha dokumentu no tuir lei katak liu ona loron 90  tenke prosesa ona ba lelaun. Tanba ne’e, Seksaun  Tránzitu Rodoviáriu halo komunikasaun ho Patrimóniu Estadu oinsá mak ninia prosesu serimónia entrega motór 72 ne’e ba Patrimóniu Estadu.

Motór 72 ne’e prende iha tinan 2025, tanba  komete infrasaun no balu dokumentu laiha. Enkuantu motór sira ne’ebé mak envolve iha krime ne’e asegura iha Komandu Polísia Munisípiu Dili hodi hein autorizasaun husi Ministériu Públiku (MP), basá liga ho kazu krime ninian.

Nia informa tan katak bainhira na’in ba motór trata dokumentu  kompletu lori mai aprezenta iha Polísia fó fali motór. Maibé, hein to’o loron 90, na’in la mai foti motór signifika motór ne’e prosesa ona ba iha lelaun.

“Komandu Munisípiu Díli hakarak apela ba ita nia sidadaun sira iha kapitál Dili katak, motór sira ne’ebé mak Polísia prende, ita-boot sira presiza aprezenta dokumentu, nune’e bele foti fali motór, mais kuandu ita prende ona mak liu ona  loron 90 la mai foti, motór ne’e sei prosesa ba iha lelaun,” Nia subliña.

Komandu Polísia Munisípiu Dili dau-daun ne’e, alista hotu ona motórizada sira, hafoin sei  koordena ho patrimóniu estadu mak entrega.

Reportajen ekipa Rafa.tl