Polísia Kaptura Joven Na’in-hitu Ne’ebé Sona Membru CSP Joselino Arcanjo Tomae iha Vila-Verde

Polísia halo kapturasaun ba suspeitu sira kazu sona membru CSP iha Vila-Verde, Kinta dadeer (20/11/2025). Imajen/Rafa.tl

DILI, RAFA.tl- Polísia Nasionál Timor-Leste (PNTL) kaptura joven na’in-hitu (7) tanba deskonfia envolve iha asaun sona kanek membru Korpu Seguransa Pesoál (CSP, sigla portugés), Ajente Prinsipal  Joselino Arcanjo Tomae iha Vila-verde, Dili, Kinta (20/11/2025), hale’u tuku 04:00 dadeer Otl.

Tuir informasaun ne’ebé Rafa.tl asesu katak, iha Kinta madrugada (20/11/2025), mosu dezintendimentu too hamosu konflitu entre joven sira  iha área Vila-Verde, ne’ebé rejulta joven balun sona kanek membru CSP Ajente Prinsipal  Joselino Arcanjo Tomae iha kakorok no evakua kedas ba iha Ospitál Nasionál Guido Valdares hodi halo tratamentu intensivu.

Komandante PNTL Munisípiu Dili, Superintendente Xefe Orlando Gomes, esplika kazu atake malu iha Vila-Verde hodi sona kanek membru CSP ne’e konsege kaptura ona joven na’in-hitu hodi asegura iha Komandu Polísia Díli.

“Iha Kinta ne’e, hale’u tuku 04:00 dadeer, mosu akontesimentu ida  iha Aldeia Lemo Rai, Suku Vila-Verde, grupu balun mak halo asaltu malu konsege sona membru CSP ida kanek, iha akontesimentu ne’e tanba iha ita-nia sidadaun realiza festa despedida ida atu ba Portugal ne’ebe festa ne’e ba família de’it, maibe ninia alin bolu tan nia maun-alin sira husi fatin seluk mai hamutuk depois konsumu tua entaun iha ne’ebá hamosu konflitu,” Komandante PNTL Munisípiu Dili, Superintendente Xefe Polísia Orlando Gomes ba Jornalista sira iha Komandu PNTL Munisípiu Dili.

Superintendente Xefe Polísia Orlando Gomes informa konflitu ne’e mosu parte seguransa husi Vera Kruz no forsa rejerva sira halo kedas atuasaun hodi netraliza situasauan iha  lokal krime, ne’ebe Polísia kaptura ka asegura joven na’in-hitu  lori mai ona iha Komandu PNTL Munisípiu Dili hodi halo identifikasaun.

Polísia nafatin buka tuir tan suspeitu sira seluk ne’ebe involve iha konfrontu ne’e, nune’e hodi submete ba prosesu investigasaun.

Superintendente Xefe Polísia Orlando Gomes  klarifika katak  suspeitu na’in-hitu sei halo detensaun durante oras 12, hodi halo prosesu inevstigasaun molok submete ba Ministeriu Publiku hodi halo prosesu.

Reportajen Ekipa Rafa.tl