PNTL-SNI Asegura Involku ho Projetíl Bidon 36 iha Kontentór Ida Nia Laran

Ekipa konjunta PNTL-SNI, Sesta (10/10/2025), asegura projetíl ho involku iha kontentór ida nia laran iha armazén ida iha Tibar. Imajen/Espesiál

DILI, RAFA.tl—Ekipa konjunta Polísia Nasionál Timor-Leste (PNTL), kompostu husi Forsa Polísia (FP), Departamentu Servisu Investigasaun Kriminál (DSIC), Servisu Nasionál Intelijénsia (SNI) ho Makikit, Sesta (10/10/2025), hale’u tuku 15:30 Otl, halo identifikasaun no asegura objetu ilegál hanesan involku ho projétil hamutuk bidon 36 iha kontentór ida nia laran.

Informasaun ne’ebé Rafa.tl asesu husi fonte autoridade servisu sekreta  haktuir objetu ilegál sira-ne’e ekipa konjunta PNTL ho SNI identifika no asegura iha armazén empreza lokal ida nian iha  Aldeia Tuur Leu, Suku Tibar, Postu Administrativu Bazartete, Munisípiu Liquiça.

Ekipa konjunta PNTL-SNI hetan informasaun katak sasan refere mai husi Estadus Unidus Amérika, tula iha ró tranzit iha Singapura to’o mai iha Portu Tibar iha loron 07 fulan-Outubru ne’e, hale’u tuku 14:30 Otl, hafoin hala’o pasarevista, iha Sesta,10 fulan-Outubru ne’e, tuku 10:00 dadeer Otl, kontínua transporta ba iha armazén empreza nasionál nian ida iha Tibar.

Iha tuku 15:30 Otl, ekipa sira halo planu ba kedas iha armazén Tibar hodi halo buska no hasoru  responsavel ba sasan iha kontentór ne’e  nia laran ho inisiál KHS nu’udár sidadaun estranjeiru ho nasionalidade Malázia ho mós LYX ho nasionalidade Xina.

Emprezariu estranjeiru ho nasionalidade Malázia ne’e relata ba ekipa konjunta PNTL-SNI  katak sasan iha kontentór nia laran ba tau iha armazén empreza nasionál ne’e nian tanba hanesan parseiru.

KHS  haktuir ba ekipa katak involku inklui projetíl atu prodús ba alumíniu (Tenbaga)  modelu Block kor Mean no Mutin. Iha tinan kotuk, sira iha mákina ida atu prodús, maibé la konsege tanba mákina avaria,

Tuir relatóriu ne’ebé ekipa konjunta PNTL ho SNI nian katak  iha fulan-Novembru nia laran mákina foun sei mai hodi koko  prodús  alumíniu (aluminium/tenbaga).

 Tuir planu bainhira koko  prodús alumíniu hatudu rezultadu di’ak, sei rekruta mós timor-oan  na’in-30 hodi servisu  iha nia kompañia. Produsaun alumíniu ne’e sei importa fali ba Xina inklui Nasaun seluk.

Iha terrenu ekipa konjunta PNTL-SNI identifika mós traballadór timor-oan ida ho inisiál NJS haktuir katak, nia simu orientasaun husi sasan na’in  ho inisiál KHS sobu sasan iha kontentór laran muda tama ba iha armazén laran.

Hanesan baibain, NJS sobu sasan hanoin besi sokata (besi tua) sira, maibé bainhira haree fali projetíl no involku sira-ne’e, nia mós hakfodak no halo nia mós tauk.

Ekipa konjunta PNTL-SNI to’o iha fatin hodi halo pasarevista, identifika sasan iha armazén laran, mak hanesan, involku projetíl tipe Glok, arma pejadas nia projetíl ho involku.

Reportajen Ekipa Rafa.tl