PNTL Manatuto Prontu Asegura Investimentu Parque Industriál ETO

Serimonia hatur fatuk-inan ba investimentu parque industiál empreza grupu ETO iha Manatuto, Segunda (30/03/2026).

MANATUTO, RAFA.tl– Polísia Nasionál Timor-Leste (PNTL) Munisípiu Manatuto, prontu asegura investimentu  hotu-hotu ne’ebé harii iha área jurizdisaun Manatuto, inklui investimentu boot parque industriál Esperança Timor Oan (ETO) nian.

Notísia Relevante: Investimentu Parque Industriál ETO iha Manatuto Tulun Hasa’e Kresimentu Ekonómiku Timor-Leste

Komandante  PNTL Munisípiu Manatuto, Superintendente Polísia Domingos Gregório Soares, hateten Parque Industriál grupu empreza ETO nian ne’ebé la’ós de’it hanesan negosiu maibé fó oportunidade servisu ba joven Manatuto oan entre na’in-500 to’o na’in-700 tenke garante ambiente ida seguru.

“Investimentu parque industriál grupu ETO nian besik loos iha Kuartal PNTL Manatuto no Manatuto oan hotu, liuliu autoridade seguran iha knar atu kria ambiente ida seguru ba investimentu ho nia impaktu ekonómiku ne’ebé bele ajuda kreismentu ekonomia familia sira iha Manatuto,”  Superintendente Polísia Domingos Gregório Soares hateten ba Rafa.tl iha ámbitu serimonia hatuur fatuk-inan ba invesitmentu parque industriál ETO iha iha Suku Aiteas, Postu Administrativu Manatuto Vila, Munisípiu Manatuto, Segunda (30/03/2026).

Superintendente Polísia ne’e informa katak parte seguransa liu husi Komandu PNTL Munisípiu Manatuto sei nafatin halo kordenasaaun ho autoreidade lokál hanesan Xefe Suku, Xefe Joventude no mós Konsellu Polisiamentu Komunitáriu sira iha suku refere, nune’e bele apoiu seguransa ba projetu sira ne’ebe halo iha Suku Aiteas.

Projetu investimentu ETO nian iha Parque Industriál Manatuto ne’e reprezenta investimentu entre millaun 13 to’o millaun 15 dolar amérikanu.

Durante faze konstrusaun, estimasaun hatudu katak sei kria postu servisu  entre 150 to’o 200 ho previzaun atu remata iha fulan-Agostu tinan oin.

Iha faze operasaun fabrika sira, prevé kria empregu ba jovens entre  na’in-600 to’o na’in- 700 direta no besik na’in-1.300 empregu indiretu.

Projetu ne’ebé ETO promove  ho apoiu Autoridade Munisipál Manatuto, inklui instalasaun unidade industriál lima, hanesan fabrika produsaun kaixa no fabrika estrutura metáliku H-Beam. Iha parque industriál ne’e sei harí mós fabrika prosesamentu sardina enlatada, matadouro no industria prosesamentu na’an, no fabrika benefisiamentu háre.

Komandante  PNTL Munisípiu Manatuto, Superintendente Polísia Domingos Gregório Soares husu ba komunidade atu kontinua koopera ho polísia, liu-liu iha fó informasaun bainhira iha indikasaun ba aktu balun ne’ebé bele ameasa estabilidade iha área investimentu nian.

Nia fiar katak ho maturidade Manatuto oan sira-nian bele fó esperansa ba invetór sira mai kuda sira-nia osan iha Manatuto hodi bele ajuda absorve empregu ba Manatuto oan no bele kontribui direta ba kresimentu ekonomia komunidade Manatuto.

Reportajen ekipa Rafa.tl