PNTL ho F-FDTL Sei Hala’o Patrullamentu Másimu iha Liña Fronteira Hodi Evita Movimentu Ilegál

porta-voz Interinu Komandu Jerál PNTL, Superintendente Asistente Mouzinho T. Correia (klaran) halo konferénsia imprensa iha salaun Ministériu Interiór, Dili, Kinta (13/11/2025). Imajen/Rafa.tl

DILI, RAFA.tl – Porta-voz Interinu Komandu Jerál Polísia Nasionál Timor-Leste (PNTL), Superintendente Asistente Polísia Mouzinho T. Correia, Kinta (13/11/2025), informa, dau-daun ne’e ekipa konjunta kompostu husi PNTL ho FALINTIL-Forsa Defesa Timor-Leste (F-FDTL) hamutuk ho Polísia Unidade Patrullamentu Fronteira, Servisu Migrasaun sei intensifika operasaun no patrullamentu iha liña fronteira sira hodi evita movimentu ilegál sira.

Notísia Relevante: Kazu Dirijente SNI Hatama Fugetes ho Karreta Estadu Submete Ona Ba Ministériu Públiku

“Seguransa la’o nafatin, mézmu situasaun agora udan, iha fatin sira ne’ebé ita-nia forsa labele asesu, maibé servisu la’o nafatin, dalaruma sira tenke la’o kilómetru rua to’o tolu, hodi halo patrullamentu, ida ne’e parte ida hodi fó presaun ba ema sira ne’ebé gosta tama-sai illegal,” porta-voz Interinu Komandu Jerál PNTL, Superintendente Asistente Mouzinho T. Correia ba jornalista sira iha sala Ministériu Interiór, Vila-Verde, Dili.

Porta-voz ne’e hatutan, dau-daun ne’e ekipa konjunta PNTL ho F-FDTL ho ekipa sekreta halo kontrolu maka’ás iha liña fronteira, tanba atu tama ona ba Natal no tinan foun 2026 ne’e sasán kontra bandu sei tama ho ilegál.

“Ema sira tama ne’e legál maibé sasán sira ne’e hatama ilegalmente liu husi ema sira servisu iha fronteira ne’ebá. Tanba ne’e servisu Migrasaun labele detekta, tanba sira liu husi dalan ilegál. Ida-ne’e servisu boot ba PNTL atu halo nusa bele evita, natal besik ona, ha’u fiar sasán sira ne’e tenta atu tama liu-liu fugetes sira ne’e,” Superintendente Asistente Mouzinho T. Correia hateten.

Antes  ne’e, ekipa konjunta kompostu husi PNTL ho F-FDTL halo operasaun pasa revista iha Liquiça vila, detekta hodi prende fugetes ilegál ne’ebé hatama husi dirijente  Servisu Nasionál Intelijénsia na’in-rua ho inisiál OCG no AJDRX, ne’ebé  ho kareta estadu iha área Liquiça Vila foin lalais ne’e no entrega ona ba komandu PNTL Munisípiu Liquiça.

Komandante PNTL Munisípiu Liquiça, Superintendente Polísia Calisto Gonzaga, Kuarta (12/11/2025) hateten, kazu dirijente SNI na’in-rua ne’ebé lori sasán kontra bandu iha kareta estadu submete ona ba Ministériu Públiku hodi prosesa tuir lei.

 Reportajen ekipa Rafa.tl