PNTL Halo Buska no Apreensaun Ba Operadór Jogu Online Rua iha Dili no Detein Sidadaun Estranjeiru na’in-10

Polísia detein sidadaun estranjeiru sira ne'ebé envolve iha jogu online iha Dili, Kinta-kalan (09/10/2025). Imajen/Rafa.tl

DILI, RAFA.tl- Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) hamutuk ho Polísia Eskuadra Dom Aleixo, Kinta (09/10/2025), hale’u  tuku 23:30 Otl, halo  buska no apreensaun ba operadór  jogu online rua ida Dili laran, mak hanesan ida iha Zita Plaza-Aimutin ho  ida seluk iha Colmera.

Iha asaun buska no apreensaun ne’e, Polísia  detein sidadaun estranjeiru na’in-10, inklui rekolla evidénsia sira balu hanesan telemovel, sim card operadór telekomunikasaun balun no dokumentu importante seluk tan.

Iha operasaun ne’e,  PNTL  fahe ba ekipa rua konsege hetan no identifika sidadaun estranjeiru na’in-10 ho traballadór timoroan feto no mane kuaze na’in-40 ho evidénsia sira hodi transporta kedas ba edifísiu Diresaun Servisu Investigasaun Kriminál (DSIK) iha Kuartel Jerál PNTL.

Iha prosesu identifikasaun, sidadaun estranjeiru na’in-10  kumpre detensaun durante oras 72 iha sela Polísia hodi hein prosesu iha Ministériu Públiku, no Timoroan sira hanesan traballadór haruka fila ba idaidak nia uma hodi hein prosesu tuir mai.

Sidadaun estranjeiru na’in-10 ne’e, kompostu husi na’in-neen (6) hanesan resposavel ba jogu online iha Zita Plaza ne’ebé notifika ho Númeru Uniku Krime (NUK), 0323/2025/PNSIC no na’in-haat (4) seluk responsabel ba jogu online iha área Colmera ho notifikasaun  Númeru Uniku Krime (NUK), 0324/2025/PNSIC.

Iha indentifikasaun ne’e, Timoroan sira hanesan traballadór kuaze na’in-40 ne’e, Polísia halo deit identifikasaun naran, hafoin ne’e liberta no haruka sira fila ba ida-idak nia uma hodi hein prosesu investigasaun.

Fó hanoin fali katak iha Kuarta, 10 fulan-Outubru tinan 2025, IX Governu  Konstitusionál liuhosi Reuniaun Konsellu Ministru, deside taka  jogu aposta iha online  ne’ebé  rejistu iha Timor-Leste.

Rezolusaun Governu nian ne’e mós determina kanselamentu prosedimentu lisensiamentu sira ne’ebé la’o hela no bandu lisénsa foun sira ba tipu atividade jogu online, tanba haree ba risku sira ne’ebé identifika ona bá nasaun nia seguransa, estabilidade sosiál, integridade ekonómika no reputasaun internasionál.

Ministériu tutela, hamutuk ho forsa seguransa sira, sei tau matan bá implementasaun medida sira ne’ebé aprova ona hosi Rezolusaun Governu ida-ne’e.

Diploma ne’e mós estabelese revizaun bá lejizlasaun aplikavel, liuliu dekretu-Lei n. 6/2016, loron 20 fulan-abríl, ne’ebé regula setór ne’e.

Reportajen ekipa Rafa.tl