PNTL Hahú Halo Operasaun La’o Ain Hodi Alerta Ba Joven sira Labele Distúrbiu Orden Públiku

Ekipa konjunta PNTL Munisípiu Dili hahú halo operasaun iha tempu kalan atu evita perturbasaun ba orden públika. Imajen/Rafa.tl

DILI, RAFA.tl– Polísia Nasionál Timor-Leste (PNTL) Munisípiu Díli, hahú halo operasaun la’o ain tama-sai bairru sira iha tempu kalan no alerta ba komunidade sira, liu-liu joven atu labele halo distúrbiu ba orden públiku hodi prejudika seguransa komunidade sira nian.

Komandante PNTL Munisípiu Dili, Superintendente Xefe Orlando Gomes, ba jornalista sira iha Komandu PNTL Dili, Tersa (21/10/2025), alerta ba joven sira ne’ebé iha bairru laran atu hakmatek iha ida-idak nia uma, tanba ne’e ekipa seguransa PNTL  hala’o patrullamentu la’o ain tama-sai bairru iha tempu kalan hodi evita konflitu.

“Ita orienta ona ba ita nia forsa rezerva, Tránzitu, Task Force ho ofisiál Polísia halo formatura iha kalan, atu nune’e, ita iha preparativu ba seguransa iha kapital Dili, tanba ita hatene iha atividade no eventu boot ne’ebé sei mai hanesan loron matebian nian, no mós iha eventu importante seluk tanba ne’e mak ita halo patrullamentu la’o ain  tama-sai bairru  ne’ebé konsidera risku, nune’e hodi prevene krimi ne’ebé sempre mosu iha kalan,” Superintendente Xefe Polísia Orlando Gomes hateten.

Nia hatutan ekipa Polísia halo Patrullamentu la’o ain ne’e, hetan joven sira ne’ebé konsumu tua iha estrada ninin sei halo atuasaun no bainhira hetan grupu ka joven sira ne’ebé halibur malu iha estrada públiku no halo barullu sei kaptura, tanba ida ne’e konsidera  perturba orden públiku ne’ebé halo komunidade sira la seguru.

“Kalan-kalan ita sempre patrullamentu la’o ain no mós ho karreta, atu bele evita problema sira, ita la’o hetan grupu sira hemu tua iha estrada, ita sei halo kapturasaun, tanba ida-ne’e provoka situasaun bele estraga fali ema seluk nia sasán, no konsidera perturba orden públika. Atu hemu hakmatek iha uma, la’ós iha fatin públiku,” Komandante  PNTL Munisípiu Dili ne’e afirma.

Nia garante seguransa no sei asegura komunidade sira iha kapital Dili livre hala’o atividade no movimentu ba mai ho di’ak no seguru iha tempu kalan.

Reportajen ekipa Rafa.tl