PM Xanana Konkorda Halakon Totál Pensaun Vitalísia

Primeiru-Ministru (PM) Kay Rala Xanana Gusmão. Imajen/Rafa.tl

DILI, RAFA.tl– Primeiru-Ministru (PM), Kay Rala Xanana Gusmao, konkorda halakon  totál Lei Pensaun Mensál Vitalísia no ida-ne’e kompeténsia tomak iha Parlamentu Nasionál.

Notísia Relevante: Bankada Lima ho EUTL Asina Akordu Halakon Pensaun Vitalísia no Halo Revizaun Bá Lei Liberdade Reuniaun no Manifestasaun

Primeiru-Ministru (PM), Kay Rala Xanana Gusmão ba jornalista sira, hafoin remata enkontru ho ofisiál superiór sira Polísia Nasionál Timor-Leste (PNTL) iha Kuartel Jenerál PNTL, Tersa (23/09/2025) hateten, ba nia hamos pensaun mensal vitalisia ne’e bele deit, tanba povu fò fiar ba nia atu hadi’a povu nia moris, kurize no la’ós atu estraga povu nia osan.

“Ita bele hamoos totál, ha’u laiha problema, povu la husu mai ha’u atu simu osan, ha’u mai atu kurize hahalok aat ne’ebé estraga hotu povu nia osan,” Xanana Gusmão hateten.

Nia afirma atu halakon Pensaun Vitalísia ne’e Parlamentu nia kompeténsia, maibé Governu afirmu apoia atu halakon Pensaun Vitalísia.

“Lei ne’e ba Parlamentu. Ha’u la’ós membru Parlamentu tanba saida mak ha’u la apoia. Loron hirak liubá Prezidente Repúblika organiza seminár Nova Jerasaun ha’u ba ko’alia iha ne’ebá, ita-boot laiha ne’ebá ida, ha’u temi povu la’ós hili ha’u mai fali iha ne’e atu simu osan, povu hili mai atu kurize hahalok ladi’ak ne’ebé uluk soe hela mai,” Xanana subliña.

Líder Bankada Parlamentár lima (5) kompostu husi Bankada CNRT, FRETILIN, PLP, PD no KHUNTO hamutuk ho reprezentante Estudante Universitáriu Timor-Leste (EUTL), Kuarta (17/09/2025), asina ona akordu atu halakon pensaun mensal vitalísia no halo revizaun bá lei kona-bá liberdade reuniaun no manifestasaun nian.

Iha Sesta (19/09/2025), Bankada Parlamentár CNRT, PD ho KHUNTO, submete  projetu lei halakon totál pensaun vitalisia ho efeitu retoativu.

Efeitu retroativu iha ámbitu eliminasaun pensaun vitalísia ba eis-titulár sira, refere ba implementasaun regulamentu foun ne’ebé implementasaun regulamentu foun ne’ebé fó impaktu bá direitu no regalia ne’ebé eis-titulár sira hetan antes. Karik proposta Bankada CNRT, PD ho KHUNTO nian ne’ebé aprova iha PN no promulga husi Prezidente Repúblika, maka eliminasaun pensaun vitalísia ho implementasaun retroativu, eis-titulár órgaun  estadu sira ne’ebé antes ne’e simu ona pensaun bele hetan impaktu (la simu tan ona) inklui entrega hotu patrimoniu Estadu nian ne’ebé durante ne’e sira utiliza.

Parlamentu Nasionál liuhosi plenária extraórdinariu, Sesta (19/09/2025),  aprová ho unanimidade pedidu urjénsia bá projetu lei nú.10/VI (3a) Rejime Juridiku, Seguransa Sosiál, Titulares,  Orgaun Soberania ho votu á-favór 59 kontra zero no abstensaun zero.

Reportajen ekipa Rafa.tl