Páskua Tempu Atu Hafoun no Hametin Liután Domin Ba Maun-Alin Sira no Fiar Ba Maromak

Arsebispu Arkedioseze Metropolitana Díli, Dom Virgílio Cardeal do Carmo da Silva, SDB. Imajen/Rafa.tl

DÍLI, RAFA.tl– Páskua lori sentidu foun ba sarani Katólika sira, ho Jesus nia terus, mate no moris hias, halo ema atu hafoun no hametin liután domin ba maun-alin sira no fiar ba Maromak.

Notísia Relevante: Karta Pastorál Ba Páskua 2026, “Nia hadomi ninian sira to’o rohan” (Jo 13,1)

Arsebispu Arkedioseze Metropolitana Díli, Dom Virgílio  Cardeal do Carmo da Silva, SDB, iha nia mensajen Páskua ba sarani sira iha Pasu Episkopal, Lecidere, Kuarta (01/04/2026), hatete, furak oinsá selebra Páskua tanba kontinua sai fonte esperansa, fonte renovasaun iha mundu ida ne’ebé marka ho violénsia,  funu, konflitu,  indiferensa sira, egoizmu, fiar mihis, lakon fiar, inserteza no seluk tan.

Nia hatutan, Páskua oferese ba ema narasaun ida triunfante la’ós dezesperasaun. Sai hanesan “sinal Esperansa” ba ema barak, fó hanoin kona-bá transformasaun no hahú fali pájina foun iha moris.

“Ita selebra Páskua iha tempu udan-been barak halo ai sira furak no matak “sinal vida”, ambiente ne’e mós konvida ita atu hamatak no haburas liután, liu-liu “hahú moris foun” maski dala barak eziji sakrifísiu no esforsu pessoal,” Dom Virgílio do Cardeal Carmo da Silva, SDB hateten.

Arsebispu haktuir, tempu Páskua, eskola no instituisaun sira férias iha semana santa, liu-liu iha triúdu Páskua nian, férias la’ós atu rekupera de’it servisu ne’ebé ita la konsegue halo iha semana tomak, maibé férias Páskua iha konvite espesiál ida atu família sira halibur hamutuk, hanesan “Família Ebreu” sira nian, família eskolante sira ho Na’in  Feto iha Cenáculo.

Atu Páskua tinan ne’e sai biban Grasa nian, hodi hafoun hikas domin ba Maromak no ba maun-alin sira. Nune’e, Papa Leão XIV,  mós hato’o mensajen ba Bispu sira Timor nian iha mensajen Kuarezma no Páskua, husu hamamuk-aan atu rona Maromak Nia Futar Liafuan hodi habadak nanál no ko’alia sukat, nune’e bele sai manu-ain esperansa, paz no karidade.

“Konvite ida mai ita iha laron boot sira ita Na’i Jesus nia terus-mate no moris hias nian ne’e, di’ak mós oinsá família buka tempu ruma hamutuk halo orasaun, hateke ba Jesus iha Kruz. Kruz mak sasukat boot liu hotu. Maromak Nia domin mai ita. Harohan ba Maromak Oan ida ne’ebé ita adora, hanorin ita hadomi, haraik aan, pasiénsia, perdua no laran mos ”honesto” ba malu mak dalan ba moris foun. Nia de’it mak bele rekupera buat ne’ebé lakon tiha ona,” Tenik Dom Virgílio Cardeal.

Prezidente Konferénsia Episkopal Timorense  (CET) ne’e hatutan, Páskua nu’udar tempu furak ida atu hametin liu tan domin no fiar.

Hakarak tatoli espesiál ba foin-sa’e sira atu iha tempu Páskua ne’e buka fó netik tempu oituan ba Maromak, tempu juventude, idade ida ne’ebé importante liu hotu iha ema ida nia moris, Maromak hakarak tebes atu tama, maibé dala ruma ema rasik mak la fó fatin ba Nia.

Páskua ne’e keta haluha reza ba Paz iha Médiu Oriente, hanoin kona-bá labarik no foin-sa’e sira ne’ebé sai vítima ba funu ida ne’e, foin-sa’e doben sira mai no buka atu sai badaen na’in ba dame nian iha rai ne’e, nune’e mós iha mundu.

Reportajen ekipa Rafa.tl