Osan Millaun US$5 iha Proposta OJE 2026 Ba Pensaun Vitalísia Sei La Ezekuta

Xefe Unidade Komunikasaun Ministériu Finansas, Fernando M. Ribeiro. Imajen/Rafa.tl

RAFA.tl– Xefe Unidade Komunikasaun Ministériu Finansas, Fernando M. Ribeiro, Sábadu (04/10/2025), informa osan millaun US$5 iha proposta Orsamentu Jerál Estadu (OJE) 2026 ba pensaun vitalísia sei la ezekuta  no realoka fali ba fundu estadu.

Notísia Relevante: Prezidente Repúblika Promulga Lei Halakon Totál Pensaun Vitalisia ho Efeitu Retroativu

Liuhosi  konférensia imprensa iha edifísiu Ministériu Finansas, Dili, Fernando M. Ribeiro, esplika iha loron 29 fulan-Setembru 2025, Prezidente Repúblika, José Ramos-Horta promulga revogasaun formál ba Lei Pensaun Mensál Deputadu sira-nian no lei ne’ebé aprova Estatutu Titulár Órgaun Soberanu sira-nian. Ho revogasaun ne`e, laiha ona baze legál atu halo pagamentu tuir diploma revogadu sira ne’e.

Ministériu Finansas garante ba populasaun katak osan sira ne’e sei la uza ba objetivu sira ne’ebé prevé ona antes. Hanesan determina hosi lejislasaun ne’ebé vigora.

“Governu bele gasta rekursu públiku bainhira iha baze legál esplísita ne’ebé fó dalan. Iha kazu ida-ne’e, baze legál ne’ebá la eziste ona hafoin revogasaun hosi lei respetiva sira,” Fernando M. Ribeiro hateten.

Revogasaun ne’e foin aprova hafoin Governu finaliza tiha ona projetu Orsamentu Jerál Estadu tinan 2026. Tanba ne’e, projetu OJE sei inklui nafatin hela liña ida ne’ebé dedika ba programa pensaun vitalísia. Maibé, tanba lei revoga tiha ona, agora ne’e kabe ba Parlamentu atu análize no deside iha debate orsamentu atu oinsá  realoka fila-fali fundu ida ne’e.

Ministériu Finansas subliña  Governu laiha intensaun atu mantein ka halo nafatin pagamentu tanba lei revoga tiha ona. Nune’e, rumór sira kona-ba utilizasaun verba ida ne’e hodi uza nafatin ba objetivu pagamentu pensaun vitalísia ne’e la loos.

Governu iha nafatin komprómisu atu jere finansas públika ho responsabilidade, transparente no sempre tuir lei.

Reportajen ekipa Rafa.tl