Opozisaun Preokupa ho Kazu Mal-Prátika iha Sentru Saúde Liquiça no Husu Hakle’an Investigasaun

Bebé ne'ebé simu vasina ran sai husi fatin vasina nian no ikus mai lakon vida. Imajen/Repro Facebook

DILI, RAFA.tl– Opozisaun iha Parlamentu Nasionál  liuhosi Bankada Partidu Libertasaun Popular (PLP) preokupa ho kazu mal-prátika iha Sentru Saúde Liquiça no husu atu Ministériu Saúde liuhosi Departamentu Dixiplinár tenke hakle’an investigasaun ida ho transparénsia no profesionál hodi hatene kauza lolós husi akontesimentu ne’ebé rezulta bebé ida lakon vida hafoin simu imunizasaun.

Notísia Relevante: MS Investiga Hela Kazu Deskonfia Mal-Prátika iha Sentru Saúde Liquiça To’o Bebé Ida Lakon Vida

“Hanesan reprezentante povu, ami preokupa teb-tebes, tanba ita bele to’o iha faze ida mal-prátika sira ne’ebé komete nafatin husi pesoal saúde sira, liu-liu tuir informasaun ne’ebé ami rona, komete husi pesoal saúde ne’ebé hanesan estajiaria ne’ebé maka seidauk iha vínkulu legál ho Ministériu Saúde hanesan traballadór ka pesoal saúde nian ne’ebé maka iha kontratu formal,” Deputada Maria Angelina Lopes Sarmento, ba jornalista sira iha Parlamentu Nasionál, Kuarta (05/11/2025).

Nia hatutan, kazu mal-prátika iha Sentru Saúde Liquiça tenke loke investigasaun hodi bele hatene lolós se mak autoriza estajiária sira ne’e halo tratamentu ba bebé ne’e to’o lakon vida.

PLP husu atu investiga mós dirijente sira iha Sentru Saúde Liquiça, atu bele hatene motivu lolós husi kazu mal-prátika ne’e.

Nia afirma tenke loke investigasaun atu hatene sé maka autoriza ema ne’e halo tratamentu ba alin oan ne’e to’o kauza mate no investiga diretór sira ne’ebé la iha Standar Prosedur Operasionál (SOP) ida klaru hodi autoriza katak ema hanesan estajiária ne’e ninia servisu maka A ka B ka C ka oinsá, atu estajiáru sira hatene katak nia limitasaun to’o iha ne’e.

Kona-ba kazu mal-pratika ne’e família mós iha kompeténsia hodi hato’o keixa iha tribunál hodi nune’e bele la’o tuir Justisa.

“Uluk kedas Parlamentu preokupa ho kazu sira ne’e, no bolu governu atu presta deklarasaun iha parlamentu maibé to’o agora Ministra Saúde la mosu iha Parlamentu Nasionál. Ami husu ba governu atu mai presta informasaun iha parlamentu mais imi haré ministra durante ne’e la mai, ne’ebé ita la hatene oinsá maka ita atu rezolve situasaun ida ne’e se maka iha poder atu rezolve ida ne’e Estadu ida ne’e la’o sabraut la iha sistema ida maka hakesi ema atu bele lidera di’ak no lolós,” Nia subliña.

Bankada Opozisaun mós kontinua preokupa ho problema falta ai-moruk ne’ebé kontinua sai preokupasaun komunidade sira nian no konsidera problema falta ai-moruk ida ne’e la’ós problema foun, maibé  ne’e hanesan kestaun ne’ebé susar atu rezolve iha tinan naruk nia laran.

Kestaun ida ne’e tuir lolós, Institutu Nasionál Farmasia no Produtu Médiku (INFPM), tenke toma responsabilidade ba fornesimentu ai-moruk, no dadus ba stoke ai-moruk ne’ebé sufisiente, maibé to’o agora INFPM rasik labele halo ida ne’e tanba orden husi superior dalaruma fó impaktu ba sira atu halo knaar ho lolós.

“Ministra ne’ebé lidera ministériu saúde ninia tempu tomak iha nia governasaun ne’e nia preokupa de’it maka nomeia ema no ezonera ema, entaun ema ne’ebé maka asume kargu diretór INFPM nia ba maibé kria hela situasaun inseguru ba nia tanba nia ta’uk hela desizaun sira ne’ebé maka ministra sei foti, entaun dalaruma fó impaktu ba ema sira ne’ebé maka halo nia servisu,” Deputada Maria Angelina Sarmento Lopes hateten.

Nia argumenta ho desizaun sira ne’ebé la seguru husi lideransa, fo impaktu ba sistema servisu saúde nian no la fo prioridade ba buat ne’ebé importante no ba interese públiku nian.

Hatán ba kestaun ne’e, Ministra Saúde, Elia  A.A  dos Reis Amaral argumenta katak, governu dadaun ne’e iha ona sistema dijitalizasaun atu bele halo kontrolu ba problema hirak ne’e.

“Ita halo ona sistema dijitalizasaun, sei integra ba iha barcode ne’e rasik, depois kontrolu ba ida ne’ebá, mais ha’u hanoin ita boot dehan pasiente sira falta ai-moruk, fatin iha ospitál la to’o, iha pasiente hira, fo hatete mai, tanba ami iha sentru reklamasaun atu nune’e ami bele hadi’a ami nia servisu,” Ministra Elia dos Reis Amaral hateten.

Governante ne’e mós husu ba pasiente sira karik enfrenta problema ai-moruk iha sentru saúde sira bele hakbesik an ba iha Ministra saúde liu husi sentru reklamasaun atu nune’e sira bele hadi’a sira nia servisu.

Kona-bá kazu mal-prátika, Ministra Saúde Elia dos Reis Amaral hateten, Ministériu Saúde nia pozisaun klaru no prosesu investigasaun la’o hela.

Reportajen ekipa Rafa.tl