Opozisaun Hato’o Keixa Ba MP Kontesta Legalidade Nomeasaun Afonso Carmona

Membru PN husi Bankada FRETILIN, David Dias Ximenes Mandati. Imajen/Rafa.tl

DILI, RAFA.tl– Bankada opozisaun Frenti Revolusionáriu Timor-Leste Indepedente (FRETILIN), Segunda (27/10/2025), hato’o keixa ba Ministériu Públiku (MP) hodi eziji legalidade ba nomeasaun Prezidente Tribunál Rekursu Afonso Carmona.

“Ami aprezenta ami nia dokumentu keixa ida para depois iha desizaun juridika liuhosi Ministeriu Públiku lori took ba oin. Ida ne’e mak ami lori keixa mai iha MP,” Membru Parlamentu Nasionál husi Bankada FRETILIN, David Dias Ximenes Mandati  hateten ba  ba jornalista sira hafoin submete keixa ba Ministériu Públiku, Dili.

David Mandati  afirma desizaun Tribunál Rekursu hasai ona akordaun katak, nomeasaun ba Prezidente Tribunál Rekursu Afonso Carmona ne’e inkonstitusionalidade, maibé parte Prezidente Tribunál Rekursu  la kumpre ba orden Tribunál hodi kontínua ezerse nia funsaun hanesan Prezidente Tribunál Rekursu.

Nia dehan ultima instánsia mak Tribunál Rekursu. Kuandu to’o ona iha Tribunál da Rekursu buat ida koalia sira ne’e tama ona prosesu iha tranzitu ein-julgadu  ne’e laiha ona rekorénsia seluk.

Deputadu  David Mandati  hateten, agora  Timor-Leste tama ona iha ASEAN, tuir lolos tenke garante seguransa juridika iha Timor-Leste, nune’e  ema bele fiar, kuandu seguransa juridiku nune’e ema la fiar.

Nia haktuir kona-ba bankada opozisaun nia kontesaun ba prosesu nomeasaun ba Prezidente Tribunal Rekursu ne’e fundamenta no artikula ona ho  ho artigu ba 124, 128, no 160 husi Konstituisaun RDTL  maibé ba kesatun ida ne’e dún malu hela de’it.

Nia subliña, asaun ne’e bankada opozisaun halo  la’ós atu hirus malu fali,  maibé hakarak lori rai ne’e lao loos.

Iha biban ne’e Deputadu bankada FRETILIN ne’e mós preokupa ba asaun aklamasaun ne’ebé opozisaun hatoo ba Tribunál Rekursu iha fulan hirak liubá hodi husu ba Prezidente Tribunál tenke kumpre desizaun Tribunál Rekursu nia ba nia nomeasaun ne’e inkonstitusionál, maibé to’o agora  Tribunal Rekursu seidauk konsidera.

Nia dehan, kuandu Prezidente Tribunál Rekursu Afonso Carmona mak la fó komprimentu ba akordaun ne’e  entaun halo denegasaun no  obstrusaun ba justisa.

“Kuandu mosu nune’e  entaun ita ne’ebé nomeadu ne’e ita iha ilegalidade nia-laran depois ita halo desizaun ne’e mós desizaun nee ilegál depois ita uzu be sasan Estadu nian ne’e ita bolu ona pekulatu tán,” nia afirma.

Reportajen ekipa Rafa.tl