MJDAK “Bandu” FFTL Uza Kampu Futeból iha Munisípiu Bá Atividade Futeból

Prezidente FFTL, Nilton Telmo Gusmão dos Santos. Imajen/Rafa.tl

DILI, RAFA.tl–Ministériu Juventude, Desportu, Arte no Kultura (MJDAK) “bandu” Federasaun Futeból Timor-Leste (FFTL) liuhosi Asosiasaun Futeból Munisípiu sira  uza kampu futeból  iha munisípiu ba atividade futeból ne’ebé organiza direita husi FFTL.

Notísia Relevante: FFTL La Kontente MJDAK La Hatudu Vontade Di’ak Deskute Reabilitasaun Estádiu Munisipál Dili

Prezidente FFTL, Nilton Telmo  Gusmão dos Santos, hateten maske MJDAK la autoriza kampu futeból iha munisípiu sira, maibé asosiasaun futeból husi munisípiu sira kontínua organiza jogu iha kampu kiik sira ne’ebe nakonu ho rai rahun. Mézmu nune’e, lahamenus animu jogadór sira, kontínua joga ho vontade di’ak no adeptu sira nafatin fó sira-nia apoiu.

Asosiasaun futeból munisípiu sira hamutuk ho FFTL esforsu maka’ás submete karta pedidu ba MJDAK  atu bele uza kampu futeból sira iha munisípiu ba atividade futeból, maibé nunka fó resposta di’ak no hatún despaxu la bele utiliza.

“Tuir lolos hahalok hanesan ne’e labele akontese, triste tebes tanba Governu  investe osan halo estádiu iha munisípiu sira, despois ema iha munisípiu hakarak uza hodi ezerse juventude sira nia talent, maibe ministériu rasik mak bandu,” prezidente FFTL, Nilton Telmo Gusmão dos Santos hateten ba jornalista sira iha konferénsia imprensa iha edifísiu FFTL, Tersa (12/08/2025).

“Ministru la autoriza atu utiliza kampu futeból iha munisípiu, ami nia asosiasaun m unisípiu sira, kontínua organiza mas, organiza deit iha kampu sira ne’ebe la’ós estádiu. Ezemplu, Segunda (11/08/2025), iha Manatutu, FFTL realiza finál jogu asosiasaun Munisípiu Manatuto nian, maibe ita jogu la’ós iha estadu, ha’u lahatene se imi akompaña, maibe  joga deit iha kampu kiik ida ne’ebé rai-rahun maka’ás los, maibé la hamenus animu komunidade nian, ema kontínua joga ho vontade di’ak, labarik sira halo sira nia jogu ema ne’ebeéba asiste fó nafatin sira nia apiu,” Nilton Telmo Gusmão dos Santos hateten hodi hatudu ho karta pedidu asisiasuan sira nian ba MJDAK ne’ebé hatuun despaxu la autoriza utiliza kampu ba jogu.

Nilton Telmo Gusmão dos Santos, konsidera buat sira ne’e tuir lolos la bele akontese tanba FFTL ho asosiasaun futeból munisípal nian husu autorizasaun, halo pedidu ba MJDAK maibé lahetan autorizaun atu uza estádiu ne’e hodi halo jogu  finál

Ho situasaun ne’ebé iha FFTL sente lamentavel tebes tanba investimentu ne’ebe iha serve ba ema atu joga futeból. La’ós  halo kampu iha munisípiu sira atu infeita deit munisípiu, hodi hatudu ba publiku katak iha munisípiu mós estádiu iha.

Ho despaxu ne’ebé MJDAK  la autoriza asosiasaun futeból sira iha munisípiu utiliza kampu futeból, tuir FFTL nia haree ne’e intensaun hakarak federasaun la bele halo atividade futeból iha rai-laran, tanba pedidu autorizasaun lubuk ida aprejenta ba MJDAK la’ós deit jogu sira iha munisípiu, maibé selesaun nasionál ne’ebé atu sai ba li’ur husu deit kampu sira ne’e MJDAK la  aprova.

“Investimentu ne’e serve bá ema ne’ebé atu joga futeból ka atu halo deit hodi enfeita munisípiu, hodi dehan katak iha munisípiu mós iha estádiu. Ezemplu iha Manatuto, FFTL haruka karta abertura nian iha loron 13 fulan-Juñu, la aprova, husu fali ba finál nian mós la aprova. MJDAK nia intensaun ne’e saida, hakarak FFTL lalika halo atividade futeból iha ita nia rai ka iha buat ruma ne’ebe MJDAK sente katak FFTL halo ne’e la diak,”  Nilton afirma.

FFTL husu atu  Governu tenke esklarese ba públiku tanba la bele bandu deit la uza kampu sira, nein fó solusaun no aat liu tan, atu hamate futeból iha Timor-Leste.

FFTL hakarak halo kooperasaun ho MJDAK, maibé sente iha bareira boot ida husi MJDAK ba fali FFTL,  mas tuir lolos FFTL hanesan ajente implementadór ne’ebé hakarak implenta atividade desportu no MJDAK tenke hakuak no fó tan apoiu bá.

Nilton Telmo Gusmã dos Santos, subliña liután katak,  se governu liuliu MJDAK mai ho polítika sira ne’ebe atu impede de’it, halo politika ho favoritizmu deit, hakarak fó ba deit ida ne’e no ida ne’eba, maka bele kria fali situasaun ida ne’ebe la armónia entre MJDAK ho FFTL.

“FFTL la’ós mai keixa, maibe ne’e faktu, se  kontínua hanesan ne’e, FFTL  sente hanesan iha bareira boot ida iha fali FFTL  atu hanoin la’o ba oin. Serbisu hamutuk ne’e importante iha rai ida ne’e,” Nilton Telmo Gusmão dos Santos hateten.

Hosi sorin seluk, Ministru Juventude Desportu Arte no Kultura, Nélio Isaac Sarmento, ba jornalista sira iha Edifísiu MJDAK, Lecidere, Kuarta (13/08/2025), konfirma katak Governu nia responsabilidade bá infrastrutura sira ne’e hotu, komesa husi manutensaun, selu ema hein,  selu ema ne’ebé halo limpeza iha ne’eba.

“Se kompañia halo hela reabilitasaun,  joga la’o hela mak buat ruma aat, kompañia mai halo adisional beibeik, tanba ne’e mak presiza koordesaun, maibé atu di’ak liu tan ba oin, tenke iha koordenasaun diak atu realiza atividade seluk, hanesan federasaun sira seluk, sira halo kampionatu ruma  antes koordena ho MJDAK lai, atu uza fatin governu nian ne’e iha kampu sempre iha orariu ba ema uza barak,” Nelio Isaac Sarmento fó razaun.

Tuir Nelio Isaac Sarmento, FFTL ho MJDAK liña koperasaun di’ak no baibain hela, governu rasik kuandu FFTL iha difikuldade ruma liuliu atu halo dezlokasun jogaóor nasionál sira ba mak osan laiha, governu fó apoiu, maibé dalaruma prezidente FFTL ladún hatene, dehan katak governu nunka tau atensaun.

Nia afirma, ko’alia ba depois mak haree, governu fó atensaun ba jogadór nasionál trenu iha Becora ne’eba dalaruma mai estádiu munisípal maibe fó ba planu ne’ebe estádiu ne’e la uza labele semana tomak uza ne’e sei estraga dut sira.

“FFTL hato’o karta pedidu ne’e mai, maibé se iha faze manutensaun hela nune’e la bele autoriza hodi joga iha laran, karik manutensaun di’ak ona, foin bele joga iha laran, tanba estádiu Baucau ho Gleno sei iha hela manutensaun nia laran, Manatuto kompañia seidauk finalisa hotu no seidauk entrega ba governu,” Nélio Isaac hateten.

Nia husu ba  FFTL atu halo planu ba kampionatu ida tenke koalia ho na’in ba estádiu ne’e, karik autoriza foin bele uza maibé agora estádiu iha munisípiu sira halo hela manutensaun, nune’e hadi’a halo di’ak hotu mak bele joga iha laran.

Reportajen ekipa Rafa.tl