Kongresu Estraordináriu FFTL Bá Dala-XII, Asosiasaun Sira ho Unanimidade Aprova Programa Federasaun Nian

Kongresu estraordináriu FFTL ba dala-XIl, Sábadu (09/08/2025). Imajen/Rafa.tl

DILI, RAFA.tl–Federasaun Futeból Timor-Leste (FFTL), Sábadu (09/08/2025),  realiza kongresu estraordináriu ba dala-XIl  hodi halo aprovasaun ba relatóriu anuál, estatura auditoria, no relatóriu finanseiru anuál federasaun nian tinan 2024.

Kongresu Estraordináriu FFTL hanesan enkontru espesiál ida, hosi membru Kong-Federasaun nian, ne’ebé hala’o hodi diskute no deside asuntu importante sira ne’ebé sai hanesan federasaun nia alvu prinsipál ba dezenvolvimentu futeból iha Timor-Leste.

Iha kongresu estraordináriu ne’ebé loke direita husi, Vise-Prezidente Konfederasaun Desportiva Timor-Leste (CDTL- sigla portugés), Inocêncio Araújo da Silva, iha Otél Palm Springs, Fatuhada, Dili, hateten ba kongresista sira atu kontribui ba prosesu kongresu ida ne’e, tanba kongresu hanesan ne’e di’ak atu lori futeból bá oin.

“Iha federasaun ka asosiasaun, kongresu importante tebes, atu bele halo aprovasaun ba ata sira-ne’ebé iha, oinsá atu dezenvolve ita-nia futeból iha nasaun ida-ne’e. Ha’u fiar katak kongresu ida-ne’e sei la’o ho susesu,” Inocêncio Araújo da Silva hateten.

Iha ajenda kongresu estraordináriu ne’ebé Rafa.tl asesu, iha kongresu ne’e, Sekretáriu Jerál FFTL, José Adilson Ribeiro halo uluk Roll Call ka konvokasaun ba membru sira Asosiasaun, no deklarasaun katak kongresu konvoka tuir estatutu FFTL no mós aprovasaun ba ajenda kongresu.

Atu asegura kongresu ne’e lao ho demokrátiku no independente,  kongresista sira nomea delegadu na’in-tolu atu verifika akta ofisiál, nomea mós eskrutinadór na’in-tolu, atu verifika votasaun.

Hafoin hili delegadu sira ba verifikasaun akta no eskrutinadór sira ba verifika votasaun, Sekretáriu Jerál FFTL, kontinua uza nia kompeténsia hodi kontinua kongresu estraordináriu no husu kongresista sira halo aprovasaun ba minuta kongresu eletivu FFTL nian, ne’ebé realiza iha loron 11 iha fulan-Janeiru 2025, aprezenta no aprova relatóriu anuál FFTL tinan 2024, aprezenta no aprova relatóriu estatutáriu auditu FFTL tinan 2024, aprezenta no aprova relatóriu finanseiru anuál FFTL tinan 2024

Iha aprezentasaun relatóriu estatutáriu auditu FFTL tinan 2024, ne’ebé aprezenta husi Primus Bo’ot Accounting & Audit, fó rekomendasaun ba FFTL atu mellora liután servisu sira, no rekomenda atu federasaun futeból Timor-Leste iha rezerva rasik para bele sustenta nia an ba futuru.

Primus Bo’ot Accounting & Audit, mós husu ba federasaun hadi’a sistema aprovizionamentu, mantein lista dokumentasaun sira liga ho payroll nian, atu nune’e federasaun bele halo aprezentasaun ida di’ak iha relatóriu finanseiru anuál nian.

Iha aprezentasaun no aprova relatóriu finanseiru anuál FFTL tinan 2024,  ne’ebé aprezenta husi diretora finansas Federasaun Futeból Timor-Leste, Lobato Borges, liu husi audio hateten, durante tinan 2024, federasaun simu subvensaun husi FIFA ho total $ 1,250,000.00, ne’ebé koloka ba operasionál federasaun nian, $850,000.00, travel ka viajen sira selesaun nasionál ba partisipa iha jogu internasionál sira $250,000.00 Equipment ka ekipamentu $50,000.00, Eskema Dezenvolvimentu Talentu $ 100,000.00.

Husi AFC, Federasaun Futeból Timor-Leste hetan apoiu ho total $406,498.00, ne’ebé fahe ba atividade bo’ot tolu hanesan Enhance-Operational (kustu operasionál) ho totál orsamentu $248,220.00, Enhance-Advantage ho total $118,809.00  no ikus liu ba Enhance-Extra Time ho totál $39,469.00.

Husi orsamentu ne’ebé FIFA no AFC oferese ne’e mak federasaun futeból Timor-Leste utiliza hodi finansia atividade hotu federasaun nian, operasionál ba selesaun nasionál nia partisipasaun iha jogu internasionál no rejionál sira, selu ekipa tékniku sira no apoiu ba asosiasaun sira ne’ebé asosiadu ba FFTL.

Husi aprezenta sira ne’ebé iha, ba kongresu estraordináriu FFTL ba dala-XII ne’e, maioria asosiasaun sira 21 fó  umanidade a-favor.

Hafoin aprovasaun ba Relatóriu sira, Prezidente Federasaun Timor-Leste,  Nilton Telmo Gusmão dos Santos hateten lori federasaun nia naran, hato’o apresiasaun ba delegadu no delegada hotu ne’ebé partisipa ho másimu iha kongresu estraordináriu FFTL nian ba tinan 2025.

Nia afirma kongresu la’ós deit prosesu administrativu, maibé plataforma ida atu reflete vizaun komún ba Futeból Timor-Leste iha futuru. Iha lorin tomak ne’e, halibur hamutuk iha ne’e tamba hotu-hotu realístiku atu lori futeból Timor-Leste ba etapa foun ida, hodi hamutuk transforma Futeból sai orgullu nasionál.

Ohin mós iha kongresu ida ne’e, ho laran no hanoin ida de’it, tanba hotu-hotu nia desizaun koletivu, aprova akta kongresu eletivu Janeiru 2025, programa no relatoriu konta tinan 2024.

“Agora ita presiza haree ba oin, ita nia federasaun dezenvolve ona planu konkretu ba dezenvolvimentu infraestrutura futeból nian, ne’ebé aprova ona ho unanimidade iha Konsellu Ministru, ba konstrusaun Estádiu foun no reabilitasaun ba Estádiu munisipál Díli inklui konstrusaun kampu Futsal Indoor, ne’ebé sei fasilita joven foin-sa’e sira, no jogadór selesaun nasionál atu halo atividade no preparasaun sira ba jogu internasionál no rejionál sira,” Nilton Telmo Gusmão dos Santos hateten.

Ezekutivu FFTL ne’e sente haksolok no orgullu ho Asosiasaun sira hotu ne’ebé hatudu determinasaun ida, hodi fó votu a-favor hotu ba konta 2024 nian, mézmu hatene katak konta ida ne’e mai hela ho tusan boot ida.

“Ita fó votu a-favor la signifika katak ita konsiente sala sira ne’ebé uluk halo iha tinan 2024, maibé ita fiar katak, ita hamutuk bele solusiona problema sira ne’ebé federasaun hasoru. Ha’u konfiante tebetebes, hamutuk ho imi hotu katak ita iha hanoin ida de’it ba dezenvolvimentu futeból ida di’ak liu ba futuru.” Nilton subliña.

Kongresu estraordináriu FFTL ba dala-XII ne’e, partisipa husi kongresista sira husi  Asosiasaun Futeból Munisipiu sira hanesan Asosiasaun Futeból  Ainaru, Asosiasaun Futeból Aileu, Asosiasaun Futeból Baukau, Asosiasaun Futeból Bobonaru Likisá, Asosiasaun Futeból Oé-Cusse, Asosiasaun Futeból Vikeke, Asosiasaun Futeból Lautein, Asosiasaun Futeból Covalima, Asosiasaun Futeból Manufahi, Asosiasaun Futeból Manatutu, Asosiasaun Futeból Dili Leste, Asosiasaun Futeból Dili Oeste, Asosiasaun Juveníl, Asosiasaun arbitrajen, Asossiasaun Treinadór, Asosiasaun Futsál, kampiaun Liga Timor-Leste Primeira Divizaun no kampiaun Segunda Divizaun.

Kongresu ne’e observa direta husi reprezentante FIFA, Asian Football Confederation (AFC) no Konfederasaun Desportiva Timor-Leste.

Reportajen ekipa RAFA