Foin-Sa’e Atus to’o Rihun Entusiazmu Kompete Vaga Kadete foun PNTL

Joven mane no feto Timor-an sira atus to’o rihun ho entusiazmu forma iha resintu academia Polísia Comoro, Dili, hodi simu formuláriu atu kompete iha vaga kadete PNTL tinan 2025. Imajen/RAFA.tl

DILI, RAFA.tl–Foin-sa’e sira atus to’o rihun iha kapitál Díli, Tersa, 05 Jullu 2025, ho entuziazmu hakat ba iha resintu Akadéma Polísia Comoro, Postu-Administrativu Dom Aleixo, Munisípiu Dili, hodi halo formatura foti formulariu ne’ebé maka distribui husi komisaun rekrutamentu membru foun PNTL tinan 2025 nian.

Antes ne’e, Polísia Nasionál Timor-Leste (PNTL) fó sai ofisialmente informasaun kona-bá rekrutamentu ba membru polísia foun ho totál ema hamutuk 400 ba tinan 2025 ne’ebé hahú iha nia prosesu rekrutamentu iha loron 05 fulan-Agostu ne’e.

Segundu Komandante Jerál PNTL nu’udár Prezidente Juri ba Konkursu ida-ne’e Komisáriu Polísia Pedro Belo, liu husi konferénsia imprensa, husu ba joven sira ne’ebé iha interese atu kandidata aan, hahú iha loron 05 to’o loron 29 fulan-Agostu, bele foti formuláriu atu prinxe no sei submete fali iha loron 12 fulan-Agostu to’o loron 09 fulan-Setembru 2025.

Komisáriu Polísia ne’e hatutan, formuláriu ne’e foti iha Komandu Munisípiu sira hotu, inklui iha Rejiaun Administrativa Espesiál Oé-Cusse-Ambenu (RAEOA) no Ataúru.

Iha Dili, foti formuláriu iha fatin rua, iha Sentru Formasaun Polísia Comoro-Dili, no Komandu Jerál PNTL Caicoli.

Foin-sa’e potensial feto, Mazarela Ximenes Soares, ba RAFA espresa nia konente bele hetan oportunidade ba formulariu atu prienxe aplika ba vaga kadete foun PNTL.

“Ba vaga ida ne’e rasik ha’u sente kontente tebes tanba Govenru ho Komandu Jerál PNTL a bele faislita ona vaga ida-ne’e atu joven sira konkore atu iha oportunidade serbi Timor-Leste,” Mazarela Ximenes Soares hateten.

Mazarela hatutan bainhira iha selesaun dokumentu mak nia liu, prontu atu kumpri orden sira ne’ebé maka husi superiór fó sai no prontu atu koopera, maibe karik la pasa prontu hein nafatin faze tno oportunidade seluk.

Foin-sa’e ne’e mos, enkoraja joven sira seluk ne’ebé la prienxe rekizitu hanesan altura no seluk-seluk tan, atu nafatin kolabora hodi hein oportunidade seluk.

Iha fatin hanesan, Fidelis Roqui Pereira, hateten nia parte agradese tebes tanba durante tempu naruk halo ezersisiu hodi prepara a’n ba vaga refere no ohin bele ona kompete.

“Ami agradese tebes tanba durante tinan barak nia laran ami hein vaga ida ne’e, ami hein ho ami nia fiziku no agradese tebes vaga ida ne’e ohin loron ami bele compete,” Fidelis Roqui Pereira hateten.

Gabriel Sarmento, ne’ebé la pasa iha kritéria balun tanba altura la too hateten, iha mehi ne’ebé a’as atu sai lutu ba nasaun, maibe tanba nia la prense kriteria iha parte altura, ida ne’e hanesan bareira ida ba nia no susar atu realiza nia mehi ida ne’e.

“Ha’u hanesan joven ida ha’u nia mehi boot, hakarak sai polísia atu sai lutu ba nasaun, maibé ha’u nia idade pas, maibe iha altura ne’e maka sira sukat dehan hau iha deit 1.64,7, no la to’o iha altura ne’ebé sira tau iha kriteria, tamba ne’e hau triste,” Gabriel Sarmento hateten.

Nia hatutan, hanesan pessoal nia la simu ho kritériu ne’ebé iha, tamba ida ne’e limita tebes Foin-sa’e barak nia vontade, no hakarak atu sai polísia hodi servi ba nasaun ne’e.

“Ha’u ladun satisfaz ho kriteria ne’e, tanba iha ne’ebá tau dehan husi 19 até 23, depois ema ne’ebé iha esperensia servisu ona, antaun ne’e ema idade kiik hanesan ne’e seidauk iha esperensia servisu, ha’u nia hakarak ne’e idade tenke husi 20 anos até 27 hanesan ne’e pas, atu nu’uné joven sira hotu bele kompete bai ha vaga ida ne’e,” nia tenik.

Iha Segunda, 04 Jullu 2025, Superintendente no Portavós Komisaun Rekrutamentu PNTL, António da Luz, hateten rekrutamentu ne’e bazeia ba diploma ministeriál, númeru 1 7/2025, 5 fulan-Juñu, regulamentu ba konkursu admisaun públika, ba kursu formasaun ba ajente Polísia Nasionál Timor-Leste.

Nia esplika katak, kondisaun admisaun jerál ba kompetisaun hamutuk 12, mak hanesan, tenke sidadaun Timor-Leste nian, domina pelumenus lian ofisiál ida, sei solteiru, iha kualifikasaun akadémika mínimu 12.° anu ka ekivalente, idade entre 18 no 23 to’o loron 31 fulan-Dezembru tinan 2025, no aas mínimu metru 1,58 ba kandidatu feto no mane 1,65.

Iha aptidaun fíziku no mentál rekoñesidu ba ezersísiu knaar Polísia nian, iha kualidade morál apropriadu no komportamentu síviku ne’ebé permite sira atu atua ho justisa, lealdade, integridade, onestidade, no kompeténsia profisionál, hodi hamosu konfiansa no respeitu husi populasaun, no kontribui ba prestíjiu PNTL no instituisaun demokrátika sira.

Portavós Komisaun Rekrutamentu PNTL 2025 ne’e hatutan, kandidatu sira la hetan ezonerasaun husi instituisaun seluk Estadu nian, la hetan kondenasaun tanba krime intensionál ruma, hatudu adekuasaun ba ezersísiu funsaun Polísia nian, ne’ebé karateriza ho la sai arguidu iha kuaľkér prosesu kriminál, ne’ebé la’o hela, nomós la sujeita ba medida koersivu, akuzasaun formál, ka julgamentu ba krime intensionál ho ofensa kriminál, ne’ebé bele hetan kastigu liu tinan tolu iha prizaun, no disponivel ba knaar iha ne’ebé de’it, iha territóriu nasionál, bainhira tuir no kompleta ho susesu CFA-PNTL tuir nesesidade servisuı PNTI nian.

Tuir observasaun RAFA nian iha resintu Akadémia Polísia Comoro, maioria joven sira forma narok atu hetan formuláriu ne’ebé distribui husi PNTL.

Reportajen ekipa RAFA