FIFA, AFC ho AFF Husu FFTL Lori Fali Futeból Mai Timor-Leste

DILI, RAFA.tl–Prezidente Federasaun Futeból Timor-Leste (FFTL),  Nilton Telmo Gusmão dos Santos, simu mensajen klaru husi Prezidente Federasaun Futeból Internasionál (FIFA) ho Asian Football Confederation (AFC) inklui ASEAN Football Federation (AFF)  katak FFTL tenke lori fila futeból mai iha Timor-Leste.

Notísia Relevante: Kongresu Estraordináriu FFTL Bá Dala-XII, Asosiasaun Sira ho Unanimidade Aprova Programa Federasaun Nian

 Prezidente Federasaun Timor-Leste (FFTL),  Nilton Telmo Gusmão dos Santos, transmite mensajen FIFA, AFC ho AFF nian ne’e  ba kongresista sira iha kongresu estraordináriu FFTL ba dala-XII ne’ebé hala’o iha Ótel Palm Springs, Fatuhada,  Dili, Sábdu (09/08/2025).

“Mensajen klaru ne’ebé ha’u simu husi Prezidente FIFA, Prezidente AFC ho Prezidente AFF maka motiva ita atu lori fila futeból mai iha Timor-Leste. Se ha’u ko’alia hanesan ne’e, ema balun bele dehan, hae, futeból la’o hela hanusa mak lori fila fali mai Timor-Leste. Lori fila futeból mai Timor-Leste, signifika dehan, kuandu Timor joga hanesan uma-na’in tenke joga iha nia rai,”  Nilton Telmo Gusmão dos Santos pronúnsia.

Nia afirma, atu joga iha rain rasik presiza infraestrutura no FIFAhno AFC inklui AFF kompromete ona atu apoiu fundu ruma, kombina ho fundu governu nian, harii infraestrutura ida apropriadu atu nune’e lori futeból ne’e fila mai Timor-Leste.

“Maibé, hafoin estádiu no buat sira ne’e aprova iha Konsellu Ministru, ita nia ministériu tutela sira kontinua hamosu sira nia egoísmu hakarak atividade ne’e sira mak tenke halo, la’ós federasaun, ne’ebé buat sira ne’e sei dada malu to’o ohin loron,” Nilton Telmo Gusmão dos Santos hateten.

Prezidente FFTL ne’e subliña liután katak ida ne’e dezafiu ida ne’ebé la’ós hasoru deit iha altura ida agora, momentu sira ba kotuk mós Prezidente fedasaun sira enfrenta situasaun nune’e. Ida ne’e mak presija kebra no atu kebra ida ne’e presija tau hanoin hamutuk, tanba atu halo buat ruma ba rai ne’e,  hotu-hotu iha dever atu halo.

Prezidente Federasaun Futeból Timor-Leste  ne’e iha esperansa boot atu hetan solusaun ba futuru, hodi transforma futeból sai orgullu nasionál.

Iha biban ne’e, Prezidente FFTL,  Nilton Telmo Gusmão dos Santos, pronúnsia  ba kongresista sira kona-bá planu fiksu kongresu nasionál atu hili estrutura foun FFTL períodu 2026-2030 iha fulan-Fevereiru 2026.

“Iha oportunidade ida-ne’e, ha’u deklara katak prósimu kongresu eletivu ne’ebé atu ita bele hili fali estrutura foun ba ita-nia FFTL iha fulan-Fevereiru 2026 no kona-ba  loron sei fó-sai iha tempu tuirmai,”  Nilton Telmo Gusmão dos Santos hateten iha nia nia diskursu iha ámbitu Kongresu Estraordináriu FFTL nian ne’e.

Nia dehan kongresu ne’ebé hala’o, timoroan hotu ne’ebé hadomi futeból bele prepara-aan hodi kompete, nune’e bele dezenvolve di’ak liután futeból iha nasaun ida-ne’e.

Iha biban ne’e  mós nia informa,  atividade bá klube sira-ne’ebé hamahan-aan iha Liga Futeból Timor-Leste (LFTL), FFTL sei realiza tasa federasaun nian sei tau hamutuk klasifikasaun primeiru-kuartu husi Primeira Divizaun hodi joga hamutuk ho primeira no segunda klasifikasaun husi Segunda Divizaun nian.

Nia dehan, ida-ne’e atu fó biban bá  klube sira hodi bele kapitaliza sira-nia aan iha atividade ne’ebé organiza husi FFTL.

“Ha’u garante katak atividade sira-ne’e bele insentiva hikas ita-nia klube sira atu bele hetan fali sira-nia forsa finanseira, tanba iha mídia sosiál ema hahú ko’alia ona kona-ba ida-ne’e. Tanba ne’e mak ita buka atu organiza atividade sira-ne’e hodi bele hetan baze klube sira-nian, ba mós sira-nia adeptu sira. Ida-ne’e mak ita buka atu hala’o iha tinan ikus ida-ne’e,” Nilton hateten.

Preokupa ho MJDAK La Marka Prezensa

Ministru Juventude Desportu Arte no Kultura, Nelio Isaac Sarmento,   ne’ebé FFTL konvida hanesan bainaka onradu iha kongresu anuál bá dala-XII FFTL nian ne’e maibé la marka prezensa no laiha informasaun.

Prezidente Federasaun Futeból Timor-Leste Nilton Telmo Gusmão dos Santos  bá   jornalista sira  hateten se Ministru Juventude Desportu Arte no Kultura, Nelio Isaac Sarmento la marka prezensa mós pronúnsia buat ruma bá FTTL ka   bele delega reprezentante ruma.

“Ha’u hanoin   la marka prezensa tenke pronúnsia buat ruma. Ami Federasaun Futeból Timor-Leste  halo karta husu audiénsia, maibé infelizmente  ita nia Ministru nia servisu barak liu, la fó importánsia bá atividade sira ne’ebé  tutela duni bá Ministériu ida-ne’ebé  ko’alia dehan Desportu no Juventude,” Nilton Telmo Gusmão dos Santos hateten.

Nilton argumenta  kongresu anuál FFTL ne’e  ko’alia kona-bá juventude no desportu,  espesiál futeból, maibé ministru sira haree dehan ida-ne’e hanesan la’ós parte husi MJDAK nia programa,  sira la fó importánsia no sira sente katak di’ak liu halo  rivalidade entre  Governu  ho FFTL, inves sira ka  Ministru ne’e maka hako’ak Federasaun hodi fó forsa bá Federasaun sira atu nune’e bele halo atividade  iha  rai RDTL ida-ne’e.

“Ezemplu konkretu seluk ne’ebé maka ha’u hakarak dehan, no  ha’u tenke dehan futeból  iha Munisípiu sira hahú la’o, asosiasaun  Munisípiu sira hahú halo atividade,  maibé laiha autorizasaun atu uza kampu  futeból sira ne’ebé iha munisípiu sira,” Nilton hateten.

Nilton Telmo Gusmão dos Santos  la hatene objetivu saída maka   Ministru  Nelio Isaac hakarak hatudu bá públiku hodi  proibi asosiasaun munisípiu sira  labele utiliza kampu futeból hodi bá atividade futeból.

“Se Timor  iha kampu futeból la bele uza atividade futeból,   entaun estadu investe atu halo saída,” Nilton tenik.

Hasanesan  prezidente FFTL, Nilton Telmo Gusmão dos Santos,  kontinua no hakru’uk husu nafatin audiénsia atu hasoru  MJDAK atu bele ko’alia  destinu futeból Timor-Leste nian, maibé infelizmente sasán sira ne’e hotu la akontese.

“Ohin, imi haree rasik ate serimónia kongresu  de’it mós ita nia  Exelénsia Ministru Nelio Isaac Sarmento lakohi mai, sosiedade hadomi futeból Timor-Oan sira imi maka hatene, haree buat sira ne’e halo bá, ida-idak ninian, ha’u la bele responde tanba saída maka nia la mai, reprezentante mós sira la haruka, ami komunika ate ultima ora  ohin mós  tenta  telefone nafatin maibé laiha resposta,” Nilton informa.

Asosiasaun  Sira Tau Konfiansa Nafatin Bá Nilton Lidera FTTL

Prezidente Klube Kampiaun Primeira Divizaun LFTL, José Luís de Oliveira lori estrutura  Karketu FC  nia naran deklara mantein iha sira depozita apoiu másimu ba Nilton Telmo Gusmão dos Santos atu avansa iha kongresu tinan oin, tanba nia ema ida-ne’ebé iha duni paixaun ba futeból no ho nia lideransa konsege rezolve problema barak iha FFTL.

“Ha’u atu hateten de’it katak kongresu anuál  tinan 2024  nian, buat hotu la’o di’ak, lideransa ida  oin seluk la hanesan lideransa ida uluk.  Ohin ita hotu sai sasin  kada votasaun ba programa FFTL nian maioria a-favór,” José Luís de Oliveira hateten.

Ida-ne’e, tuir José Luis Oliveira, hatudu  tempu to’o ona lideransa bá FTTL tenke hanesan Nilton Telmo Gusmão dos Santos, tanba nia hatudu lideransa  ne’ebé di’ak,  no importante liu mós mak durante ne’e dívida barak iha FFTL maibé Nilton uza meiu seluk rezolve ona.

Iha biban hanesan, Prezidente Asosiasaun Futeból Munisípiu Baucau, Marito da Costa Belo hateten sira sei apoiu figura ne’ebé haree di’ak hodi lidera FFTL bá-oin.

“Ita tenke apoiu ema ne’ebé di’ak mak bá lidera FFTL. Prezidente ida agora ita rasik haree ho matan, nia halo buat di’ak barak la’ós iha nasionál de’it, maibé bele to’o iha munisípiu sira hotu. Ida-ne’e mak ami-nia orgullu,” Marito  Belo fó sasin.

Reportajen ekipa RAFA