Nilton Telmo Gusmão dos Santos, Re-Eleitu Ba Prezidente FFTL no Promete Eleva ho Haforsa Dezenvolvimentu Futeból iha Timor-Leste

Nilton Telmo Gusmão eleitu nu’udar prezidente ezekutivu FFTL ba períodu 2026-2030. Imajen/Rafa.tl

DILI, RAFA.tl– Emprezáriu Timoroan nu’udár na’in ba empreza grupu Esperansa Timoroan (ETO),  Nilton Telmo Gusmão dos Santos, re-eleitu ba Prezidente Ezekutivu Federasaun Futeból Timor-Leste (FFTL) ba mandatu períodu 2026-2030, ho kompromisu forte no promete eleva no haforsa dezenvolvimentu futeból iha Timor-Leste.

Notísia Relevante: FIFA Nomeia Prezidente FFTL Nilton Telmo Gusmão dos Santos Ba Komité Permanente Anti-Rasízmu no Deskriminasaun

Nilton Telmo Gusmão dos Santos, re-eleitu ba prezidente ezekutivu FFTL, liu husi kongresu eletivu ba dala-XIII, liu husi votu aklamasaun, tanba laiha ona kandidatu seluk ne’ebé prienxe rekezitu atu kompete, tuir rezultadu verifikasaun ne’ebé Komité Independente FFTL anúnsiu bazeia rekezitu sira FFTL nian.

Iha kongresu ne’ebé halo iha Otel Palm Spring, Fatuhada, Domingu (08/02/2026), maioria husi membru FFTL, liu husi Asosiasaun Futeból Munisípiu sira no asosiasaun profisionál sira hotu-hotu depozita konfiansa ho votu unamidade atu Nilton Telmo Gusmão dos Santos lidera tan FFTL ba mandatu tinan-haat (2026-2030).

Hafoin re- eleitu Prezidente FFTL, Nilton Telmo Gusmão dos Santos,  iha diskursu husu ba estrutura tomak FFTL atu servisu hamutuk no servisu maka’as hodi eleva no haforsa futuból iha Timor-Leste, atu nune’e, bele realiza mehi ne’ebé FFTL iha, hodi lori futeból sai orgullu nasionál.

Nia hatutan, atu transforma futeból sai orgullu nasionál la’ós de’it hanesan lema inspiradór ida, maibé nu’udar vizaun estratéjiku ida ba tempu naruk ne’ebé presiza kuda iha hotu-hotu nia hanoin no kompromisu hamutuk atu harí no organiza  futeból  ho governasaun responsável, iha planeamentu konsistente no kompromisu permanente ho  dezenvolvimentu umanu sosiál no desportivu.

“Futeból iha Timor-Leste  iha papél ida ne’ebé liu fali dimensaun kompetetiva,  futeból maka instrumentu koezaun  sosiál, inkluzaun formasaun juventude no afirmasaun  identidade  nasionál.  Kada joven ne’ebé hetan oportunidade  husi futeból  no kada komunidade ida ne’ebé hamutuk atu sustenta desportu reprezenta investimentu murak ba futuru nasaun nian, tan ne’e, Programa Futeból Grasroot  sei sai nu’udar prioridade  FFTL ba tinan haat mai,” prezidente eleitu Nilton Telmo Gusmão dos Santos hateten.

Tuir nia, futuru futeból Timorense  hahú iha eskola sira, iha suku sira, iha klubu lokál sira no iha kampu ki’ik sira. Tanba ne’e, FFTL  kontinua hametin futeból  sub-15 no sub-17 feto no mane no mós hametin nafatin futeból feto, formasaun treinadór baze no programa  inkluziva sira hodi garante futeból sai oportunidade ida ba labarik no joven hotu-hotu iha  rai laran.

Tinan ida liubá ne’e, Nilton Telmo Gusmão dos Santos afirma, maka tinan servisu intensu  no rezultadu konkretu ho apóiu FIFA, AFC no AFF, FFTL konsege hahú no implementa programa sira ne’ebé agora ita bele haré  no impaktu balu iha futeból iha ita nia  rain.

Prezidente ezekutivu ne’e promete, nu’udar Prezidente eleitu ba mandatu Tinan haat, hamutuk ho komité ezekutivu eleitu  sira  kompromete kontinua buka no hametin aprosimasaun  ho  Governu  Timor-Leste  no mós koperasaun  estratéjika husi FIFA, AFC no AFF, hodi realiza mehi boot ba povu  Timor hotu nian atu iha kampu no estádiu rasik tuir padraun FIFA nian ne’ebé bele permite Timor-Leste  halo Jogu uma na’in iha nia rain rasik.

Ho prezensa Ministru Justisa nian iha ne’e haksolok tebes  tanba apóiu ida ne’e  sei la husik monu hela iha  rai, no sei halo posível hotu atu iha tinan haat ne’e bele realiza mehi  hodi iha  estádiu rasik iha rain rasik.

“Ami fiar metin katak desizaun iha ne’e bele realiza tanba apóiu husi parseria inkluziva  entre Governu, FFTL, Instituisaun relijioza,  Instituisaun naun-Governamentál sira, setór privadu no komunidade futeból tomak ho responsablidade  hamutuk sustentabilidade  ba tempu naruk,” Nia subliña.

Membru konsellu Federasaun Internasionál Football Asosiation  (FIFA) , Tan Sri Dato Haji Hamidin Haji Mohd Amin, hatete fó apóiu másimu ba Prezidente Eleitu Nilton Telmo Gusmão do Santos no husu ba estrutura tomak FFTL nian atu kria relasaun servisu ne’ebé di’ak,  nune’e  FFTL inklui Ekipa Nasionál Timor-Leste bele forsa no forte liu-tan iha futuru.

“Ha’u hakarak subliña ha’u nia kompromisu pesoalmente,  ha’u sei fó suporta  maka’as ba  Mr. Nilton Gusmão  atu harí FFTL. Ha’u-nia papél iha FIFA mak atu garante katak Timor-Leste nia lian rona no reflete iha asaun, diriji ba sira ne’ebé iha leten, inklui Ali, delegadu, no kuadru sekretáriu FFTL nian, ha’u nia mensajen maka atu mantein relasaun servisu ne’ebé armoniozu ho Prezidente Nilton, tanba iha ró ida líder ida de’it, entaun ró ida ne’e bele ba fatin ne’ebé de’it iha tasi laran se nia hakarak tuir líder no ró ida ne’e bele ba, iha futeból estabilidade mak sai hanesan fundasi, estabilidade mak sai hanesan forsa iha federasaun ida, laiha estabilidade, esco, staf inklui Prezidente susar atu mantein. Tanba ne’e, ema hotu tenke fó apóiu, ba sira ne’ebé hili ona Sr. Nilton, presiza ita boot sira nia apóiu tomak, hodi garante unidade Federasaun Timor-Leste kontinua la’o ba oin, laiha unidade iha Federasaun nia laran, imposível atu harí ekipa nasionál ida ne’ebé forte,” Tan Sri Dato Haji Hamidin Haji Mohd Amin hateten.

Nia husu atu FFTL servisu hanesan ekipa ida ne’ebé sólidu, apóia Prezidente, no asegura organizasaun ida-ne’e la’o no laiha obstákulu, kresimentu FFTL depende maka’as ba oinsá imi hotu mantein harmonia, ita tenke servisu hamutuk nu’udar ekipa ida de’it. Ba estrutura foun sira, ha’u dezafia ita boot sira hodi foti inisiativa FIFA, AFC, AFF, hanesan filtru krusiál ba ita boot sira, labele husik leet de’it oportunidade oferese husi FIFA, AFC no AFF liu-liu kona-bá Gavernes ne’ebé di’ak, matenek maka kapitál prinsipál, ho administrasaun ne’ebé profisionál, futeból Timor-Leste sei hetan respeitu ba bei-beik iha mundu nia matan.

Iha fatin hanesan, Prezidente Asosiasaun Futeból Ramelau Ainaro (RAMA),  Inácio da Cruz hatete, iha konfiansa tomak ba Prezidente Nilton Telmo Gusmão do Santos, tanba hatudu ona rezultadu balu no kontinua husu ba FFTL mantein kompromisu ne’ebé iha hodi lori futeból tama to’o baze.

Nia hatutan, haré katak mudansa signifikativu ne’ebé maka Señor Nilton halo entaun ha’u hanoin akompañamentu husi asosiasaun Ramelau Ainaro iha esperansa boot tebes ho Señor Nilton tinan ida ne’e ninia kompromisu sira durante iha sorumutu tinan ida ne’e kuaze prátika duni iha terrenu iha asosiasaun munisípiu sira sente.

“Hanesan ita hatene, ita realiza ona sub-15 no 17 ne’e misaun importante ida ne’ebé Señor Nilton halo obra primeira ne’ebé  iha, mandatu tinan ida ne’ebé Señor Nilton halo maka ita hatene sub-17 foin dadauk ba ne’e obra primeira ne’ebé estrutura anteriór Señor Nilton halo. Rekomendasaun ba prezidente maka nafatin mantein ninia disiplina no diplomasia sira oinsá maka bele koopera ho komunidade hadomi Futeból Timor-Leste ida ne’e importante liu,  tanba ita hanoin atu transforma futeból ne’e la’os ema ida de’it tenke Timor oan hotu-hotu liu-liu tenke transforma lori futeból ne’e to iha baze,”Inácio da Cruz hateten.

Iha kongresu eletivu FFTL nian ne’e, membru sira halo votu aklamasaun hodi hili Vise-prezidente no membru Komité Ezekutivu FFTL na’in-lima (5), ne’ebé eleitu ba periódu 2026 – 2030, mak hanesan Vise-prezidente Tenente-Jenerál Domingos Raúl “Falur Rate Laek”, membru Ezekutivu na’in-lima hanesan Komisáriu-Jerál Polísia Henrique da Costa, Engrácia Pimentel Fernandes, Faustino Godinho da Costa, Domingos dos Santos Caeiro no José Luís de Oliveira.

Nilton Telmo Gusmão eleitu nu’udar prezidente ezekutivu FFTL ba mandatu dahuluk nian liuhosi kongresu nasionál FFTL ne’ebé hala’o iha Ótel Novo Turismu, Sábadu, 11 fulan-Janeiru tinan 2025.

Reportajen ekipa Rafa.tl