Membru PNTL Ida Tiru Nia Kaben Ne’ebé ho Kondisaun Isin-rua

Vítima VCV halo tratamentu intensivu iha HNGV, Domingu (12/10/2025). Imajen/Rafa.tl

DILI, RAFA.tl– Membru Polísia Nasionál Timor-Leste (PNTL)  ida ho diviza Ajente-Xefe Polísia ho insiál JLO tiru kanek nia kaben ho inisiál VCV ne’ebé ho kondisaun isin-rua (gravida).

Insidente ne’ebé akontese iha sira-nia rezidénsia iha Aimutin, Aldeia São José, Suku Comoro, Postu Administrativu Dom Aleixo, Munisípiu Dili, deskonfia kauza husi Ajente-Xefe Polísia ne’e konsumu tua to’o lanu.

Vitíma VCV ne’ebé Domingu (12/10/2025),  hala’o hela tratamentu intensivu iha Ospitál Nasionál Guido Valadares (HNGV, sigla portugés), haktuir ba jornalista sira katak nia kaben  Ajente-Xefe Polísia JLO hala’o hela nia servisu iha Postu Polísia ne’ebe lokaliza iha Timor Plaza, iha Domingu madrugada  tuku 04:00 Otl, ho nia  feton ida, halai liuhosi sira-nia uma oin no vítima VCV  sai ba hasoru, husi ne’e hahú diskute  malu no derrepente deit membru ne’e hasai pistola tiru kedas ba vítima iha parte ain loos.

“Bainhira ami ba  Timor Plaza ne’e diak hela no ami lori alin ho prima ba tiha, depois tuku 00:00 kalan fahe-rua, ami fila tiha hatun ami iha uma, depois nia ba fali festa iha salaun OCA. Ha’u mós la hatene, ne’ebé ha’u toba tiha, nia fila mai bolu ha’u, ha’u larona, ne’ebé ha’u nia ama rona, bolu ha’u sai ba hasoru nia fila karreta nia feton halai uluk tiha ona. Tanba haree nia mai ho lanu hanesan ne’e, entaun nia maun para karreta nia haruka  tun, nia dehan haruka atu koñese malu ho ha’u nia família ne’ebé nia maun lakohi tanba kalan bo’ot ona, aban rai-loron ba mak ita mai hasoru, agora tuku 03:30 madrugada ona, ne’ebe deskute malu hanusá nia hasai pistola karrega tiru kedas mai iha ha’u nia ain loos,” vítima VCV haktuir.

Vítima nia kondisaun daudaun ne’e isin-rua (gravida) no ain parte loos la di’ak no sei fó mós impaktu ba nia saúde ho bebe iha knotak tanba ne’e nia hakarak lori kazu ne’e ba oin.

“Kau ne’e ha’u levanta ba oin atu bele hetan justisa,” VCV hateten.

Daudaun ne’e Komandu PNTL Munisípiu Dili asegura no detein ona Ajente-Xefe Polísia JLO iha sela Eskuadra Polísia Dom Aleixo hoisd kumpre detensaun  oras 72 no tuir mai aprezenta kazu ne’e ba Ministériu Públiku (MP).

Komandu Jerál PNTL liu husi Diresaun Investigasaun Kriminal Nasionál halo ona investigasaun ba membru Polísia  ho inisiál JLO hodi nutifika ho Numeru Uniku Krime (NUK) 0325/25 PNSIC, ba asaun ne’ebé  membru ne’e komete.

Reportajen ekipa Rafa.tl