Liga Femenino, S’amuser F.C Kontinua Rekolla Pontu Tolu Hafoin Halakon V.D.L F.C ho Skor 6-0

S’amuser F.C manán V.D.L F.C ho skor 6-0 iha jornada 17 Liga Timorense Futeból Femenino (LTFF), Domingu (15/03/2026). Imajen/Rafa.tl

DÍLI, RAFA.tl– Ekipa S’amuser F.C kontinua rekolla pontu tolu iha jornada 17 Liga Timorense Futeból Femenino (LTFF) hafoin halakon V.D.L F.C ho skor 6-0.

Notísia Relevante: UNITAL F.C Lakon ho Skor 1-8, Jogadora Buibere F.C Carla Patinasarany Halo Quintrick

Bainhira hahú jogu ne’ebé hala’o iha Kampu Federasaun Futeból Timor-Leste (FFTL), Domingu (15/03/2026), ekipa S’amuser F.C domina kedas jogu hodi halo presaun ba ekipa  V.D.L F.C. nune’e, iha de’it minutu tolu, jogadora Dolores da Costa husi S’amuser F.C marka golu dahuluk hodi hatuur skor ba 1-0.

Hafoin golu ne’e, ekipa rua mantein ho tátika ne’ebé iha no lansa kontra atake ba malu hodi kria oportunidade kria golu. S’amuser F.C kontinua hatama golu ba nia adversáriu V.D.L F.C liu husi jogadora Nívia Guterres iha minutu 20 hodi muda skor ba 2-0.

S’amuser F.C kontinua domina jogu, nune’e tama ba minutu 23  marka tan golu ida liu husi jogadora Perelia Soreano hodi muda skor ba 3-0.

Ekipa V.D.L F.C halo tranzisaun ba tátika hodi halo balansu iha jogu, nune’e bele halo presaun ba ekipa S’amuser no hakarak hatama golu, maibé sei falla.

Ekipa rua kontinua halo jogu ida atrativu ho tátika ne’ebé iha, to’o primeira parte termina S’amuser F.C mantein lidera ho skor 3-0.

Iha segunda parte, jogu foin hahú de’it minutu rua ekipa S’amuser F.C aproveita fallansu ne’ebé adversáriu iha no jogadora Letícia Soares marka kedas golu hodi muda skor ba 4-0.

Iha jogu, S’amuser F.C kontinua domina jogu no tama ba minutu 49 jogadora Cerlin Aurélia aumenta tan golu ida ba nia ekipa hodi muda skor ba 5-0.

Hafoin sofre golu dalima, ekipa V.D.L F.C tenta hadi’a performa no halo jogu ida ho kuidadu atu bele iha balansu ba jogu.

Tama ba minutu 56 ekipa S’amuser kontinua aumenta golu liu husi jogadora Dolores da Costa hodi muda skor ba 6-0.

Hafoin golu ne’e ekipa rua mantein ho tátika no jogu hahú iha balansu hafoin V.D.L F.C halo substituisaun ba jogadora sira.

To’o segunda parte termina ekipa S’amuser F.C mantein lidera ho skor 6-0, no V.D.L F.C obrigadu tenke simu derota hodi hein jogu tuir mai iha jornada 18, LTFF.

Tuir oráriu jogu  Liga femenino,  Kinta, 19 fulan-Marsu, ekipa V.D.L F.C sei kontra Akadémika F.C iha kampu FFTL, 19:00 OTL.

Reportajen ekipa Rafa.tl