Liga Femenino, Na’in Feto F.C Halakon Adversáriu V.D.L F.C ho Skor Fantástiku 9-0

Na’in Feto F.C halakon adversáriu V.D.L F.C ho skor fantástiku 9-0 iha jogu Liga Timorense Futeból Femenino, Kinta (26/02/2026). Imajen/Rafa.tl

DILI, RAFA.tl-Kontinuasaun jogu Liga Timorense Futeból Femenino ne’ebé hala’o iha Kampu Federasaun Futeból Timor-Leste (FFTL), Kinta (26/02/2026), ekipa Na’in Feto F.C halakon adversáriu V.D.L F.C ho skor fantástiku 9-0.

Ekipa Na’in Feto F.C hatudu kedas nia superioridade iha jogu dahuluk primeira parte hahú hodi domina kedas jogu no halo presaun ba adversáriu hodi buka oportunidade atu halo golu.

Iha esforsu sira ne’ebé ekipa Na’in Feto F.C halo ikus mai rezulta golu dahuluk iha minutu 13 liu husi jogadora Anisya Widyawati.

Ekipa V.D.L F.C koko halo balansu, maibé falla iha kombinasaun jogadra sira iha liña kotuk, nune’e tama ba minutu 22, jogadora Siti Rusdiana Retno Sari aumenta tan golu ida hodi muda skor ba 2-0.

Liu de’it minutu tolu, no tama ba minutu 25, jogadora Siti Retnosari kontinua hatudu nia kualidade jogu hodi marka golu ida no muda skor ba 3-0.

Ekipa Na’in Feto F.C kontinua aumenta golu iha minutu 31 liu husi jogadora Ravina Neno. hodi muda skor ba 4-0.

Tama ba minutu 35, Na’in Feto F.C haboot liutan sira nia skor 5-0 liu husi jogadora Alen Tria Ferlika. Hafoin golu ne’e, Na’in Feto F.C kontinua domina jogu iha kada liña no haré katak V.D.L F.C falla halo balansu ba jogu nune’e Na’in Feto F.C kontinua aumenta tan golu rua liu husi jogadora Livânia Neno iha minutu 37, no Azia Isabel Bria iha minutu 43 hodi muda skor ba 7-0.

Tama ba segunda parte, Na’in Feto F.C kontinua domina jogu, maibé V.D.L F.C tenta sai husi presaun hodi lansa mós kontra atake, maibé falla iha ezekusaun sira.

V.D.L F.C kontinua halo mudansa ba estratéjia no halo substituisaun ba jogadora sira hodi halo atake ba adversáriu.

Tama ba minutu 65, jogadora Siti Rusdiana Retno Sari marka hattrick hodi muda skor ba 8-0 no molok jogu segunda parte termina ekipa Na’in Feto F.C liu husi jogadora Siti Rusdiana Retno aumenta tán golu ida hodi muda skor ba 9-0 no golu ne’e mak lori vitória ba Na’in Feto F.C.

Tuir oráriu, jogu Liga Femenino iha Sesta (27/02/2026),  iha jogu kontinuasaun entre ekipa S’amuser F.C ho Maranatha F.C.

Iha loron tuir mai,  Sábadu (28/02/2026), ekipa Kulugisa F.C sei kontra AD. S.L.B Laulara.  Nune’e mós iha Domingu, Akadêmika F.C sei kontra UNITAL F.C no Buibere F.C sei hasoru Maudoko F.C.

Reportajen ekipa Rafa.tl