Liga Femenino, Maranatha F.C Susesu Halakon V.D.L F.C ho Skor 4-0

Ekipa Maranatha F.C. Imajen/Liga Timorense de Futebol Feminino

DILI, RAFA.tl – Iha jogu kontinuasaun Liga Timorense Futeból Femenino ne’ebé hala’o iha Kampu Federasaun Futeból Timor-Leste (FFTL), Sábadu (07/03/2026), ekipa Maranatha F.C halakon nia adversáriu ekipa V.D.L F.C ho skor 4-0.

Notísia Relevante: Nain Feto F.C Fahe Pontu Hanesan ho Acadêmica F.C ho Skor 1-1

Hahú  jogu primeiru parte, ekipa Maranatha F.C no V.D.L F.C halo kedas kontra atake ba malu.  Ekipa rua halo jogu ho intensidade maka’ás no ekipa Maranatha F.C hetan uluk oportunidade liu husi suta maka’ás ida ne’ebé avansadu halo, maibé guardarede V.D.L F.C salva bola ho di’ak.

Ekipa rua kontinua halo jogu ida atrativu  no Maranatha F.C hatudu sira nia performa furak hodi domina  jogu, maibé seidauk bele  kolleta golu.

Ekipa rua kontinua halo kontra atake ba malu, maibé to’o primeira parte termin,a ekipa rua mantein ho skor 0-0.

Kontinua ba segunda parte, iha minutu 60, jogadora Maranatha F.C, Barbalina Salempessy konsege marka golu ida hodi muda skor  ba 1-0.

Ekipa Maranatha F.C kontinua hatudu nia superioridade hodi marka golu daruak iha minutu 73 liu husi jogadora Ratri Titania no muda skor ba 2-0.

Maranatha F.C kontinua domina jogu no halo ataka ba V.D.L F.C, no iha minutu 86 Maranatha F.C kontinua hatama golu liu husi jogadra Losalina Wenda hodi muda skor ba 3-0.

Maranatha F.C kontinua aumenta golu iha minutu 88 hodi muda skor ba 4-0 liu husi jogadora Nofa Sofi Pertiwi no golu ne’e mak lori vitória ba Maranatha F.C,  nune’e  V.D.L F.C obrigadu tenke simu derota.

Tuir orariu, iha kontinuasaun Liga Timorense Futeból Femenino, Domingu, 08 fulan-Marsu ne’e, ekipa Maudoko F.C sei hasoru nia adversáriu S’amuser F.C,  no AD SLB Laulara sei kontra Buibere F.C iha tuku 16:00 OTL.

Reportajen ekipa Rafa.tl