Laiha Problema Konstitusionál, Prezidente Repúblika Promulga OJE 2026 Billaun US$2,291

Prezidente Repúblika, José Ramos-Horta. Imajen/Média G-PR

DILI, RAFA.tl– Prezidente Repúblika, José Ramos-Horta, Kinta (27/11/2025), promulga ona Orsamentu Jerál Estadu (OJE) tinan 2026 ho montante billaun US$2,291.

Notísia Relevante: FRETILIN-PLP Mantein ho Votu Abstensaun, OJE 2026 Billiaun US$2.291 Aprova iha Finál Globál

Iha OJE 2026 ne’e fahe ba kategoria Saláriu no Vensimentu US$476,870,249, Bens no Servisu Korrente US$447,904,446, Transferensia Públika US$820,710,160, Kapital Menor US$32,556,96 no Kapital Dezenvolvimentu US$436,647,379.

Prezidente Repúblika, José Ramos-Horta ba jornalista sira iha Palásiu Prezidensiál, hateten hafoin simu  lei Orsamentu Jerál Estadu 2026 husi Prezidente Parlamentu Nasionál, Maria Fernanda Lay, Kinta-ne’e, iha Palasiu Prezidensial, nia parte promulga direta tanba durante ne’e nia akompañia hela prosesu debate OJE 2026 iha Parlamentu Nasionál.

“Ohin, ha’u simu Prezidente Parlamentu Nasionál Maria Fernanda Lay ne’ebé entrega lei orsamentu Jeral Estadu 2026, ohin kedan, iha nia oin, ha’u asina tiha ona ka  promulga tiha ona,” Prezidente Repúblika José Ramos-Horta hateten.

Xefe Estadu afirma,  akompañia prosesu OJE 2026 iha fulan ida nian laran, no haree katak debate la’o  dadaun no proposta OJE husi  Governu bá Parlamentu Nasionál ne’e fulan-Agostu hahú kedan ona, depois tama ho tama Prezidente Repúblika iha kopia OJE no akompañia, entaun haree laiha problema konstitusionalidade.

“La presiza haruka bá jurista sira mós ha’u hatene, entaun haree liña jerál orsamentu nian detallu, balu ha’u konkorda ne’ebé alokasaun orsamentu sira ne’e,” Ramos-Horta hateten.

Tuir Prezidente Repúblika nia haree ezekusaun orsamentál iha tinan 2025  maka’as iha área  infraestrutura hanesan estrada nasionál no estrada rurál, eskola no mós kanalizasaun bee iha setór agrikultura no mós telekomunikasaun.

“Buat sira ne’e ha’u lee hanesan ema ne’ebé hatene lee Orsamentu Jerál Estadu, tanba ne’e mak kuandu Prezidente Parlamentu Nasionál lori mai ha’u koñese tiha ona, no ohin kedan ha’u asina para lalika lakon tan tempu,” Ramos-Horta tenik.

Nia haré mós ba OJE 2026  ne’e laiha problema ho orsamentu ne’ebe aloka bá iha setór produtivu sira.

Reportajen ekipa Rafa.tl