Kualifikasaun AFC ASEAN Cup 2027, Selesaun Nasionál Halo Preparasaun Hasoru Maldivas

Selesaun Nasionál hahú halo preparasaun haosu Malidivas iha kualifikasaun AFC ASEAN Cup 2027. Imajen/Rafa.tl

DÍLI, RAFA.tl– Ekipa Selesaun Nasionál Timor-Leste hahú halo preparasaun ba jogu kualifikasaun AFC ASEAN Cup 2027 hasoru Maldivas loron 31 Fulan-Marsu, iha Sidade Maldivas.

Preparasaun Ekipa Selesaun Nasionál Timor-Leste ne’e hala’o iha kampu Federasaun Futeból Timor-Leste, liu-liu iha treinamentu tátika para bele maximiza kondisaun téknika ne’ebé jogadór sira iha hodi enfrenta jogu hasoru ekipa Maldivas.

Treinadór Selesaun Nasionál,  José Pedro Alves Salazar, ba Rafa.tl iha kampu FFTL, Sesta (13/03/2026), hateten selesaun ba ekipa Nasionál maioria  mai husi jogadór sira husi klube ne’ebé joga iha Taça da Liga, no iha treinamentu ne’e ekipa  foku liubá tátika oinsá halo defeza iha área no halo atake ka ofensivu.

“Preparasaun ne’e ha’u identifika mós jogadór husi Taça da Liga, ne’e mak ha’u halo selesaun, mantein nafatin servisu maka’as iha treinu loron ba loron ho intensaun bele forma grupu forte ida para bele ba hasoru Maldivas, ba ho objetivu no alvu labele finaliza iha últimu lugar, pelumenus finaliza grupu ne’e iha terseiru lugar,” José Pedro Alves Salazar hateten.

Treinu ne’e foku liubá prosesu defensivu, oinsá ekipa atu defende no fó hanoin malu ho tátika sira.

Treinadór ne’e hatutan, dezde nia prezensa halo ona re-estruturasaun ba Ekipa Selesaun Nasional hodi foma ekipa ne’ebé forte hodi hasoru jogu kualifikasaun AFC ASEAN Cup.

Nia informa, Selesaun Nasionál preparadu liu husi fízika no vontade no ekipa Selesaun Nasionál mós  maioria barak liu husi Klubu Emmanuel no Karketu.

“Jogadór Timor oan normalmente fizikamente sempre iha desponibilidade iha vontade halai 50 minutus, 90 minutus, oras ida, oras rua, pois ami junta ho fízika  para sira nia parte tátika, parte téknika, parte mentál, nune’e sempre iha vontade hodi forma fízika di’ak ida hodi bele hasoru ekipa sira ne’e.  Kuaze ekilibradu, kuaze Jogadór hirak husi klubu balun, barak husi Taça da Liga maibé dominante liu mak Emmanuel F.C ho  Karketu Díli, sira na’in rua mak iha jogadór barak liu, maibé iha ida husi Santa Kruz  F.C, ida husi Portu Taibessi, entaun ekilibradu oituan,”  nia haktuir.

Selesaun Nasionál Timor-Leste iha tinan ne’e sei la reforsa husi jogadór importante balun hanesan, Olegar Malik Xavier husi klubu Karketu Díli F.C, Luís Figo P. Ribeiro, husi klubu AD. SLB. Laulara, Aniso  M. Boavida  husi DIT F.C, no Palomito Ribeiro, husi Emmanuel F.C, tanba sira rasik deside hodi hala’o knaar seluk hodi tama Akademia PNTL.

Selesaun Nasionál ne’ebé treinadór no ekipa tékniku sira prepara sei reforsa mós ho Jogadór Timor oan sira iha diáspora, hanesan Gali Freitas, Zenívio Gustavo, João Pedro  no mós sira seluk.

Iha kualifikasaun Taça Ásia AFC 2027 ronde datoluk, Timor-Leste iha grupu A  ne’ebé hamutuk ho Tajikistan, Maldivas no Filipina.

Ekipa Selesaun Nasionál sei aranka iha loron 28 fulan-Marsu, hodi joga kontra ekipa Selesaun Nasionál Maldivas.

Reportajen Ekipa Rafa.tl