KTON Esporta Kafé Espesiál Tonelada 11.80 husi Timor Ba Estadus Unidus Amérika

DILI, RAFA.tl– Empreza nasionál Kafé Timor Orgániku no Naturál ho sigla KTON orgullu bele esporta badala-uluk kafé kualidade espesiál ho tonelada 11.80 ba Estadus Unidus Amérika. KTON nu’udár empreza subsidiária ba grupu Esperança Timor Oan – ETO halo esportasaun dala-uluk ba KTON nia produsaun kafé espesiál husi Timor ba Estadus Unidus Amérika.

Reprezentante empreza KTON, Aleixo da Costa ba Rafa.tl iha Sede Torreto, Mandarin, Dili, Sesta (14/11/2025) hateten, sira-nia parte halo prosesu ba esportasaun kafé husi Timor-Leste, ba empreza Amerikanu ida ne’ebé maka foka ba importasaun kafé espesiál iha Amérika.

Aleixo da Costa  esplika exportasaun kafé espesial ne’e sira prosesa ho aprosimasaun ho prosesu post-harvest (pós-kolleita) ne’ebé inovativu no espesial hodi bele atrai kompañia Amerikanu ne’e nia interese.

Kompañia ne’ebé maka deside sosa kafé ne’ebé KTON prosesa ne’e liu husi prosesu naruk ida, no sira rasik husi Amérika mai halao observasaun ba prosesu produsaun iha KTON nia fabrika iha Postu-Administrativu Gleno, Munisípiu Ermera, no mós lori exemplu kafé KTON ba halo teste iha sira-nia laboratóriu iha Estadus Unidus Amérika molok sira deside atu importa ba rai Amérika kafé espesiál ne’ebé produs husi KTON.

Empreza internasional husi Estadus Unidus Amérika ne’e rasik deside hola produsaun kafé KTON tamba rezultadu análiza laboratóru  demostra katak kafé espesiál ne’ebé prosesa husi KTON tama duni nivel kafé espesiál tuir kategoria padraun kafé espesiál.

“Husi inspesaun no vizita ne’ebé sira mai haré rasik ita-nia prosesamentu iha ita-nia instalasaun iha Manisu Gleno, sira rasik mai akompaña iha ita-nia fatin produsaun iha Gleno, ne’ebé maka sira konsidera kumpre duni sira-nia padraun kualidade nian, no reforsa tan ho rezultadu análize laboratóriu iha sira-nia rai ba exemplu ne’ebé ita manda ba, ho nune’e, maka sira rasik hakarak sosa kafé husi KTON atu utiliza iha sira-nia merkadu ba kafé espesiál iha sira nia rain,” Aleixo  da Costa esplika.

Nia dehan, distribuisaun ida ne’e badala-uluk entre kompañia Internasionál iha Amérika ho Kompañia KTON ne’ebé konsentra iha kafé espesiál, la’ós kafé komersial, liu husi esportasaun dala-uluk ba kafé espesiál.

“Ita sei buka esforsu atu hasae produsaun kafé espesiál atu bele esporta ho kuantidade ne’ebé boot, tan ne’e, ami nia empreza  KTON sei tau atensaun másimu ba parseiru sira, liu liu agrikultor kafé sira, atu bele hasae kualidade kafé Timor atu bele habot ita-nia kuatidade esportasaun kafé espesiál ba rai Amerika.”

“Ita hatene durante ne’e ita esporta kafé barak ba li’ur, maibe kafé ne’ebé ita esporta kafé komersiál ne’ebé la’ós konsideradu kafé espesiál, tan ne’e koopersaun ne’ebé ami iha ona ho empreza Amerikana ne’e ita sei buka atu mantein parseria ne’e atu sira bele sosa nafatin ita-nia kafé espesiál hodi promove ita-nia kafé nia kualidade iha merkadu mundiál ba ita-nia kafé espesiál,” Aleixo da Costa afirma.

KTON mós dadaun ne’e simu tan kontaktu husi kompañia internasionál iha nasaun tolu seluk ne’ebé interese atu sosa KTON nia kafé espesiál, maibé KTON rasik seidauk bele responde tanba tinan ida nu’udár badala-uluk KTON hahú nia esportasaun kafé espesiál, tan ne’e KTON sei habot produsaun kafé nia kuantidade ba kafé espesiál iha produsaun tinan oin ho servisu hamutuk ho agrikultor kafé sira.

“Iha tinan ida ne’e la’ós  Amérika deit maka husu, iha nasaun tolu seluk ne’ebé maka sira kontaktu ona ami nia empreza KTON, sira hetan informasaun husi ema balun sobre ita-nia produsaun, tan ne’e, sira kontaktu KTON, maibé KTON seidauk bele responde tanba ita-nia kuantidade kafé spesiál sei  menus loos,” nia hateten.

KTON rasik iha kompromisu boot atu konsentra iha produsaun kafé espesiál atu bele foti hikas Timor nia naran iha mundu internasionál ba kualidade kafé espesiál, tan tinan barak Timor orientadu liu iha esportasaun kafé komersiál ne’ebé halo naran kafé Timor lakon iha nivel  konsumu kafé espesiál ne’ebé nia valor no prestijiu boot, tan ne’e, kooperasaun ho empreza Amerikana ne’ebé foku iha importasaun kafé espesiál  KTON tenke halo esforsu boot liután iha rai-laran atu nune’e bele garante kualidade ba iha merkadu internasionál no nasionál.

Molok ne’e,  Diretór Relasaun Externa no Marketing TradeInvest Timor-Leste, Roberto Lay hateten, Timor oan tenke orgullu tanba ba dala-uluk Timor-Leste hatama kafé ho nivel espesialidade ba Estadus Unidus Amérika.

“Ba Amérika ita hatene merkadu ida ne’ebé maka la fasil ita atu tama para fa’an ita nia produtu, hanesan ajénsia investimentu no promosaun esportasaun nian, ami halo papel atu fasilita tanba ne’e ba dala-uluk ba kompañia atu prienxe sertifikasaun ne’ebé presiza depois mós sertifikasaun ne’ebé mai husi liña ministeriál sira,” Roberto Lay ba Rafa.tl iha armazen ASL iha Tibar, Postu Administrativu Bazartete, Munisípiu Liquiça.

Nia afirma KTON hanesan empreza subsidiária ida iha grupu ETO ne’ebé iha negosiu iha área diferente lubuk ida no  antes ne’e sira mós fó ona apoiu ba investimentu  bé GOTA no ba KTON foin dala-uluk.

TradeInvest Timor-Leste mós orgullu ho empreza KTON mésmu sira la halo buat boot, maibé iha buat kiik ne’ebé bele halo ho susesu ho esperansa katak ba futuru sei bele aumenta tan kuantidade kafé espesiál.

“TradeInvest orgullu tebes tanba ita bele konsege fasilita, la’ós buat boot ida, mais ami halo buat kiik oan deit no ohin loron ita asiste hotu kedas labarak, maibé metade husi kontentór ohin dehan tonelada 11 deit, mais ba oin ami fiar katak nia  kuantidade bele aumenta,” Roberto Lay hateten.

KTON rasik la iha duvida ho servisu KTON nia tanba nain husi emprezáriu nasionál, Nilton Telmo Gusmão dos Santos ne’ebé hahú negósiu husi buat kiik no ohin loron bele diversifika ona negósiu ba iha área oi-oin, tanba ne’e TradeInvest Timor-Leste rasik kontínua kolabora ho sira fó asisténsia.

“Ba futuru Governu bele fasilita tan kria enkuadramentu legal ida ne’ebé maka bele apoiu setór privadu hodi bele ajuda sira hodi asesu ba merkadu internasionál,” Roberto Lay kompromete.

KTON nia kompromisu mak dedikadu atu kria kafé esepsionál ne’ebé reflete patrimóniu riku Timor-Leste nian.

KTON nu’udár empreza ne’ebé 100% na’in ba Timor-oan ho nia kompromisu ba kualidade, inovasaun no sustentabilidade.

Exportasaun kafé espesiál KTON ne’e hetan apóiu másimu husi empreza inan ETO no mós TradeInvest Timor-Leste.

Partisipa iha serimonia xave kontentór esportasaun kafé Timor espesiál  ba Estadus Unidus Amérika ne’e, dirijente sira empreza KTON, TradeInvest Timor-Leste ho mós Diresaun Nasionál Bio Seguransa no Quarentena Timor-Leste.

Reportajen ekipa Rafa.tl