Komandu Jerál F-FDTL Detein Membru Polísia Militár Ne’ebé Envolve iha Dezentendimentu ho SEATOU

Xefe Estadu Maiór Jenerál F-FDTL, Tenente Jenerál, Domingos Raúl “Falur Rate Laek” . Imajen/Rafa.tl

DILI, RAFA.tl – Komandu Jenerál FALINTIL-Forsa Defeza Timor-Leste (F-FDTL), liu husi Unidade Polísia Militár, detein ona membru Polísia Militár ne’ebé envolve dezentendimentu ho Sekretáriu Estadu Toponímia no Organizasaun Urbana (SEATOU), iha área Becora, foin lalais ne’e.

Xefe Estadu Maiór Jenerál F-FDTL, Tenente Jenerál, Domingos Raúl “Falur Rate Laek” hatete,  nia haruka ona ordem ba Komandu Unidade Polísia Militár hodi halo detensaun ba membru Polísia Militár ne’ebé enovlve iha dezentendimentu ho ekipa ervisu SEATOU nian iha terenu, liu-liu iha área Becora.

“Agora ha’u fó ordem para halo detensaun, tanba momentu ne’e ekipa Polísia Militár halo aborda, kaer kedas lori ba, agora iha hela detensaun, iha prosesu inkéritu investigasaun nia laran, ha’u simu sira nia relatóriu no despaixu submete ba segunda faze prosesu justisa,” Tenente Jenerál Falur Rate Laek ba Jornalista sira iha Sentru Instrusaun  Prezidente Nicolau Lobato, Metinaro, Sesta (30/01/2026).

Xefe Estadu Maiór Jenerál F-FDTL ne’e hasai ona despaixu ba Unidade Polísia Militár atu halo investigasaun ho lalais ba membru Polísia Militár ne’e, hodi bele foti medida justisa ba membru refere.

“Prosesu primeiru kuandu sira halo aborda krime iha ne’ebá, entaun halo investigasaun ho deklarasaun haruka ba, depois to’o iha ha’u nia fatin, ha’u despaixu  fali para depois forma segunda faze halo justisa, ne’ebé ha’u haruka detein iha ne’ebá halo justisa imediatu,” Tenente Jenerál Falur hateten.

Falur Rate Laek esplika, molok membru sira  atu sai militar sempre liu husi Sentru Instrusaun Preizdente Nicolau Lobato, Metinaro, nune’e hanorin hotu oinsá sai militár ida ne’ebé di’ak serbí nia povu no nasaun.

Tenente Jenerál subliña, forsa armada nu’udar solusaun ba problema hodi realiza objetivu independénsia  ba dezenvolvimentu, tanba ne’e forsa armada kontinua apóiu servisu SEATOU bainhira hetan ameasa, presiza seguransa sempre apóiu.

Reportajen ekipa Rafa.tl