Julgamentu Kazu Grand Dragon Lotaria, Tribunál Aplika Medida Aprezentasaun Periódika Ba Jerente Na’in-tolu

Autoridade seguransa ho advogadu privadu sira akompaña arguidu na'in-tolu nu'udár jerente Grand Dragon Lotaria iha Tribunál Judisiáriu Primeira Instánsia Dili, Sábadu (06/12/2025). Imajen/Rafa.tl

DILI, RAFA.tl– Tribunál Judisiál Primeira Instánsia Dili (TJPID), Sábadu (06/12/2025), liuhosi audénsia julgamentu primeiru interogatóriu hatun despaixu hodi aplika medida aprezentasaun periódika ba jerente na’in-tolu husi empreza Grand Dragon Lotaria.

Notísia Relevante: Xanana Deklara Intervensaun Ba Lotaria Grand Dragon Hanesan Xefe Governu

Jerente Grand Dragon Lotaria na’in-tolu ho inisiál NGT, VJ ho MFDPM sai  arguidu no hetan detensaun husi autoridade Polísia hafoin buska no apreensaun ne’ebé bazeia ba mandadu Ministériu Públiku ho NUC.0389/2025.PNSIC, iha loron Kuarta 03 fulan-Dezembru  tinan 2025, hale’u tuku 16:10 Otl, tanba deskonfia pratika jogu online ka online scamming.

Autoridade Polísia halo buska no apreensaun ba empreza Grand Dragon Lotaria no detein jerente na’in-tolu ne’e iha sela detesaun Polísia durante oras 72 nia laran molok aprezenta ba julgamentu primeira interogatóriu iha Tribunál Judisiál Primeira Instánsia Dili (TJPID).

Durante audénsia julgamentu primeiru interogátoriu ne’e, Tribunál konfirma ba arguidu na’in-tolu  hodi hato’o deklarasaun ruma bá Tribunál, maibé arguidu sira hili dalan nonók.

Iha alegasaun Ministériu Públiku  husu Tribunál atu aplika medida  proibisaun aujénsia no medida koasaun US$10,0000.00 ba  arguidu sira,  tanba konsidera  prátika krime jogu ilegál ka online scamming ho krime brankeamentu kapitál. Maibé, parte defeza ne’ebé fasilita asisténsia legal husu Tribunál atu aplika Termu Identidade  Rezidénsia (TIR) tanba jogu  Grand Dragon Lotaria legál, no iha dokumentu komprovadu hetan lisensa husi Governu liuhosi Inspetoria Jerál ba Jogu (IGJ, sigla portugés) no kontribui reseita ba Estadu RDTL liuhosi selu taxa.

Rona tiha parte hotu, Tribunál hatun despaixu hodi aplika Aprezentassun Periódika, durante  fulan-haat ba arguidu  na’in-tolu ne’e.

Hafoin  audénsia primeiru interogatáriu ne’e, Tribunál ho parte Defeza asina karta libertasaun ba arguidu na’in-tolu, nune’e parte seguransa akompaña arguidu na’in-tolu ba hasai faru detensaun iha Komandu Jerál Polísia Nasionál Timor-Leste (PNTL).

Audénsia ba julgamentu primeira interogátoriu ne’e prezide husi Juiza Julmira  Auxiliadora, Ministériu Públiku reprezenta husi Prokuradór Rafael Gusmão  ho João Marques,  nune’e arguidu na’in-tolu hetan asisténsia legál husi  advogadu privadu José Ximenes.

Reportajen ekipa Rafa.tl