Investimentu Parque Industriál ETO iha Manatuto Tulun Hasa’e Kresimentu Ekonómiku Timor-Leste

CEO ETO Nilton Gusmão nia espoza Cidália dos Santos akompaña mós husi PM Xanana hatuur fatuk-inan ba investimentu parque industriál ETO nian iha Manatuto, Segunda (30/03/2026). Imajen/Rafa.tl

MANATUTO, RAFA.tl– Prezidente Câmara Comércio Indústria Timor-Leste (CCI-TL), Jorge Manuel de Araújo Serano, parabeniza grupu empreza Esperança Timor Oan (ETO) ne’ebé iha kompromisu no dedikasaun hodi halo investimentu parque industriál iha Munisípiu Manatuto, atu tulun hasa’e kresimentu ekonómiku Timor-Leste ba futuru.

Notísia Relevante: Investimentu Parque Industriál ETO iha Manatuto La’ós De’it Ba Negósiu Maibé Kontribui Dezenvolvimentu Nasionál

Prezidente CCI-TL, Jorge Manuel de Araújo Serano, iha sesaun faze interativu iha lansamentu fatuk dahuluk ba Parque Industriál iha  Beadi, Aldeia Carlilo, Suku Aiteas, Postu Administrativu Manatuto, Segunda (30/03/2026), apresia  ho CEO Empreza ETO Nilton Telmo Gusmão dos Santos ho espoza Cidália dos Santos  no família hotu tanba investimentu ne’e hatudu kompromisu setór privadu nian atu kontribui ba dezenvolvimentu ekonomia nasional, liu-liu iha área rural sira.

Emprezariu Timoroan ne’e konsidera katak prezensa empreza ETO iha Aiteas-Manatuto bele kria oportunidade servisu foun ba komunidade lokal no hadi’a rendimentu família sira nian.

Projetu invesrtimentu ETO nian iha Parque Industriál Manatuto ne’e reprezenta investimentu entre millaun 13 to’o millaun 15 dolar amérikanu.

Durante faze konstrusaun, estimasaun hatudu katak sei kria postu servisu  entre 150 to’o 200 ho previzaun atu remata iha fulan-Agostu tinan oin.

Iha faze operasaun fabrika sira, prevé kria empregu ba jovens entre  na’in-600 to’o na’in- 700 direta no besik na’in-1.300 empregu indiretu.

Projetu ne’ebé ETO promove  ho apoiu Autoridade Munisipál Manatuto, inklui instalasaun unidade industriál lima, hanesan fabrika produsaun kaixa no fabrika estrutura metáliku H-Beam. Iha parque industriál ne’e sei harí mós fabrika prosesamentu sardina enlatada, matadouro no industria prosesamentu na’an, no fabrika benefisiamentu háre.

“Investiemntu negosiu iha ne’e iha buat rua, risku ho reseita. Ohin, señor Nilton hatudu nia korajen, nia hatudu iha nia vizaun ho konsisténsia, entaun realiza investimentu ida ne’e. Ha’u ladehan katak ne’e negosiu, ne’e risku ne’ebe foti, husu ita hotu fo parabéns ba nia,” Jorge Serano hateten.

Prezidente CCI-TL afirma todan teb-tebes hanesan setór privadu, ohin hotu-hotu iha ne’e basa-liman, mas Señor Nilton fila ba ho nia espoza halo konta depois saida mak sei akontese, sasan sira ne’e tenke haré ho sériu tanba investimentu sériu ho responsabilidade ho risku,  hatene jere risku para depois bele atinje reseita ho sira seluk.

Jorge Sereno argumenta liután katak, risku sira ne’e hanoin CEO ETO hatete ona, fiar katak konstrusaun ne’e la’o, sei multiplika buat barak ba sira ne’ebe fa’an fatuk, fa’an rai-henek, trabaladór sira no prosesu ida ne’e, karik komunidade balun iha ne’e loke restorante no buat ki’ikoan sira ne’e ajuda traballadór sira no mós ne’e fó impaktu multiplikativu ba Manatuto no ba mós ba nasionál.

“Ha’u ohin tur iha ne’e orgullu katak setór nasionál komesa gaiña konfiansa atu foti dadauk ona responsabilidade investimentu sira ne’e,” Nia subliña.

Nia mós husu ba autoridade munisipál no Manatuto oan hotu tenke apoiu ba investimentu ne’ebé ETO halo, no liu-liu komunidade iha Suku Aiteas, tenke simu ho di’ak investimentu ne’e, ho esperansa katak sei lori mudansa positiva ba infraestrutura lokal, edukasaun no kondisaun moris povu sira.

Reportajen ekipa Rafa.tl