Investimentu Parque Industriál ETO Hatudu Sinal Pozitivu Ba Poder Lokál Manatuto

Serimónia lansamentu Parque Industrial ETO iha Aldeia Carlilo, Suku Aiteas, Postu Administrativu Manatuto Vila, Munisípiu Manatuo, Segunda (30/03/2026). Imajen/Rafa.tl

MANATUTO, RAFA.tl– Prezidente Autoridade Munisípiu Manatuto, Luís Fernandes, hateten ho investimentu parque industriál ne’ebé inisia husi empreza grupu Esperança Timor Oan (ETO) hatudu sinál pozitivu ba desentralizasaun no  Podér Lokál iha Manatuto.

Notísia Relevante: ETO Hahú Konstrusaun Fabrika Lima Iha Parque Industrial Foun Manatuto

Prezidente Autoridade Munisípiu Manatuto, Luís Fernandes, haktuir iha nia liafuan bemvindu ba konvidadu sira iha  serimónia lansamentu parque industrial ETO ne’ebé realiza iha zona industriál Beadi, Aldeia Carlilo, Suku Aiteas, Postu Administrativu Manatuto Vila, Munisípiu Manatuo, Segunda (30/03/2026) .

Luís Fernandes ho satisfasaun boot hodi povu Manatuto nia naran hatoo bemvindu ba Primeiru-Ministru Kay Rala Xanana Gusmão hamutuk ho komvidadu  onra sira no komunidade Manatuto tomak ne’ebé partisipa iha serimónia lansamentu ne’e.

“Ho investimentu ETO  nian iha área industriál hatudu kompromisu forte husi governu sentrál hodi hasa’e kreximentu ekonómiku Timor-Leste nian no redus númeru dezempregu hodi garante empregu ba joven timoroan sira, ein-espesiál Manatuto oan sira,” Luís Fernandes afirma.

Prezidente Autoridade Manatuto ne’e hatutan, povu Manatuto koñese di’ak empreza ETO no nu’udar Manatuto oan, povu Manatuto iha karateristika simular ida ne’ebé interese hori uluk kedas nu’udar povu simples no la fó interese ba konflitu ne’ebé ho intensaun boot. Ho ida ne’e, fiar katak futuru parke industriál ida-ne’e sei sai di’ak liu husi komportamentu povu Manatuto nian.

Lideransa Munisípiu Manatuto ne’e mós husu atu Governu sentrál tau mós prioridade ba investimentu seitór privadu sira Munisípiu Manatuto nian, nune’e bele kontinua krese hodi apoiu ekonómia lokál iha Timor-Leste.

Prezidente Autoridade Manatuto husu mós ba Primeiru-Ministru Kay Rala Xanana Gusmão, liuliu ba parte seguransa atu apoiu instala postu seguransa Polísia iha parque industrial ne’e hodi garante fatin ne’e seguru tanba ida ne’e investimentu ne’ebé boot.

Ba Ministru Justisa, Sérgio Hornai ne’ebé providênsia fatin ne’e ba investimentu Parque industriál husi ETO,  tuir Prezidente Autroidade Manatuto katak, ida-ne’e hatudu governu nia kompromisu ba apoiu seitór privadu nasionál.

Ba Ministru Administrasaun Estatál (MAE), Tomas do Rosário Cabral, atu akompaña nafatin munisípiu Manatuto para depois bele avansa lalais liután ba desentralizasaun podér lokál.

Ba Ministru Planeamentu no Investimentu estratéjiku, Gastão  de Sousa, PA Mantuto lori Manatuto oan sira nia naran hato’o obrigadu ba apoiu tomak, atu nune’e, seitór privadu Munisípiu Manatuto la’o nafatin ba oin ho investimentu sira.

Reportajen ekipa Rafa.tl