Grand Dragon Lotaria Dezmente Loke Jogu Online no Lamenta ho Buska-Apreensaun

PM Xanana Gusmão tun direta no orienta taka atividade empreza Lotaria Grand Dragon, Kinta (04/12/2025). Imajen/Rafa.tl

DILI, RAFA.tl–Empreza jogu  Grand Dragon Lotaria lamenta ho atuasaun Polísia Nasionál Timor-Leste (PNTL) ne’ebé halo buska no apreensaun ba empreza Grand Dragon nia pessoál tanba deit deskonfia pratika jogu online.

Notísia Relevante: PNTL Buska no Apreensaun Ba Lotaria Grand Dragon Hodi Detein Mós Jerente Na’in-tolu

Fontes Rafa.tl iha  Grand Dragon Lotaria konfirma katak dezde inisiu operasaun empreza Grand Dragon legal Loitaria no iha lisensa operasaun ba atividade sira lotaria ne’ebé formaliza husi Inspetór Jerál ba Jogu (IGJ, sigla portugés) to’o ohin loron seidauk pratika jogu online.

Fontes  ne’ebé husu atu la bele publika nia identidade ne’e mós  kestiona no dúvida ho atuasaun buska no apreensaun husi autoridade Polísia ne’ebé la ho mandadu Tribunál, maibé ho deit mandadu Ministériu Públiku nian.

“Grand Dragon Lotaria halo operasaun bazeia ba lei no hetan lisensa legal husi IGJ, inklui selu taxa ba Estadu. Alegasaun husi buska no apreensaun  dehan Grand Dragon Lotaria halo atividade jogu online ne’e informasaun lalós no bosok. Ami iha duni lisensa online, mas ne’e empreza ketak ida la’ós  Grand Dragon Lotaria no mézmu empreza ketak ne’e iha lisensa mas dezde kazu Oé-Cusse, ami simu notifikasaun hodi suspende jogu online hotu tanba ne’e ami la hala’o atividade jogu online ne’e,” fontes ne’e konfirma tan.

Fontes ne’e esplika produtu ne’ebé Grand Dragon Lotaria fa’an ne’e produtu lotaria, la’ós tipu jogu online no kuandu entende didiak atividade jogu online ne’e bele dehan kolaborador sira la’ós ema na’in-10 ka na’in-15 deit, maibé tenke na’in-atus ba leten.

“Ami nia empreza  Grand Dragon Lotaria  nunka iha kolaborador ka funsionáriu to’o fali na’in-100, tanba ami halo loos deit operasuan lotaria hanesna mós ho Rudal, Kiss no seluk-seluk tan mak daudaun ne’e kontinua eziste,” nia hateten.

PM Xanana Orienta Taka Totál

Iha Kinta, 04 fulan-Dezembru tinan 2025,  tuku 07:00 dadeer Oras Timor-Leste, Primeiru-Ministru (PM), Kay Rala Xanana Gusmão, tun direta ba empreza  Grand Dragon Lotaria iha Rua Praia dos Coqueiros, Dili, hodi observa Polísia Diresaun Servisu Investigasaun Kriminál  (DSIK) nia atuasaun ne’ebé halibur hela objetu balun.

PM Xanana orienta kedas ba autoridade Polísia hodi taka totál atividade jogu Lotaria Grand Dragon iha Timor-Leste tanba deskonfia halo atividade jogu online.

“Hato’o deskulpa tanba ha’u  mai tarde, tanba ha’u  ba Lotaria Grand Dragon hodi haré atividade sira no tanba Parlamentu Nasionál mós ko’alia kona-bá jogu online, iha ne’ebá mak deputadu sira hakilar mafia, mafia, fó lisensa buat sira ne’e hotu. Tanba ida-ne’e maka Grand Dragon nafatin iha jogu no iha ligasaun ho Indonézia, Brazil, Rúsia no Europa, ha’u haruka taka,” Xanana Gusmão,  haktuir ba membru governu sira iha reuniaun interministerial ASEAN ba dala-III iha salaun Nobre Ministériu Negósiu Estranjeiru no Koperasaun (MNEK).

Xanana informa tan katak foin dau-daun Polísia Sientifika Investigasaun Kriminál (PCIC) ho Polísia no Intelijénsia sira  aprezenta prova kona-bá se mak simu persentazen, ida ne’e mós iha hotu, sira haruka tiha ona ba Prokuradór Jerál Repúblika, buat ne’e la la’o.

“Tanba sira servisu maka’as, kalan mós sira servisu nafatin, tanba ne’e maka hasai tiha ona rezolusaun ida  hodi taka, maibé ema joga nafatin. Hasai fali tan desizaun ida katak, se joga nafatin, ba sobu tiha,  ne’e mak ha’u ba to’o  Grand Dragon Lotaria,” Xanana hateten.

Iha fatin seluk, porta-voz PNTL Superintendente Asistente Polísia João Belo dos Reis, hatete, prosesu halo intervensaun ba  Grand Dragon Lotaria kontinua halo apreensaun ba objetu balun ne’ebé liga ba sira nia atividade.

“Ita sei aprezenta ba iha Ministériu Públiku (MP), Sesta loraik (05/12/2025) no kompeténsia MP atu prosesa ba Tribunál,” Superintendente Asistente Polísia João Belo dos Reis hateten.

Superintendente Polísia João Belo dos Reis afirma, polísia Diresaun Servisu Investigasaun Kriminál asegura ona jerente  Grand Dragon Lotaria na’in-tolu, inklui foti deklarasaun kolaboradór ka traballadór na’in-15, ne’ebé aprezenta ona ba Ministériu Públiku.

“Se empreza sira ne’ebé afetadu ba operasaun ida-ne’e iha direitu atu ko’alia iha Tribunál,” nia afirma.

Iha operasaun buska no apreensaun ne’e, Polísia identifika  suspeitu na’in-tolu nu’udár jerente no traballadór hamutuk na’in-15.

Ministru Interiór, Francisco da Costa Guterres konfirma mós katak Rezolusaun Governu nian hasai ona hodi taka totalmente atividade jogu online sira, ne’ebé Lotaria Grand Dragon kontinua hala’o sira nia atividade, nune’e Ministériu Públiku hatún despaixu ba Polísia Nasionál Timor-Leste, liu husi Diresaun Servisu Investigasaun Kriminál, hodi ezekuta, halo buska no apreensaun ba Lotaria Grand Dragon.

“Lotaria Grand Dragon lakohi suspende nia atividade jogu online entaun ami impoin ho regra haruka para. Depois ema sira ne’ebé kontinua joga ne’e sira tenke ba hatán iha Tribunál,” Francisco da Costa Guterres tenik.

Polísia halo investigasaun hodi análiza  no servisu informasaun deteta, depois komunika ba MP haré katak ne’e iha ona faktu ne’ebé mak sufisiente para sira tama halo buska.

Reportajen ekipa Rafa.tl