Governu Mobiliza Estudante, Funsionáriu Estadu no Populasaun Simu Ramos-Horta iha Aeroportu Hafoin Fila Husi Malázia

Lia-nain sira ho populasaun no estudante sira simu PR José Ramos-Horta bainhira fila husi Malázia, Kuarta (29/10/2025). Imajen/Rafa.tl

DILI, RAFA.tl– IX Governu Konstitusionál mobiliza estudante no populasaun sira, inklui funsionáriu públiku no kazual sira, simu Prezidente Repúblika José Ramos-Horta iha Aeroportu Internasionál Prezidente Nicolau Lobato, Comoro, hafoin partisipa serimónia ofisializasaun adezaun Timor-Leste ba ASEAN hanesan membru ba dala-11 no Simeira ASEAN ba dala-47 iha Kuala Lumpur, Malázia.

Notísia Relevante: Adezaun Ofisiál Ba ASEAN, PM Xanana Agradese Apoiu Tékniku no Polítiku hosi IMF

Prezidente Repúblika (PR), José Ramos-Horta ho delegasaun fila husi Malázia no to’o iha Aeroportu Internasionál Prezidente Nicolau Lobato, ho aviaun Aero Dili iha tuku 06:45 Otl no simu direta husi Vise-Primeiru-Ministru no Ministru Koordenadór ba Asuntu Dezenvolvimentu Rurál no Abitasaun Komunitáriu, Mariano Assanami  Sabino, koordena hamutuk ho membru Governu sira, membru Parlamentu Nasionál, membru diplomátiku sira, liu-liu Embaixadór sira hola parte iha membru  ASEAN nian iha Timor-Leste, estudante no komunidade sira ne’ebé ho entuziamu hein ho ksolok iha areadór Aeroportu.

Prezidente Repúblika José Ramos-Horta, iha konferénsia imprensa iha sala VIP Aeroportu Internasionál Prezidente Nicolau Lobato, Kuarta (29/10/2025), hateten, orsida mak sei halo boas vindas ba Primeiru-Ministru Xanana Gusmão, tanba Xanana mak Timor-Leste sai membru ASEAN.

Ramos-Horta konsidera PM Xanana mak halo hahú husi tempu luta to’o independénsia, halo fronteira marítima, halo projetu bobot, konstrusaun estadu, infraestrutura, hahú kedas husi governasaun Aliansa Maioria Parlamentál (2007-2012), ho prosesu ba diversifikasaun fundu Petrolíferu ne’ebé fo retornu boot ba Timor-Leste, eletrifikasaun, no buat sira ne’e mak fo kondisaun Timor-Leste tama ASEAN.

“Ne’e duni buat hotu-hotu ha’u fó ba, rekoñese ba Primeiru-Ministru Maun boot Xanana,” Prezidente Repúblika José Ramos-Horta hateten.

Xefe Estadu subliña selebrasaun ne’e todan iha Primeiru-Ministru no membru Governu hotu nia kabás, para Timor-Leste kumpre programa dezenvolvimentu, buat hotu-hotu, hametin dame atu  konfiansa ne’ebé líder ASEAN sira fó ba Timor-Leste, labele sama.

“Ita nia direitu iha ASEAN mak ne’e, ita nia estatutu hanesan ho Indonézia, Tailándia no país ASEAN sira seluk nian. Direitu atu tuur iha ne’ebá ko’alia kona-bá dezenvolvimentu, asuntu hotu-hotu ne’ebé iha ASEAN nia laran no mós asuntu ne’ebé internasionál ASEAN tau iha meza, tau iha ajenda para ko’alia, partisipa no kontribui ba debate no desizaun,” Ramos-Horta subliña.

Prezidente Repúblika mós agradese ba Embaixadór sira país ASEAN nian iha Timor-Leste, parseiru sira ASEAN nian, Estadus Unidus América, Uniaun Europeia, Austrália, Nova Zelándia, Korea-Súl, Xina no país hotu ne’ebé apoiu Timor-Leste nia dezenvolvimentu no hamutuk ho Timor-Leste to’o ba adezaun ofisiál ba ASEAN.

Hafoin konferénsia imprensa iha salaun VIP Aeroportu Internasionál Prezidente Nicolau Lobato, Prezidente Repúblika José Ramos-Horta akompaña husi estudante sira, populasaun no funsionáriu públiku sira hala’o kedas komboiu ba Palásiu Prezidensiál Nicolau Lobato Bairu-Pité.

Durante iha dalan, estudante no komunidade sira ho entuziamu no haksolok haklalak hodi fó viva ba Prezidente Repúblika José Ramos-Horta no hakilar mós viva ASEAN no viva Timor-Leste.

To’o iha Palásiu Prezidensiál, Xefe Estadu simu ho saragala husi lia-na’in sira, tebe no drum band, inklui moradór sira, hodi fo bem-vindu.

Hafoin to’o Palásiu Prezidensiál, Prezidente Repúblika José Ramos-Horta kontinua kedas ba nia eskritóriu hodi kontinua servisu no iha areadór Palásiu Prezidensiál nian nakonu ho estudante no populasaun sira.

Vise-Ministru Administrasaun Estatál, Jacinto Rigoberto hateten ba estudante, populasaun no funsionáriu sira kona-ba atividade dadér ne’e to’o de’it iha ne’e no sei kontinua fali iha tuku 16:00 otl, bainhira Primeiru-Ministru Kay Rala Xanana Gusmão ho delegasaun fila hikas mai Timor-Leste.

Reportajen ekipa Rafa.tl