Governu ho FFTL Asina MoU Ba Transferénsia Uzu Estádiu Munisipál Dili Durante Tinan-25

Governu liu husi MJDAK asina MoU ho FFTL kona-bá Ba Transferénsia Uzu Estádiu Munisipál Dili Durante Tinan 25. Imajen/Rafa.tl

DILI, RAFA.tl- Governu Timor-Leste, liu husi Ministériu Juventude Desportu Arte no Kultura (MJDAK) hamutuk ho Federasaun Futeból Timor-Leste (FFTL) ofisialmente asina Memorandu Entendimentu (MoU, sigla inglés) kona-bá transferénsia direitu uzu Estádiu Munisipál Dili durante tinan 25.

Notísia Relevante: PN Sei Buka Hatene Dezentendimentu Bá Reabilitasaun Estádiu Munisipál Dili, PM Xanana: Konsellu Ministru Aprova Tiha Ona

Iha komunikadu ofisiál ne’ebé Rafa.tl asesu husi Gabinete Média FFTL, Tersa (30/09/2025), haktuir  MoU ne’e, signatáriu sira deside katak, IX Governu Konstitusionál liuhusi MJDAK nu’udár entidade relevante, aseita fó ba FFTL kona-bá uzu estádiu Dili nian ho taxa ba períodu tinan-25 (rua-nulu-resin-lima) ba objetivu sira rekonstrusaun, manutensaun no utilizasaun hala’o atividade futebol públiku, privadu, nasionál no internasionál.

“MJDAK ho FFTL mós sei estabelese Konsellu Administrasaun ida ba Estádiu Dili, ne’ebé ho membrus na’in-lima kompostu hosi FFTL ema-na’in-tolu (3) no MJDAK ema-na’in-rua (2), no FFTL mak sei responsável administrativu ba kontrolu, utilizasaun no manutensaun loloos ba kampu futeból no área sira ne’ebé hale’u estádiu Dili, inklui pista atletízmu nian.” Rafa.tl sita komunikadu imperensa.

Prezidente FFTL, Nilton Telmo Gusmão dos Santos, hato’o nia apresiasaun no agradesimentu ba apoiu no kooperasaun ne’ebé estabelese ona entre parte rua, tanba memorandu entendimentu ne’e reprezenta pasu estratéjiku ida iha dezenvolvimentu sustentável futeból nasionál liuhosi utilizasaun ótimu no profisionál ba infraestrutura desportiva.

“Fiar katak, kolaborasaun ne’e sei fó impaktu pozitivu hodi hasa’e kualidade kompetisaun sira, dezenvolvimentu atleta, no organizasaun eventu desportivu nasionál no internasionál iha Timor-Leste,” Nilton Telmo Gusmão dos Santos hateten.

Serimónia asina memorandu entendimentu ne’e, parte MJDAK reprezenta hosi Xefe Gabineti, Egas Barros Guterres Godinho no parte FFTL Prezidente ezekutivu Nilton Telmo Gusmão dos Santos akompaña husi Sekretáriu Jerál FFTL, José Adilson Ribeiro no Diretór Dezenvolvimentu Parseria Internacional FFTL, Jánio Tilman, iha edifísiu FFTL.

Reportajen ekipa Rafa.tl