Governu Deside Kansela Lisensa Ne’ebé Fó Ba Operasaun Jogu Online iha Timor-Leste

Reuniaun Konsellu Ministru iha Palásiu Governu. Imajen/Média PM

DILI, RAFA.tl – Konsellu Ministrus aprova  projetu Rezolusaun Governu ne’ebé aprezenta hosi Ministru Prezidénsia Konsellu Ministru,  Hermenegildo “Agio” Pereira, ne’ebé determina kanselamentu lisensa ne’ebé fó ba operasaun jogu no aposta online.

Notísia Relevante: Jogu Online Sei Hamosu Problema Sosiál no Afeta Direta Ba Sosiedade

Iha komunikadu ofisiál ne’ebé Rafa.tl asesu husi Gabinete Média Prezidénsia Konsellu Ministru, Kuarta (01/10/2025), relata katak rezolusaun Governu ida-ne’e mós determina kanselamentu prosedimentu lisensiamentu sira ne’ebé la’o hela no bandu lisensa foun sira ba tipu atividade ida-ne’e, haree ba risku sira ne’ebé identifika ona ba nasaun nia seguransa, estabilidade sosiál, integridade ekonómika no reputasaun internasionál.

Ministériu tutela, hamutuk ho forsa seguransa sira, sei tau-matan ba implementasaun medida sira ne’ebé aprova ona hosi Rezolusaun Governu ida-ne’e.

“Diploma ne’e mós estabelese revizaun ba lejizlasaun aplikavel, liuliu Dekretu-Lei nú. 6/2016, loron 20 fulan-Abríl, ne’ebé regula setór ne’e,” sita komunikadu.

Antes ne’e, Governu Timor-Leste liu hosi Inspesaun Jerál bá Jogu (IGJ, sigla portugés) fó ona lisensa hodi lejitima jogu online hitu (7) no daudaun iha haat (4) mak halo ona atividade iha Dili laran.

Jogu online haat (4) ne’ebé eziste no halo nia operasaun iha Dili laran mak hanesan; ARL Kapstaad Unip, Lda. lokaliza iha Delta besik ponte foun, no nia filial ida iha Bebonuk. ARL Kapstaad Unip, Lda. hetan lisensa durante tinan 15 (sanulu resin lima).

Jogu online ne’ebé opera husi empreza Frandes Doutel Unip, Lda. lokaliza iha área Kulu-hun de Baixu, hetan lisensa tinan-rua (2) daudaun estende tan lisensa ba tinan ida.

Amizade Sentru Online, Lda. lokaliza iha besik Sede Suku Bemori no nia filiál rua; ida iha Fatuhada no ida seluk iha área Metiaut.

Empreza operadór MJX Monjuxacar Lda, nia atividade jogu online lokaliza iha Timor Plaza CBD4 nia filiál ida iha Delta.

Molok ne’e IGJ mós fó ona lisensa ba atividade jogu Lotaria sira, mak hanesan Amizade Lda, Timor Pools, Lda, Rudal, BedFord Lda, Dream Entertaiment, Toto Fitun Timor ho Restar Global Timor.

IGJ mós fó lisensa ba atividade jogu Toto Bola sira mak hanesan, Sucesso Hamutuk Lda, Funspotaaa Ball Lda, BringsQ 04 Lda, Narabey Lda.

Iha mós lisensa ba jogu Slot Machine mak hanesan, Timor Holding GoldenSans, MTG Holding ho Hunlon Julma Lda.

Durante tinan 2023, empreza sira ne’ebé hetan lisensa hosi IGJ hodi halo atividade jogu sira ne’e kontribui ona reseita bá kofre Estadu ho montante US$3,741,660.30.

Iha tinan 2024 totál reseita US$3,917,821,91, no ba tinan 2025, hahú hosi fulan- Janeiru too fulan-Agostu ho total US$2,586,269,92.

Ekipa ekipa Rafa.tl