FFTL Sei Realiza “Taça da Liga FFTL”, ETO Group Apoiu US$35,000.00

Federasaun Futeból Timor-Leste (FFTL) sei realiza “Taça da Liga FFTL” iha fulan-Dezembru 2025. Imajen/Rafa.tl

DILI, RAFA.tl- Federasaun Futeból Timor-Leste (FFTL) sei realiza  “Taça da Liga FFTL” iha fulan-Dezembru ne’ebé sei akumula klubu primeira divizaun no segunda divizaun hamutuk 13.

Notísia Relevante: FIFA Nomeia Prezidente FFTL Nilton Telmo Gusmão dos Santos Ba Komité Permanente Anti-Rasízmu no Deskriminasaun

Klubu 13 ne’ebé konfirmadu partisipa iha “Taça da Liga FFTL” mak hanesan, Karketu Dili F.C, Assalam F.C, Coração F.C, AD SLB Laulara, F.C Porto Taibessi, Emanuel F.C,  DIT F.C, As Marca, Aitana F.C, Nagardjo F.C, Fitun Estudante Lorosa’e F.C, Santa Kruz no Lika-Lika FC.

Adjuntu Sekretáriu Jerál FFTL, Fernando Baptista Xavier, ba jornalista sira iha Xanana Sport Centre, Tersa (11/11/2025) hateten, FFTL nia planu ba realiza kompetisaun “Taça da Liga FFTL” atu konkretiza kompromisu ne’ebé Prezidente FFTL, Nilton Telmo Gusmão dos Santos hato’o ba delegadu sira iha kongresu anuál FFTL nian ne’ebé halo iha fulan-Agostu liubá.

“Ohin, ita anúnsia iha biban ida-ne’e, no hakarak informa no públika ba públiku katak Taça refere sei finánsia direta husi prezidente FFTL ne’ebé maka kolabora ho ETO Group, hodi realiza kompetisaun ne’e,” Fernando Baptista Xavier hateten.

Diretór Kompetisaun FFTL, João Campos hateten, hanesan antes ne’e prezidente FFTL deklara ona atu iha “Taça da Liga FFTL” ho objetivu atu halibur fila-fali klubu sira husi primeira no segunda divizaun, tanba ne’e mak liuhosi konferénsia ba imprensa ida-ne’e atu informa no hato’o ba públika hotu katak, iha fulan-Dezembru 2025 sei abertura “Taça da Liga FFTL”.

Nia afirma, tasa ida ne’e rasik ho objetivu atu avalia fila-fali atividade tinan tomak ne’ebé FFTL halo ona ba iha jogadór sira hotu. Federasaun haré ona katak iha espasu barak hafoin liga termina, paradu tiha jogu sira iha kompetisaun as liu, tanba ne’e tasa ida-ne’e hatudu FFTL nia responsabilidade tomak atu haburas fila-fali futeból no hasa’e kualidade kompetisaun hodi hasa’e kualidade jogadór iha selesaun nasionál.

“Ha’u hakarak informa ba iha mídia sira hotu, públiku hotu katak empreza ETO Group prepara orsamentu ba kampiaun ho totál US$35,000.00 ba kampiaun “Taça da Liga FFTL” ne’e rasik. Sei iha mós prémiu ba jogu ne’ebé orsida sei enkaixa hotu iha regulamentu laran ne’ebé sei informa mós ba klubu sira iha reuniaun tékniku tuir mai,” João Campos hateten.

Diretór kompetisaun ne’e mos husu ba klubu sira prepara ekipa hodi kompete iha “Taça da Liga FFTL” no kompetisaun sei halo ho formatu meiu kompetisaun no durasaun jogu fulan ida no sei realiza iha kada semana hahú husi  Kinta-feira to’o Domingu durante fulan-Dezembru tomak.

Parte arbitrazen Futeból Timor-Leste prontu atu asegura kompetisaun “Taça da Liga FFTL” ne’e to’o remata.

Reportajen ekipa Rafa.tl