Fevereiru 2026, Kongresu Eletivu Estrutura Foun FFTL

Prezidente FFTL, Nilton Telmo Gusmão dos Santos. Imajen/FFTL

DILI, RAFA.tl—Prezidente Federasaun Futeból Timor-Leste  (FFTL), Nilton Telmo Gusmão dos Santos,  informa kongresu eletivu ba estrutura foun FFTL nian ba mandatu 2026-2030 realiza iha fulan-Fevereiru 2026.

Notísia Relevante: FIFA, AFC ho AFF Husu FFTL Lori Fali Futeból Mai Timor-Leste

Prezidente FFTL, Nilton Telmo Gusmão dos Santos,  fó sai anúnsiu ofisiál ne’e ba Prezidente Asosiasaun Futeból Munisípiu sira no asosiasaun Profisionál sira inklui reprezentante klube kampiaun Primeiru no segundu Divizaun, iha ámbitu kongresu estraordináriu FFTL ba dala-XII, ne’ebé hala’o iha Otél Palm Springs, Fatuhada, Dili, Sábadu (09/08/2025).

“Iha oportunidade ida-ne’e, ha’u deklara katak kongresu eletivu tuir mai, ne’ebé atu bele hili fali estrutura foun ba ezekutivu sira FFTL nian, sei halo iha fulan-Fevereiru 2026, no kona-bá  loron sei anúnsiu ofisiál iha tempu tuir mai,” Nilton Telmo Gusmão dos Santos hateten.

Nilton hatutan iha kongresu ne’ebé sei mai nakloke ba timoroan hotu ne’ebé iha paixaun ba futeból, hotu-hotu iha direitu atu kompete ho responsabilidade no vizaun ba dezenvolvimentu futeból iha rai ne’e.

Iha biban ne’e, prezidente Karketu Díli FC, José Luis Oliveira, hateten iha sira-nia parte iha esperansa ba lideransa atuál Federasaun Futeból Timor-Leste, Nilton Telmo Gusmão dos Santos, tanba ne’e iha kongresu tuir mai, Karketu Díli FC nu’udár kampiaun primeiru Divizaun, nafatin depozita konfiansa ba Prezidente FFTL atuál.

Iha fatin hanesan,  Prezidente Asosiasaun Futeból Baucau, Marito Belo hateten Asosiasaun Futeból Baucau, konserteza sei hili ida ne’ebé di’ak liu.

“Ami iha esperansa atu Prezidente Federasaun atuál, Nilton Telmo Gusmão dos Santos kontinua lidera FFTL ba períodu tuir mai,” Marito Belo hateten.

Iha oportunidade ne’e mós, Prezidente FFTL  Nilton Telmo Gusmão dos Santos, informa ba Asosiasaun Munisípiu sira, kona-bá planu FFTL nian atu organiza atividade juveníl ba membru Asosiasaun sira hotu ne’ebé tuir planu sei realiza iha tinan ne’e nia rohan.

Jogu ka kompetisaun juveníl ne’e sei halibur jogadór Juveníl husi munisípiu hotu no halo kompetisaun durante semana ida hodi fó oportunidade ba jogadór Juveníl sira hotu kada munisípiu hodi bele kompete iha Díli.

FFTL sei realiza mós kompetisaun ba klube sira ne’ebé hamahan-aan iha Liga Futeból Timor-Leste ka LFTL.

FFTL sei organiza mós tasa federasaun nian ne’ebé sei tau hamutuk primeiru no segundu klasifikasaun husi klube sira Primeira no segunda Divizaun, hodi kompete no ida ne’e hanesan kria oportunidade ba klube sira hodi iha biban bele kapitaliza sira-nia aan iha atividade ne’ebé organiza husi FFTL.

Reportajen ekipa Rafa.tl