F.C Porto Taibessi Lidera Tabela Klasifikasaun Grupu C Hafoin Manán Lica-Lica Lemorai F.C ho Skor 3-0

Ekipa jogadór F.C Porto Taibessi selebra vitória hafoin manán nia adversáriu Lica-Lica Lemorai F.C ho skor 3-0 iha jogu Taça da Liga iha Estádiu Munisipál, Díli, Domingu (01/02/2026). Imajen/Rafa.tl

DILI, RAFA.tl– Ekipa estimadu komunidade Taibessi, F.C Porto Taibessi susesu lidera provizoriamente tabela klasifikasaun grupu C hafoin manán nia adversáriu Lica-Lica Lemorai F.C ho skor 3-0.

Notísia Relevante: Coração F.C Rekolla Pontu Tolu Hafoin Halakon Fitun Estudante Lorosa’e F.C ho Skor 2-1

Iha jogu kontinuasaun Taça da Liga FFTL ne’ebé hala’o iha Estádiu Munisipál Díli, Domingu (01/02/2026), ekipa F.C Porto Taibessi konsege manán nia adversáriu Lica-Lica Lemorai F.C hodi lidera tabela klasifikasaun grupu C no hadau oportunidade ba faze meia-finál.

Iha jogu primeira parte, ekipa rua tun ho ambisaun hakarak manán, tanba iha jogu antes ekipa rua rekolla pontus pozitivu.

F.C Porto Taibessi ne’ebé maioria reforsa husi jogadór sira ne’ebé hela iha Taibessi halo jogu ida atrativu tuir ritmu ne’ebé idéntiku ho ekipa refere. Lica-Lica Lemorai F.C hatudu jogu ida atrativu mós no sempre halo kontra atake ne’ebé perigu ba F.C Porto Taibessi, maibé armada Taibessi ne’e mantein kalma no asegura nia ekipa husi atake ne’ebé iha.

To’o jogu primeira parte termina, ekipa rua mantein ho skor 0-0, ho nune’e Treinadór sira tenke halo mudansa ba tátika no fó orientasaun másimu ba jogadór sira durante tempu deskansa, hodi nune’e, bele manán jogu ne’e iha segunda parte.

Kontinua ba segunda parte F.C Porto Taibessi, hasa’e nia intensidade jogu, no jogadór Hasan Ramos susesu marka golu ida iha minutu 52 hodi muda skor ba 1-0.

Tama ba minutu 65 ekipa F.C Porto Taibessi liu husi jogadór estranjeiru Inosensios Ati marka tan golu ida hodi muda skor ba 2-0.

Ho golu ne’e Lica-Lica Lemorai F.C hahú halo substituisaun no mudansa ba jogu iha liña klaran no hasa’e liután intensidade iha liña avansadu hodi buka oportunidade ba hatama golu, maibé sei falla.

Tama ba minutu 68 F.C Porto Taibessi liu husi jogadór estranjeiru ho nasionalidade Indonésia Gaudénsio Karen marka tan golu ida hodi muda skor ba 3-0.
Ho vitória ne’ebé iha F.C Porto Taibessi provizoriamente lidera tabela klasifikasaun grupu C, ho pontus haat no iha oportunidade hakat ba faze tuir mai bainhira iha jogu ikus manán Fitun Estudante Lorosa’e F.C.

Treinadór Lica-Lica Lemorai F.C, Nelson Soares hatete, derota ne’ebé sira hetan tanba fallansu halo rotasaun ba jogadór iha segunda parte.

“Ha’u hanoin jogu la’o di’ak hela, ami halo rotasaun hetan fali ritmu jogu mós, oras mai ami menus ona oituan no jogu falla iha ne’e, ne’ebé ba oin, ami sei hasoru ami nia jogu ida tan, hanesan klubu iha esperansa hakarak manán, maibé buat hotu ita bele halo, atu manán ka lakon 90 minutus mak termina,” Nelson Soares hateten.

Treinadór F.C Porto Taibessi, Henki Noguera apresia no agradese ba nia jogadór sira, tanba esforsu hodi rekolla pontu tolu no sei kontinua atu hadi’a di’ak liu tan performa ekipa hodi kompete iha jogu tuir mia.

“Ha’u husu obrigadu barak ba ha’u nia ekipa, no parabéns ba ha’u nia ekipa ne’ebé mak jogu hetan trés pontus. Hanesan ita asiste rasik katak iha primeira parte ami jogu tensi ne’ebé hanesan, no ami nia jogadór monu oituan, maibé tama segunda parte ami hadi’a di’ak liután hodi hetan trés pontus, jogu tuir mai, ami sei hadi’a tan, ekipa halo di’ak liu tan,” Henki Noguera hateten.

Tuir oráriu, iha Sesta (06/02/2026), F.C Porto Taibessi sei joga kontra Fitun Estudante Lorosa’e F.C, no iha loron tuir mai, Sábadu (07/02/2026), Lica-Lica Lemorai F.C sei hasoru Coraҫão F.C.

 Reportajen Ekipa Rafa.tl