Emmanuel F.C iha Ambisaun Hakarak Marka Golu Uluk ba Adversáriu Iha Jogu Faze Daruak Meiu-Finál Taça da Liga

Ekipa Emmanuel FC. Imajen/Rafa.tl

DILI, RAFA.tl – Emmanuel F.C iha ambisaun hakarak marka golu uluk ba adversáriu iha jogu faze daruak meiu-Finál Taça da Liga, nune’e bele hetan oportunidade másimu atu domina jogu no rekolla vitória ba finál.

Notísia Relevante: Emmanuel F.C ho F.C Porto Taibessi Fahe Pontu Hanesan iha Jogu Dahuluk Faze Meia-Finál Taça da Liga

Asistente Treinadór, Emmanuel F.C, Van Basten liu husi konferénsia ba imprensa iha Estádiu Munisipál Díli, Kinta (19/02/2026) hatete, nia parte nafatin ho ritmu jogu atake no prepara mós estratéjia balu,  nune’e  bele duni sira nia alvu hodi marka golu uluk iha jogu primeira parte, atu nune’e, Emmanuel bele iha oportunidade rekolla vitória.

“Ami Emmanuel la halo predisaun ba golu, maibé ami buka golu primeiru, iha primeira parte, tanba ami hetan golu uluk, iha primeira parte, jogu ne’e sei sai oinseluk,” Van Basten hateten.

Nia afirma Emmanuel sei mantein ritmu jogu hanesan semana kotuk, mai ho prinsípiu ne’ebé mak atu anima jogu iha meia-finál faze daruak ne’e ho  nafatin  jogu ataka  hasoru adversáriu FC Portu Taibessi.

Tuir nia avaliasaun katak  jogu semana kotuk faze primeiru meia-finál,  ekipa FC Porto Taibessi  mai ho tátika ida Low block, “hein iha kotuk”, entaun ida ne’e mak Emanuel prepara ona, oinsá mak atu hasoru Low Block ne’e.

Treinadór F.C Porto Taibessi, Luís Simões afirma, nia ekipa mós halo preparasaun másimu no iha ambisaun forte hakarak konkista vitória kontra adversáriu Emmanuel F.C.

“Konserteza ami mós iha ami nia tátika rasik, no ami mak hatama golu uluk fali hanesan jogu faze dahuluk, no ami garante sei manán Emmanuel,” Luís Simões afirma.

Fó hanoin fali katak, iha jogu faze dahuluk ekipa Emmanuel F.C no F.C Porto Taibessi fahe pontus hanesan ho skor 1-1 no ekipa rua kontinua jogu faze daruak iha Sábadu, 21 fulan fulan-Fevereiru ne’e, iha Estádiu Munisipál Díli, iha oras tuku 18:00 OTL.

Reportajen ekipa Rafa.tl