DIT F.C Eliminadu Husi Taça da Liga Hafoin Lakon ho Nagardjo F.C ho Skor 2-1

Ekipa DIT FC eliminadu husi Taça da Liga 2025 hafoin iha jogu rua tutuir malu la konsege rekolla vitória no iha jogu ikus kontra Nagardjo F.C lakon ho skor 2-1. Imajen/Rafa.tl

DILI, RAFA.tl- Ekipa DIT F.C eliminadu husi Taça da Liga époka ne’e hafoin iha jogu rua tutuir malu la konsege rekolla vitória no iha jogu ikus kontra Nagardjo F.C lakon ho skor 2-1.

Notísia Relevante: Assalam F.C Rekolla Pontu Tolu no Lidera Tabela Klasifikasaun Grupu B Hafoin Manán DIT F.C 2-1

Ekipa DIT F.C ne’ebé hamutuk ho Asalam F.C no Nagardjo F.C iha grupu B ne’e obrigadu tenke fila sedu husi Taça da Liga 2025 hafoin iha jogu rua tutuir malu la rekolla pontu ruma, tanba lakon kontra Assalam F.C ho skor 2-1 no ho Nagardjo F.C ho skor 2-1.

Iha jogu ne’ebé halo iha Estádiu Munisipál Díli, Domingu (25/01/2026), DIT F.C iha ambisaun hakarak manán jogu ne’e hodi asegura oportunidade ba faze tuir mai.

Iha jogu hatudu DIT F.C hahú kedas lansa atake ba Nagardjo F.C liu husi avansadu no kapitaun José Santos, maibé sei falla iha ezekusaun bola, oportunidade sira tanba bola aas liu no balu kona de’it iha rin baliza nian.

DIT F.C kontinua hasa’e intensidade jogu ho ritmu ida aas, atu garante katak bola oportunidade ne’ebé iha bele nakfilak ba golu hodi muda skor iha tabela. To’o primeira parte termina, ekipa rua mantein ho skor 0-0.

Tama ba segunda parte ekipa DIT F.C no ekipa Nagardjo F.C kontinua hatudu jogu no halo kontra atake ba malu. DIT F.C lidera uluk iha minutu 55 liu husi jogadór estranjeiru Kauda Afo Mah ne’ebé marka golu hodi muda skor ba 1-0.

Ekipa Nagardjo F.C kontinua halo jogu no hasa’e ritmu hodi buka atu halo impata no oportunidade ba rekolla vitória. Esforsu ne’ebé Nagardjo F.C iha ikus mai muda duni skor ba 1-1 hafoin jogadór Nagardjo F.C Avary Sueva marka golu iha minutu 71. Ho golu ne’e Nagardjo F.C no DIT F.C kontinua halo jogu ida nakloke, maibé tama ba minutu 73, Nagardjo F.C marka tan golu ida liu husi jogadór Emmanuel Akeley hodi muda skor ba 2-1.

Ho rezultadu ne’e, ekipa Nagardjo F.C nafatin lidera to’o jogu remata no DIT F.C tenke elimina husi Taça da Liga FFTL.

Hafoin jogu ekipa DIT F.C lakoi fó komentáriu ruma ba mídia no hili dalan nonók no husik hela Estádiu Munisipál Díli.

Entretantu, treinadór Nagardjo F.C, Eduardo Pereira hatete, vitória ne’ebé Nagardjo F.C  hetan tanba jogadór sira implementa duni orientasaun ne’ebé iha.

Nia afirma mos katak Nagardjo F.C nia preparasaun iha semana rua de’it, depois jogadór foti husi terseira divizaun mak barak, jogadór nanis iha Nagardjo F.C barak mak muda klubu, tenke fera ulun oituan iha semana rua nia laran, hodi prepara sira.

“Nagardjo kontinua prepara kondisaun iha tempu loron haat, primeiru rekopera jogadór sira, atu nune’e tátika saida mak halo sira bele halo tuir, sira nia kondisaun preparadu ha’u sente jogu hasoru Assalam ha’u haré ona, no jogadór ne’ebé ha’u prepara hodi hasoru Assalam iha ona, tanba ohin Jogadór na’in lima la joga, sira kondisaun preparadu hein bainhira dia 31 hasoru Assalam, ami prontu kompete no bele hetan pontu tolu tan.” Hatete Eduardo Pereira.

Entretantu, ekipa Nagardjo F.C no Assalam F.C sei iha jogu ikus iha loron 30 fulan-janeiru hodi hadau malu oportunidade se mak sei lidera grupu B no hakat ba faze tuir mai.

Reportajen Ekipa Rafa.tl