Despaixu Promosaun Superintendente Polísia Julia Gama “Demoradu” Husi Ministru Interiór

Despaixu Ministru Interiór Francisco Guterres kona-bá prmosaun ofisiál superiór PNTL. Imajen/Repro

DÍLI, RAFA.tl- Superintendente Julia da Gama nia promosaun diviza “demorada” la’ós bazeia ba despaixu husi Komandante Jerál Polísia Nasionál Timor-Leste (PNTL) altura ne’ebá Komisáriu Jerál Polísia Henrique da Costa, maibé depaixu ne’e mai direta husi Ministru Interiór (MI), Francisco da Costa Guterres.

Notísia Relevante: PNTL Hala’o Promosaun Ba Ofisiál Superiór Na’in-62, Superintendente Julia Gama Hetan Diskriminasaun

Dokumentu despaixu ne’ebé Rafa.tl asesa hatudu katak depaixu “demoradu” promosaun diviza Superintendente Julia Gama nian ba Superintendente-Xefe  ne’e mai husi Ministru Interiór, Francisco da Costa Guterres  ho númeru 15/G-MI/III/2026, 19 fulan-Marsu, kona-bá “Despacho de Promoções dos Oficiais Superiores da Polícia Nacional de Timor-Leste”.

Iha dokumentu despaixu Ministériu Interiór nian ne’ebé asina husi Ministru Interiór iha Díli, 19 fulan-Marsu tinan 2026, iha pajina lista promosaun diviza (Naran, NIP, Kargu Atuál, Postu Promosaun,  Antiguidade no Postu,  CCLN, Idade, Modalidade, Antiguidade) ne’e, kontempla naran  Superintendente Julia da Gama ho NIP 190047 ho kargu atuál (sem cargo/ laiha kargu) promove ba Superitendente-Xefe (Superintendente-Chefe) ho klasifikasaun Demoradu.

Iha loron 20 fulan-Marsu 2026, depois simu despaixu husi Gabinete Ministru Interiór nian, Komandante Jerál PNTL Komisáriu Jerál Henrique da Costa, hatun despaixu dirije ba Komisaun Organizadora (KO) Promosaun/Atribuisaun Diviza organiza preparasaun ba serimonia  ofisiál ba promosaun no atribuisaun diviza ba ofisiál superior na’in-63 ne’ebé atu hala’o  iha  Sábadu, 21 fulan-Marsu 2026.

Iha Despaixu Ministru Interiór nian ho numéru  15/G-MI/III/2026 mós kontempladu promosaun diviza ba Ofisiál Superiór PNTL na’in-63, inklui Superintendente Julia da Gama, maibé nia klasifikasaun “Demoradu” (pendente/hein oituan).

Iha ámbitu aniversáriu PNTL nian ba dala-26 ne’ebé hala’o iha Palásiu Governu, Sesta (27/03/2026), jornalista sira halo konfirmasaun direta ho  Komisáriu Henrique da Costa no Komisáriu Polísia Pedro Belo (eis-Komandante Jerál ho eis-Segundu Komandante Jerál PNTL), haktuir katak despaixu promosaun diviza ba ofisiál superiór PNTL na’in-63 no na’in-ida; Superintendente Julia da Gama “demorada” ne’e mai husi Ministru Interiór Francisco da Costa Guterres.

“Naran Promosaun Tranzitóriu nível ajente de’it mós kompeténsia Ministru Interiór mak halo, ba tan ofisiál Superiór ho sira dirijente, ne’e ami nia kompeténsia saida.  Ne’e despixu husi Ministru Interiór nian mak fó mai iha Komandu Jerál depois orienta ba iha Komisaun organizadora, atu nune’e, organiza ita-nia membru sira ne’ebé mak naran tama iha lista promosaun ne’e prepara hodi simu deviza la’os despaixu Komandante Jeral mak halo,” Komisáriu Polísia Henrique da Costa  hatetne hodi reponde ba preokupasuan no kontestasaun Superintendente Julia Gama nian ne’ebé viral iha média sosiál.

Komisáriu Polísia Henrique da Costa  hatutan Ministru Interiór nia karta ofisiál despaixu ne’e hatún mai iha Komandu Jerál hafoin haruka ba iha Komisaun hodi hasai Superintendente Júlia da Gama husi parada (formatura).

“Dokumentu ofisiál ne’e iha, ita bele fó  atu nune’e ita-boot (jornalista-red) sira akompaña, se lae ita iha ne’ebá ne’e ita vítima hela de’it, ema seluk dehan Komandante Jerál PNTL mak halo. Ha’u orgullu bainhira ha’u nia membru sira sa’e deviza, ida-ne’e tama programa priodade ita nian,” Henrique da Costa konfesa.

Henrique da Costa husu ba membru sira ne’ebé la satisfas ba promosaun deviza ne’e bele halo rekursu liu hosi karta ruma, hodi nune’e, aprezenta ba Ministériu Interiór, bele ba direta Mnistériu Públiku ka ba Provedoria Direitus Humanus no Justisa (PDHJ).

Tuir despaixu iha ne’ebá ne’e la’ós katak Superintendente Julia da Gama la promove, maibé nia demoradu durante fulan-ualu (8) tanba dokumentu ne’e, Komisáriu Henrique da Costa, haktuir, nia mós lee,  tanba ne’e, se sente la satisfas bele halo rekursu ka pedidu ba iha Ministru Interiór para bele Ministru Interiór deside.

Iha fatin hanesan Komisáriu, Pedro Belo husu ba membru sira hotu atu servisu tuir lei ne’ebé vigura hodi servisu ba povu ho nasaun.

Konisáriu Polísia Pedro Belo, husu ba membru hotu-hotu ne’ebé maka hamahan aan iha Polísia Nasionál Timor-Leste, ne’ebé mai ho kompromisu no misaun atu servi de’it ba povu, no ba rai ida-ne’e, atu servisu tenke tuir lei.

“Karik iha duni problema, mosu duni nepotismu no la tuir lei, nu’udar treinadu,  nu’udar polísia hatene nia prosesu ba iha ierarkia Superiór PNTL, hodi loke prosesu disiplinar hasoru nia, no ida fali ita bele ba Ministériu Públiku para keixa hasoru nia, hodi responsabilidade ba nia hahalok ne’e. La’os ita halai fali ba mídia sosiál atu defama ema nia personalidade no hatún fali nia instituisaun rasik, tanba ne’e ho komandante jeral foun tenke tau matan fali ba ida ne’e,” Pedro Belo hateten.

Komisáriu Polísia Pedro Belo esplika kona-bá programa promosaun tranzitóriu ne’e prioridade Komandu nian, maibé kompeténsia hodi responsabilidade ba promosaun deviza  ba ajente to’o mai iha Ofisial Superiór ho Dirijente ne’e Ministériu Interiór nian, la’os kompeténsia Komandu Jeral nian.

“Ministériu Interiór forma komisaun ne’e iha kedas Ministériu ne’e, se mak prezidenti komisaun ba iha promosaun ne’e Xefe Gabinete Ministériu Interiór nian, karik mosu buat ruma ba husu iha sira. Tanba despaixu ne’e Komandu Jerál simu husi Ministériu Interiór ne’e iha loron 19 Marsu 2026, tuku 15:00 loraik,” Nia esplika.

Pedro Belo subliña, despaixu ba promosaun diviza ne’e husi Ministru Interiór haruka ba Komandu Jerál PNTL depois Komandu Jerál diriji ba iha komisaun organizadora ho liafuan rua, katak komisaun organizadora hodi organiza impozisaun diviza ba membru sira ne’ebé maka iha despaixu nia laran, no iha anexu trés haré ba iha idade.

 Reportajen ekipa Rafa.tl